Хотән шәһири йүзини япқан аяллар санини 0 гә чүшүрүш үчүн чарлаш хадимлирини көпәйтмәкчи

Йеқинқи йиллардин буян уйғур ели миқясида қаршилиқ наразилиқ һәрикәтлириниң күчийишигә әгишип, хитай даирилириниң һәр қайси дәриҗилик орунларда аманлиқ күчлири қошунини һәссиләп зорайтиватқанлиқи мәлум.

Йеңи йил кириши билән хотән шәһәрлик җамаәт хәвпсизлик идариси җәмийәттин бирақла 300 нәпәр аманлиқ қоғдиғучи вә чарлаш хадими қобул қилидиғанлиқи һәққидә уқтуруш тарқатти, хотән сақчи даирилиридин игилишимизгә қариғанда, хотән шәһиригә көпәйтилиш алдида турған бу аманлиқ күчлиригә даириләр “хотән шәһиридә йүзини япқан аяллар санини 0 гә чүшүрүш” ни асаслиқ вәзипә қилип йүклимәкчи икән.

Мәлум болғандәк йеқинда лоп наһийисиниң партком секретарлиридин хотән шәһириниң партком секретарлиқиға йөткәп келингән чен юәнхуа хотән шәһиридә хизмәт башлиши билән партийә, һөкүмәт кадирлириға 2014-йиллиқ хизмәт йиғини чақирип, йиғинда йеқинда хотән шәһиригә чарлаш аптомобилидин 10 ни әкәлгәнликини, булар мәхсус һеҗабланған, җилбаб кийим кийгән мусулман қиз-аялларни халиғанчә тутуп апирип дөләт аманлиқини қоғдаш идарисигә тапшуруп беридиғанлиқини әскәрткән һәмдә уларниң теги-тәктини сүрүштә қилип, бундақ кийимни кийишкә зади кимниң тәсир көрсәткәнликини ениқлап чиқидиғанлиқини ейтқан. У йәнә йил ахирғичә, хотән шәһәр ичидә йүзини йөгәйдиған бирму адәм қоймаймән дәп сөзлигән.

Йеңи йил кириши билән бу партком секретари хотәндики дохтурхана, аммиви қатнаш вә башқа һәр қандақ аммиви сорунлар вә һөкүмәт тармақлириниң иш беҗириш орунлирида бирдәк һеҗабланған, җилбаб кийгән аялларни қобул қилмаслиқ, мулазимәт қилмаслиқ һәмдә байқиған һаман шәхси учурини игиләп мунасивәтлик даириләргә йәткүзүшни мәзмун қилған уқтурушни тарқатқан иди.

Хотән валий мәһкимисиниң ториниң 2-январ тарқатқан уқтурушиға қариғанда, хотән шәһәрлик җамаәт хәвпсизлик идариси, 2500 сом мааш билән 300 нәпәр аманлиқ хадимини икки ай ичидә җиддий қобул қилидикән. Мәзкур хизмәтчи қобул қилиш еланида, толуқ оттуридин юқири сәвийидики, 35 яштин төвән болуш шәрти билән җәмийәттин аманлиқ қоғдаш вә чарлаш хадимлири қобул қилинидиғанлиқи көрситилгән.

Хотән сақчи даирилириниң бирақла 300 нәпәр аманлиқ хадимини көпәйтишигә сәвәб болған амилларни сорап көрүш үчүн, адәм қобул қилиш еланидики хотән шәһәрлик җамаәт хәвпсизлик идарисиниң номуриға телефон улидуқ, телефонни алған сақчи тәпсилий учур беришни рәт қилди:

Уйғур елида алий мәктәп пүттүргәнләрни хизмәткә орунлаштуруш баһанисидә һәр дәриҗилик җамаәт хәвпсизлик тармақлири вә мәһәллә иш комитетлириға қобул қилиниватқан сақчи вә чарлаш хадимлириниң даириләр тәрипидин асасән қанунсиз диний паалийәтләрни бастуруш, муқимлиқни қоғдаш баһанисидә өй ахтуруш вә коча чарлашқа охшаш вәзипиләргә орунлаштурулуватқанлиқи, болупму кочилардики сақал қойған әрләр вә йүзини япқан аялларни мәхсус нишан қилған қанунсиз тутқун қилишта йеңи хадимларни ишқа селиватқанлиқи мәлум., хотән шәһиридики сақчиханилардин игилигән мәлуматлиримиздинму, бу қетим хотәндә бир туташ қобул қилинидиған йеңи хадимларниңму мәхсус йүзини япқан аялларни нишан қилған чарлашқа орунлаштурулидиғанлиқи ашкариланди, йәни мәлум сақчиханиниң бир уйғур сақчиси йеңи қобул қилинғанларниң шәһиридики 11 сақчиханиға вә мәһәллә иш башқуруш орунлириға тарқақлаштурулуп, 24 саәт нөвәтлишип чарлашқа орунлаштурулидиғанлиқини вә буниң лоптин йөткилип кәлгән шуҗиниң йүзини япқан аяллар санини 0 чүшүрүш нишанини әмәлийләштүрүш үчүн икәнликини билдүрди.