Америка президенти обама хитайниң нөвәттики дин сияситини тәнқид қилғанда уйғурларни тилға алди

Америка президенти обама хитайниң нөвәттики дин сияситини тәнқид қилғанда уйғурларни тилға алған. 2014-Йили 6-феврал.

Бүгүн сәһәр, йәни 6-феврал күни америка президенти барак обама тилавәтчиләр үчүн вашингтонда өткүзүлгән дөләтлик наштилиқ зияпитидә сөз қилип уйғурларни алаһидә тилға алди.

Барак обама сөзидә хитай, иран вә шималий корейә қатарлиқ диктатор әлләрниң дин сиясити вә бу әлләрдики аз санлиқ милләтләрниң диний җәһәттә дуч келиватқан бесимлири үстидә мәхсус тохталған. У дуня миқясида етиқад әркинликини илгири сүрүшниң америкиниң ташқи сияситидики түп нишани икәнликини тәкитлигән.

Обама нутқида бейҗиң даирилирини өз територийәсидики һәр милләт хәлқиниң етиқад әркинликигә йол қоюшқа чақирған.

У мунуларни тәкитлигән: “тарих шуни көрсәттики, өз хәлқиниң һоқуқиға, болупму диний әркинликигә һөрмәт қилған дөләтләрниң тәрәққият йоли тинч вә мувәппәқийәтлик болуп кәлди. Хәлқниң бу муқәддәс һоқуқлирини дәпсәндә қилған дөләтләр өз қоли билән муқимсизлиқ вә зораванлиқниң уруқини териди. Шундақ дейәләймизки, диний әркинлик әмәлийәттә дөләт бихәтәрликимизниң түп асасидур.”

Обама 3500 киши қәдәм тәшрип қилған чоң залда хитайниң диний бесим сияситини әйиблигәндә мундақ дегән: “мән хитайниң иқтисадий тәрәққиятидики йошурун күчини давамлиқ сақлап қелишиниң әмәлийәттә униң өз територийәсидки хәлқләрниң негизлик һоқуқиға һөрмәт қилишиға бағлиқ икәнликини тәкитләп кәлдим. Бу йәнә өз нөвитидә хитайдики христиан муритлири, тибәтләр вә уйғур мусулманлириниң һоқуқлириниму өз ичигә алиду”

Америка президенти обаманиң хитай мәсилисидә уйғурларни алаһидә тилға елиши көзәткүчиләрниң диққитини чәккән. Бу мунасивәт билән дуня уйғур қурултийиниң рәиси рабийә ханим радиомиз зияритини қобул қилди вә пикир баян қилди.

Тәпсилатини аваз улиништин аңлиғайсиз.