Лоп чарбағдики монәк мәсчити кәнтниң көңүл ечиш паалийәт өйигә өзгәртилмәктә

Уйғур районида өткән йилниң оттура -ахирлири башланған “мәсчитләрни әлалаштуруш” нами астидики мәсчитләрни қисқартиш һәрикити бу йилму давам қилмақта.

Мәлум болушичә, мәзкур һәрикәт давамида бәзи мәсчитләр чеқиветилгән болса, бәзилири қулупланған, йәнә бәзилири болса, башқа хил паалийәт сорунлириға өзгәртилмәктә.

Өткән йилқи ениқлашлиримиз давамида қәшқәр тоққузақта вә хотән қарақашта көп сандики мәсчитләрниң чеқилғанлиқи ашкариланған иди. Биз бүгүн лоп наһийәсиниң чарбағ йезисидин әһвал ениқлишимиз давамида, мәсчитләрни әлалаштуруш нами астидики мәзкур һәрикәтниң техичә давамлишиватқанлиқи ашкариланди.

Мәлум болушичә, арамәһәллидики монәк мәсчит дәп атилидиған бир мәсчит, етиқадчи амминиң ирадиси вә диний һессиятиға зит һалда, көңүл ечиш соруниға өзгәртилмәктә. Мәдәнийәт паалийәт өйи дәп нам берилгән бу орунда буниңдин кейин, йиғин вә көңүл ечиш паалийәтлири өткүзүлиду. Әсәбийликкә қарши тәшвиқат долқунида тәшкилләнгән 15 кишилик деһқан сәнәт өмики, бу орунда нахша, усул вә танса өгитиду. Бу мәсчитниң нөвәттә меһраблири чеқилип болған, пәқәт безәк ишлири давамлашмақта.

Бүгүн америкада яшаватқан сиясий көзәткүчи, доктор қаһар барат әпәнди, арамәһәллидики монәк мәсчитниң көңүл ечиш соруниға айландурулуши һәққидә пикир баян қилди. Униң билдүрүшичә, бу ялғуз диний етиқадқа һөрмәтсизлик әмәс, бәлки диний етиқадни дәпсәндә қилиш.

Қаһар барат әпәнди йәнә, хитайниң мәдәнийәт инқилабий дәврдә мәмликәт миқясида иҗра қилған диний етиқадқа қарши һуҗумни әмдиликтә уйғур районида әйни шәкил вә салмақта тәкрарлаватқанлиқини баян қилди. Хитайниң бу қилмишни аталмиш диний әсәбийликни түгитиш мәқситидә иҗра қиливатқанлиқини тилға алған қаһар барат әпәнди, инсанниң қәлбидә йилтиз тартқан етиқадни бу зораванлиқ йоли билән йоқитишниң мумкинсизликини тәкитлиди. Униң қаришичә, әслидә хитайниң бастуруш сиясити нәтиҗисидә уйғурларда кәң омумлашқан вә чоңқурлашқан диний етиқад, бу хил иҗраатларниң түрткисидә техиму чоңқур йилтизи тартиши вә мустәһкәмлиниши мумкинки, хитай күткәндәк аҗизлаш болуши мумкин әмәс.