Хотән ақташ секретариниң бомба гумандарлирини мәлум қилип хитайға хизмәт көрсәткәнлики ашкариланди

Хотән ласкойниң ақташ кәнт секретари адил сулайманниң, бултур ават кәнтидә секретарлиқ вәзиписи өтәватқанда икки нәпәр бомба гумандарини байқап сақчиларға мәлум қилғанлиқи, көрсәткән бу хизмити сәвәблик, диний кәйпият қоюқ болған ақташ кәнтигә йөткәлгәнлики ашкариланди.

Униң мухбиримизға баян қилишичә, бултур қаттиқ зәрбә бериш долқуни давам қиливатқан мәзгилдә пүркәнчилик аялларни тутуш вә қамақханиға тошуш үчүн мәхсус аптомобил аҗритилған; буниңға нәпрәтләнгән 17-18 яшлиқ икки нәпәр яш, бу аптомобилни партлитиветишни пиланлап бомба ясиған. Бу әһвални секретар кәнттики қулақлири йәни бир пайлақчиси арқилиқ уқуп қалған. У әһвални мәлум қилғандин кейин мәзкур икки нәпәр яш тутқун қилинип 4 вә 6 йиллиқтин кесилгән.

Юқириқи учурлардин мәлумки, ақташ секретари ават кәнтидә хизмәт көрсәткәнлики үчүн диний кәйпияти қоюқ дәп қаралған ақташ кәнтигә йөткәлгән. Лаской базарлиқ һөкүмәт һарақ, тамакини зорлаш буйруқини еғизаки уқтуруш қилғанда, бу секретар язма уқтуруш қилип, буйруқни актиплиқ билән иҗра қилған. Бу иҗраат хәлқара ахбарат васитилиридә кәң тарқалғандин кейин, хитайниң уйғур районида йолға қоюватқан диний сияситиниң маһийити дуняға йәнә бир қетим ашкариланди; бу ақивәттин кейин мәзкур секретарниң хитай даирилири тәрипидин давамлиқ һалда алқишланғанлиқи вә яки тәнқидләнгәнлики һазирчә мәлум әмәс.

Юқиридики улиништин мухбиримизниң бу һәқтә игилигән мәлуматлирини аңлайсиләр.