Стокһолм яңратқуда әзан товлашни тәстиқлиди

Ихтиярий мухбиримиз ялқун
2013.04.22
stokholm-mesjid-305.png Шиветсийә телевизийисиниң тор бетигә қоюлған сүрәт
Swidish TV

Шветсийә телевизийисиниң хәвәр қилишичә, шветсийә сақчи мәһкимиси стокһолмдики фития райониға җайлашқан түрк мәсчитиниң илтимасиға асасән һәр җүмә күни җүмә намизиниң әзан авазини сиртқа қоюветишкә рухсәт қилған.

Фития районидики түрк мәсчити йеңидин селинған, түрк услубидики мәсчит болуп, 2012 - йили январда җүмә намизиниң әзан авазини сиртқа қуюветиш һәққидә шветсийә сақчи мәһкимисигә илтимас сунған. Шветсийә сақчи мәһкимиси илтимасқа бир йилдин артуқ қарап чиққандин кейин тәстиқ қарарини алған.

Бу хәвәр шветсийидики әң қизиқ нуқтилиқ хәвәрниң биригә айлинип, пүтүн таратқуларниң һәммисидин орун алған. Хәвәрдә дейилишичә, мәсчитләрдә әзан авазиниң сиртқа қоюветилиши шветсийә тарихидики тунҗи қетимлиқ иш болуп, бу шветсийидә яшаватқан пүтүн мусулманларни һаяҗанға салған.

Стокһолм сақчи мәһкимисиниң мәсул хадими шветсийә телевизийисиниң зияритини қобул қилғанда: “биз тоғра қарар чиқардуқ дәп ойлаймиз, чүнки бизниң қараримиз шветсийә вә явропа иттипақиниң диний әркинлик қануни вә пикир әркинлики қануниға тамамән уйғун” дегән.

Биз таратқунлардин бу хәвәрни аңлиғандин кейин, шветсийидә яшаватқан уйғурларда қандақ инкасларниң болғанлиқини билип беқиш үчүн шветсийә уйғур комитетиниң диний ишлар бөлүмидин қурбанҗанни зиярәт қилдуқ.

Әзан авазиниң сиртта яңриши намаз қаидилириниң муһим тәркиби қисимлириниң бири болуп, җамаәткә намаз вақтини билдүрүш вә уларни намазға чақиришни мәқсәт қилатти.

Уйғурлар тарихтин буян мәһәллә - мәһәллиләрдики мәсчитләрдә әзанни мәсчит мунарида оқуп җамаәткә намаз вақтидин хәвәр берип кәлгән иди.

Әмма, хитай һөкүмити 90 - йиллардин кейин уйғурларниң диний етиқадиға болған чәклимиликләрни күчәйтип, мәзинләрниң мәсчит мунарлирида әзан оқушини чәклиди. Һәтта мәсчитниң сиртиға вә мунарлириға орнитилған яңратқуларнму пүтүнләй сөктүрүвәткән.

Хәвәрдә баян қилинишичә, җүмә намизиниң әзини һәр җүмә күни саәт 12билән 1ниң арилиқида болидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.