Axbaratqa chiqqandin kéyin acha-singil mehbuslarning perzentliri qismen “Ghemxorluq” qa érishken

Muxbirimiz shöhret hoshur
2016-07-04
Share
mehelle-oynap-yurgen-bala.jpg Kochida oynap yürgen qaraqsiz Uyghur balisi. 2013-Yili 8-noyabir, qeshqer.
AFP

Ötken ayda onsu nahiyisining chaghraq yézisidiki éli yasin we uning ikki singlisi roshen'gül yasin, arzugül yasinlarning atalmish qanunsiz diniy matériyallarni körgenliki üchün joriliri bilen birlikte yette yilliqtin késilgenliki radiyomiz teripidin ashkarilan'ghandin kéyin, bu ehwal washin'gton pochtisi qatarliq bir qisim xelq'ara axbarat wasitiliride xewer qilin'ghan idi. Yéqinda rayondiki ehwaldin xewerdar kishilerning radiyomizgha yetküzüshiche, acha-singil mehbuslarning ehwali axbaratqa chiqqandin kéyin alaqidar da'iriler mezkur üch a'ilining türme sirtidiki ezaliridin hal sorighan we nopussiz balilarni nopusqa, mektepsiz qalghanlarni mektepke orunlashturghan.

Ehwaldin xewerdar kishilerning mektup arqiliq radiyomizgha ashkarilishiche, onsu nahiyisining chaghraq we toxula yézisidiki aka we acha-singil mehbuslarning ehwali xelq'ara axbaratqa ashkarilan'ghandin kéyin, mezkur nahiyediki alaqidar da'iriler, mexsus xizmet guruppisi ewetip, yuqiriqi üch a'ilining türme sirtidiki ezaliri heqqide tekshürüsh élip barghan we bu tekshürüshning netijiside, ularning perzentliri atalmish ghemxorluqqa érishken. Biz bu uchurning toghra-xataliqini éniqlash üchün mezkur yézidiki bir kent sékrétarini ziyaret qilduq. U yuqirining orunlashturushi boyiche yéqinda bu a'ililerge ehwal sorap barghanliqi we ularning bir qisim qiyinchiliqlirini hel qilghanliqini bayan qildi. Uning déyishiche, hal sorash we tekshürüshtin kéyin yuqiri orunlarning orunlashturushi boyiche, mehbus éli yasinning nopussiz bir balisini nopusqa alghan, mektepsiz qalghan ikki balisini mektepke orunlashturghan.

Yene ehwaldin xewerdar kishining radiyomizgha ashkarilishiche, arzugül yasinning we hijret gumani bilen tutulghan gülmire isimlik mehbusning mektep yéshigha toshmighan baliliri eslide hökümet bashqurushidiki mexsus bir bala terbiyilesh ornida turuwatqan bolup, bu balilar yéqinda uruq-tughqanlirining, jümlidin bowisining we momisining qoligha qayturup bérilgen. Biz bu ehwalni éniqlash üchün munasiwetlik bir kent sékrétargha téléfon qilghinimizda, u, bu balilarning uruq-tughqanlirigha qayturulghanliqini delillidi.

Téléfon ziyaritimiz arqiliq igilen'gen uchurlardin, mezkur mehbus a'ile-tawabi'atlirining ehwalidiki bu kichikkine ijabiy özgirishning, ehwaldin xewerdar kishi dégendek, weqening axbaratqa chiqishi bilen munasiwiti bar-yoqluqi melum emes, emma mezkur özgirishning weqe axbaratqa ashkarilan'ghandin kéyin yüz bergenliki éniq. Biz oxshash bir netijining bashqa jaylardiki mehbus a'ililiridimu yüz bergen, bermigenlikini éniqlash üchün, mekit nahiyesige téléfon qilduq. Ötken yili ziyaritimizni qobul qilghan besh mehbus a'ile tawabi'ati weqening axbaratqa chiqishining özlirige héchqandaq ijabiy yaki selbiy tesiri bolmighanliqini, peqet resim ewetküchige 5000 som jerimane qoyulghanliqini, bu jerimanini besh mehbus a'ilisining öz-ara hemkarliship töliwetkenlikini ashkarilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet