Qirghizistandiki Uyghurlar qurban héytta saxawet ishlirini élip bardi

Ixtiyariy muxbirimiz féroze
2016.09.15
qirghizistan-qurban-heyt-saxawet-1.jpg Gérmaniyedin sherqiy türkistan uchur merkizi bilen qirghizistan Uyghurliri “Ittipaq” jem'iyiti birliship 19 buqa we 70 tin oshuq qoyni qurbanliq qilip qirghizistan boyiche bir ming a'ilige tarqitip berdi. 2016-Yili séntebir.
RFA/Féroze

Ulugh qurban héyt munasiwiti bilen qirghizistan Uyghurliri “Ittipaq” jem'iyiti xeyri-saxawetlik ishlarni élip bardi. Dunya Uyghur qurultiyidikiler qirghizistandiki Uyghurlargha qurbanliq üchün pul ewetken idi. Shundaqla gérmaniyedin sherqiy türkistan uchur merkizi bilen qirghizistan Uyghurliri “Ittipaq” jem'iyiti birliship 19 buqa we 70 tin oshuq qoyni qurbanliq qilip qirghizistan boyiche bir ming a'ilige tarqitip berdi. Ötken yili qirghizistan'gha sherqiy türkistan uchur merkizining re'isi abdujélil qaraqash ependi bash bolup, türk qérindashlirimizning yardimi bilen 600 a'ilige qurbanliq tarqitilghan idi.

Qurbanliqlarni teyyarlap, tarqitish ishlirigha gérmaniyedin rejep atesh we erjument élchi, bishkektin bolsa “Ittipaq” jem'iyitining re'isi artiq haji we bash yigit béshi mirza'ekrem abdulof mes'ul boldi.

“Ittipaq” jem'iyitining re'isi artiq haji qurban bayramliq saxawét ishliri toghrisida mundaq dédi: “Qushxanilarda islami sheri'et shekilde tekbir étip 10 buqa qurbanliqqa soyuldi, her bir buqa 200 kilodin oshuq boldi. Bu qurbanliq Uyghurlar köp sanda yashawatqan bishkek shehiride we uning etrapidiki yézilardin lébédinowka, nowopokrowka, wostok, alataw, keng bulung, toqmaqlardiki mohtaj bolghan 400 din oshuq a'ilige tarqitildi.

Qushxanilarda soyulup, parchilinip teyyarlan'ghan göshler toküldash mehellisidiki “Aq meschit” te her bir a'ilige 5 kilogramdin tarqitildi. Bashqa yézilardiki a'ililerge yigit bashliri özliri kélip élip, tarqitip berdi.

Qurban héytning ikkinchi küni bolsa, bishkekning gherbiy teripige jaylashqan chaldawar, qarapalta, malawod we bashqa yézilargha 80 qoy qurbanliqqa soyulup tarqitildi. Bu ishqa mirza'ekrem hajim mes'ul boldi.

Charshenbe küni dunya Uyghur qurultiyidin ewetilgen qurbanliq göshler urush mezgilliride tajikistandin qéchip kelgen qirghiz wetendashlirimizning a'ililirige tarqitildi. Shundaqla gérmaniyedin kelgen rejep atesh moshu yézilardiki mohtaj bolghan a'ililerning balilirigha kiyim-kécheklerni élip berdi.

Qirghizistanning jenubidiki osh, jalal'abad wilayetliridimu 9 buqa qurbanliq qilinip, 360 a'ilige tarqitildi, bu ishqa gérmaniyedin kelgen erjument élchi mes'ul boldi. Erjument ependi, héyttin burun osh we jalal'abadqa bérip kelgenliklirini anglatti, u, allah buyrusa, qurban héytning 2-3 künliri allah raziliqi üchün qiliwatqan xeyri saxawetlik ishlarni püttürüp, charshenbe küni bishkekke qaytip kélidighanliqini éytti.

Buning bilen, xeyri saxawetlik ishlar tügimidi, 19-séntebir küni bishkekte jama'et bilen türk qérindashlirimiz xetme qur'an ötküzmekchi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.