Xoten tewesidiki ashxanilarning ramizan mezgilide normal tijaret qilishqa mejbur qilin'ghanliqi ashkara boldi

Muxbirimiz qutlan
2016.06.23
Share on WhatsApp
Share on WhatsApp
haraq-wiwiska-bay-nahiye.jpg Bay nahiyesining qizil yéza merkizidiki bir Uyghur ashxanisigha ésilghan alahide wiwiska. 2015-Yil awghust.
Social Media

Igilishimizche, bu yilliq ramizan bashlan'ghandin buyan, xoten tewesidiki musulmanche ashxanilarning normal tijaret qilishqa buyrulghanliqi, ashxana xojayinlirining kündüzde herqandaq seweb bilen ashxanini taqap qoyushigha bolmaydighanliqi uqturulghan.

Xitay hökümiti bu yilliq ramizan harpisida “Shinjangning diniy erkinlik ehwali” namliq aqtashliq kitab élan qilip, Uyghur aptonom rayonidiki musulmanlarning diniy étiqad erkinlikige toluq kapaletlik qilin'ghanliqini jakarlighan idi.

Halbuki, ramizan mezgilide Uyghur élidin élin'ghan neq meydan uchurliri da'irilerning mezkur aqtashliq kitabidiki bayanlirining chirayliq ibarilerge tolghan qeghez yüzidiki “Siyasiy teshwiqat” ikenlikini ashkara qilmaqta.

Biz radiyomizgha kelgen uchurlargha asasen xoten tewesidiki saqchixanilargha téléfon qilip, ramizan mezgilide eger ashxanilar tijarettin toxtisa ashxana igilirige jerimane qoyulidighan yaki qoyulmaydighanliqini sürüshtürduq.

Xoten qaraqashning aqsaray yéziliq saqchixanisi ziyaritimizni qobul qilghan bolsimu, emma ramizan mezgilide ashxanilargha bolghan cheklimining bar-yoqluqi heqqide uchur bérishtin özini qachurdi. Emma mezkur saqchi teweliktiki oqughuchilar bilen partiye ezalirining namaz oqush, roza tutush ishlirigha nisbeten özlirining her waqit diqqette turidighanliqini bildürdi.

Biz bu heqte yenimu ilgiriligen halda uchur igilesh üchün xoten shehiride olturushluq melum bir tijaretchige téléfon qilduq. U ziyaritimiz jeryanida xotendiki ashxanilarning ramizan mezgilide birdek tijaritini dawamlashturushqa uqturush qilin'ghanliqini, egerde ashxana igiliri tijarettin waqtinche toxtisa tijaret kinishkining tartiwélinip, ashxanisining péchetlinidighanliqini bildürdi.

Biz arqidin xoten wilayitining kériye nahiyesige qarashliq melum ottura mektepning ilmiy mudirigha téléfon qilduq. U téléfon ziyaritimiz jeryanida mektep oqughuchilirining ramizan mezgilide qattiq kontrol qiliniwatqanliqini, héchkimning jüme namizigha qatnishishigha we roza tutushigha yol qoyulmaydighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.