Tokyodiki afghanistan muhajirlirining qurban héyt pa'aliyitige Uyghurlarmu qatnashti

Ixtiyariy muxbirimiz haji qutluq qadiri
2016-09-13
Share
Tokyo-afghanistan-muhajir-qurban-heyt.jpg Yaponiye Uyghur birliki teshkilatining re'isi turmuhemmet hashim tokyodiki afghanistan muhajirlirining qurban héyt pa'aliyitige qatnashti. 2016-Yili 12-séntebir.
RFA/Qutluq

12-Séntebir tokyoda ötküzülgen afghanistan muhajirlirining qurban héytni tebriklesh pa'aliyitige Uyghurlarmu qatnashti.

Tokyodiki afghanistan réstoranida ötküzülgen afghanistan muhajirlirining qurban héytni tebriklesh pa'aliyiti aldi bilen qur'an tilawet qilishtin bashlan'ghan bolup, qur'an tilawitidin kéyin du'a qilishqa teklip qilin'ghan yaponiyediki afghanistan muhajirlirining moysipitliridin 75 yashliq özbék emin muhemmed'emin kohi du'a qilip Uyghurlarning baldurraq azad bolushini allahtin tillidi.

Tokyoda élip bérilghan afghan muhajirlirining qurban héytni qutlash murasimigha ishtirak qilghan yaponiye Uyghur birliki teshkilatining re'isi turmuhemmet hashim pa'aliyet heqqide toxtaldi.

Qurban héytni tebriklesh pa'aliyitige ishtirak qiliwatqan afghan muhajirliridin rehmitulla tilawet Uyghurlar heqqide toxtilip: "Biz Uyghurlarning hazirqi siyasiy weziyitidin toluq xewerdar. Uyghurlar heqiqeten zulum ichide yashawatidu. Biz Uyghurlarning diniy qérindashliri bolush süpitimiz bilen, elwette qolimizdin kélishiche maddiy we meniwi jehettin yardemde bolimiz " dédi.

Ziyaritimiz jeryanida 75 yashliq emin muhemmed'emin kohi dunya Uyghur qurultiyining re'isi rabiye qadir xanimni bir körüsh arzusi barliqini bildürüsh bilen birge, afghanlargha melum bolghan Uyghur tarixiy heqqide qisqiche toxtilip ötti.

U sözide yene, özining tokyoda yashawatqan bir qisim Uyghurlarni tonuydighanliqini, biraq xitay wetendashliqidiki bu Uyghurlarning xitayning türlük bésimidin qorqup meschitlerge namaz oqushqa baralmaydighanliqini shundaqla siyasiy gep sözlerni qilsa özidin yiraqliship kétidighanliqini bildürdi.

Yaponiyediki bir qisim Uyghur ziyaliylirining bildürüshiche, 2009-yili 5-iyul ürümchi weqesi munasiwiti bilen tokyoda ötküzülgen xitaygha qarshi naraziliq namayishlirida tokyoda yashawatqan afghanistanliq özbék muhajir qérindashlar maddiy we meniwi jehettin türlük yardemlerde bolghan.

Yaponiyening uchur menbe arxiplirida körsitilishiche, 1979-yili dékabir éyida sabiq sowétlar ittipaqi afghanistan'gha herbiy hujum qozghap ikki dölet arisidiki urush 1989-yili axirlashquche, birleshken döletler teshkilati musapirlar ishxanisining orunlashturushi bilen az sandiki bir qisim afghanistanliqlar tokyo etrapidiki sheherlerge orunlashturulghan.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.