Uyghur pa'aliyetchiler: xitayning ISIS ni bahane qilip, Uyghurlargha dawamliq buzghunchiliq qilish éhtimalliqi zor

Nöwette, amérika keng xelq'ara ittipaq teshkillep, ISIS iraq-sham islam dölitige qarshi heriketke ötti. Amérikining pilani xitayni öz ichige alghan keng xelq'ara ittipaq qurup, mezkur radikal guruhqa qarshi qoyush.

Aqsarayning dölet xewpsizlik meslihetchisi suzan rayis, xitaygha qilghan ziyaritide bu mesilini otturigha qoyup, xitayni ISIS qa qarshi turushqa ündigen. Xitay özining bu mesilidiki pozitsiyisini hazirgha qeder ashkarilimighan bolsimu, biraq u buninggha ijabiy signal bermekte.

“Washin'gton pochta géziti” ning ashkarilishiche, bir amérika emeldari, amérika-xitay emeldarlirining qandaq hemkarliq élip bérishni dawamliq muzakire élip bériwatqanliqini bildürgen. Lékin, xitayning ISIS qa qarshi xelq'ara ittipaqqa qatnishish yaki melum shekilde amérika bilen hemkarliq élip bérishi, bezi Uyghur pa'aliyetchilirini endishige salghan. Ularning körsitishiche, xitay “11‏-Séntebir weqesi” ni bahane qilip, Uyghurlarni basturghandek, ISIS qa qarshi turushni bahane qilip, Uyghurlarni dawamliq basturushi mumkin.

Bu toghriliq muxbirimiz erkin amérikida olturushluq musteqil pa'aliyetchi, weziyet analizchisi memet toxti ependi bilen söhbet élip bardi.