Учтурпан ақтоқайниң әдлийә понкити башлиқи тәравиһда пайлақчилиқ қиливатқан чеғида өлтүрүлгән

Учтурпанниң ақтоқай йезилиқ әдлийә понкити башлиқи нурмәмәт рози, тәравиһ намизиға кирип чиқиватқанларға пайлақчилиқ қиливатқан мәзгилидә өлтүрүлгән. Ақтоқай йезилиқ һөкүмәтниң хадими дав шүнйиңниң мухиримизға ашкарилишичә, вәқә өткән айниң 18-күни 7-кәнт мәсчитиниң алдида йүз бәргән. Баян қилинишичә, шу күни сақчи аптомобилиниң ичидә олтуруп пайлақчилиқ қиливатқан нурмәмәт рози намәлум кишиләр тәрипидин уштумтут һуҗумға учрап боғузлап ташланған, униң икки ярдәмчиси мәсчитниң арқа вә ян тәрипидә пайлақчилиқ қиливатқан болғачқа, уни қутқузушқа яки һуҗумчиларни тутушқа үлгүрмигән. Мәлум болушичә, нөвәттә җ х органлири, һуҗумни өткән айниң бешида имамлиримда 4 аилилик хитай йәр хоҗайинини өлтүрүп қечип йүргән гумандарлардин сулайман тохти билән абдуллаһ абдуреһимниң садир қилғанлиқини муәййәнләштүргән. Җ х органлири йәнә бу икки гумандарниң қорал булаш мәқситидә нурмәмәт розиға һуҗум қилғанлиқини тәхмин қилишқан.

Биз радиомизға кәлгән бир йип учиға асасән, алди билән ақтоқай йезилиқ һөкүмәткә телефон қилдуқ.
Мухбир: бу ақтоқай йезилиқ һөкүмәтму?
Хадим: шундақ.
Өз исминиң дав шүнйиң икәнликини баян қилған бу хадим, дәсләптә вәқәдин хәвәрсиз икәнликини билдүрди. У арқидин вәқәни башқилардин аңлиғанлиқини, нурмәмәт розиниң әдлийә понкитиниң башлиқи икәнликини вә униң 7-кәнт мәсчитиниң алдида зиянкәшликкә учриғанлиқини баян қилди.

Йәнә бу хадимниң баян қилишичә, вәқә 7-айниң 18 күни кечә саәт 9 вә 10 арисида йүз бәргән. Мәлум болушичә, вәқәни садир қилған гумандарлар техичә тутулмиған. Биз арқидин бу хадим тәминлигән учурларға асасән вәқә йүз бәргән 7-кәнт секретари әкбәр җумақни зиярәт қилдуқ:

Соал: сиз 7-кәнт секретари әкбәр җумақму?
Җаваб: шундақ.

Соал: нурмәмәт розиниң қачан, қәйәрдә қандақ өлтүрүлгәнлики һәққидә немиләрни билисиз?
Җаваб: шу күни наһийә бойичә йиғин ечип вәқәни һәммимизгә уқтурди, һәм наһийә бойичә сәпәрвәр болуп, ахтуруш елип бардуқ.

Соал: қәйәрдә қандақ өлтүрүлүпту?
Җаваб" 7‏-кәнт мәсчитиниң алдида тәравиһ мәзгилидә, кирип чиқиватқанларни назарәт қилип аптомобилиниң ичидә олтурған икән, уштумтут һуҗумға учрапту, қаршилиқ көрсәткән аламәтләрму йоқ икән, боғузлап өлтүрүлүпту.

Соал: нурмәмәмәт рози өзи ялғузмикән?
Җаваб: биллә вәзипә өтәватқанлардин бири мәсчитниң арқисида, йәнә бири янда турған икән, бир йәрдә турувелишқа болмайдиған болғачқа.

Соал: нурмәмәт розиниң хизмәт давамида башқиларни қақшатқан бир иши бармикән?
Җаваб: әдлийә понкитида дәрд аңлайдиған иш бар, аҗришиш вә мирас ишлири дегәндәк, адәм қақшитидиған иш йоқ. У сақчи аптомобили билән кәлгән болғачқа, униңда қорал бар дәп қарап, қорални булаш үчүн һуҗум қилған дегән пәрәз бар.

Соал: нурмәмәт розиниң йенида қорал бармикән?
Җаваб: униңда қорал йоқ икән. Гумандарлар имамлиримда вәқә чиқирип қечип йүргәнләрдин абдуллаһ абдуреһим билән сулайман тохти иккиси дәп гуман қилиниватиду вә қаттиқ издиливатиду, һазирғичә тутулмиди.

Юқириқи мәлуматлардин, бу йил 7-айниң 8-күни учтурпанниң имамлирим йезисида йүз бәргән 4 аилилик хитай йәр хоҗайинлирини өлтүрүш вәқәсиниң гумандарлиридин сулайман тохти билән абдуреһим абдуллаһниң техи тутулмиғанлиқи вә хитай һакимийитигә қарши күришини давамлаштуруватқанлиқи айдиңлашмақта.