Türkiyede ötküzülgen xelq'ara balilar bayrimida ayyoltuzluq kük bayraq lepildidi
2013.04.26

Türkiyining koja'éli wilayetlik we sheherlik hökümetning uyushturushi bilen bu yil 23 - april balilar bayrimini tebriklesh munasiwiti bilen, koja éli wilayitide 41 dölettin 1000 din artuq balilarni teklip qilip xelq'araliq chong bir pa'aliyet ötküzüldi.
Bu pa'aliyetke Uyghur perzentlirige wakaliten istanbulda yashawatqan 6 neper Uyghur baliliri qatnashti we pa'aliyet jeryanida milliyche kiyimlerni keygen Uyghur balilar, qollirida ayyoltuzluq kök bayraqni lepiliditip, Uyghurlarni tonushturush pa'aliyiti élip bardi.
Bu pa'aliyetke koja'éli waliyisi, sheherlik hökümet bashliqi, dangliq sen'etchiler we tenterbiyechiler shundaqla türkiyining show téléwiziyisining qabiliyet sizde dégen programmisida maharet körsetken meshhur shexsler bolup nechche ming kishi qatnashti.
Pa'aliyet jeryanida her bir milletke söz qilish yaki pa'aliyet körsitish pursiti bérilgen bolup, Uyghur qizlar etles köynek we chimen doppa bilen sehnige chiqip qollirida kök bayraqni igiz kötürgen halda “Men türkistan qizi” dégen shé'irni jarangliq déklamatsiye qildi we yighin ehlining qizghin alqishigha érishti. Nechche ming kishilik chong zalda alqish sadaliri yangridi.
Bu pa'aliyet 18 - aprildin 20 - aprilghiche dawam qilghan bolup, birinji küni tonushush, nomur körsitish, shé'ir we naxsha oqush pa'aliyiti élip bérilghan. Pa'aliyetning kiyinki künliri nechche kilométirliq musapini piyade yürüsh pa'aliyiti élip bérilghan bolup, nechche ming kishi kichik balilar bilen birlikte, özlirining milliy kiyimlirini kiyip yürüsh qilghan. Uyghur balilarmu ayyoltuzluq kök bayraqni kötürgen halda etraptikilerge Uyghurlarni tonushturup yürüsh qilghan.
Pa'aliyet dawamida her qaysi dölettin kelgen balilar koja'éli wilayitige teshekkür éytish we hediye teqdim qilish murasimi ötküzülgen bolup, Uyghur balilar waliygha yipek etles hediye qildi. Hediyeni tapshurup alghan waliy qizghin alqishlar ichide, “Sherqiy türksitanliq oqughuchilarning bu güzel hediyesi üchün rehmet éyitimen” dédi.
Biz bu pa'aliyet toghrisida téximu keng melumatqa érishish üchün bu pa'aliyetke Uyghur balilarni tertipligen sherqiy türksitan ma'arip we hemkarliq jem'iyitining ayallar bölümi bashliqi munewwer özUyghur xanim bilen söhbet élip barduq. Munewwer xanim bu xil pa'aliyetlerning Uyghurlarni tonushturushta ehmiyetlik ikenlikini, bu pa'aliyette Uyghur balilarning shé'ir oqush we Uyghurlarni tonushturush pa'aliyiti élip bérish pursitige érishkenlikidin memnun bolghanliqini ipadilidi.