Қошнисиниң җедилини айриған зәйтунхан исмаил диний әсәбийлик гумани билән лагерға әкетилгән

Мухбиримиз шөһрәт һошур
2021-05-20

Турпанға селинған мәлум "қайта тәрбийәләш мәркизи".

Social Media

Орун: турпанниң чатқал йезиси, вақит: 2020 ‏-йили 1-ай; 67 яшлиқ зәйтунхан исмаил қошна аилидин чиқиватқан әнсиз авазни аңлап өйидин чиқиду вә қошнисиниң өйигә кирип, еғираяғ аяли билән җедәллишиватқан мәст әргә нәсиһәт қилиду вә җедәл бесиқиду. Мәлум болушичә, бу иштин қошниси рази, өзи рази, мәһәллә кой рази; әмма даириләр рази әмәс; шуңа сақчилар зәйтунхан исмаилни бир йил бурунқи бу иш сәвәблик, диний әсәбийлик гумани билән, буниңдин 4 ай аввал бешиға қара халта кийдүрүп лагерға елип кетиду. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Турпанға қарита елип барған телефон зиярәтлиримиз давамида, чатқал йеза сақчиханисида хизмәт қиливатқан бир хадим, өзи мәсул кәнттин йеқинда тутулғанлар арисида, зәйтунхан исмаил исимлик 67 яшлиқ бир аялниңму барлиқи, униң мәст қошнисиниң җедилини айриғанлиқи үчүн диний әсәбийлик гумани билән тутулғанлиқини ашкарилиди. Мәлум болушичә, зәйтунхан исмаил мәһәллидики юрт чоңи анилардин бири болуп; у йиллардин бери мәһәллиниң той-төкүн, өлүм йетим ишлириға йетәкчилик қилип кәлгәникән. Йиллардин бери униң бу паалийәтлири сәвәблик җәмийәт тинчлиқи вә муқимлиқ үчүн төһпә қошуш дәп қарилип кәнт аһалиләр комитетиниң риғбәтләндүрүшигә еришип кәлгәникән. Зәйтунхан исмаил, бу нөвәттә қошнисиниң өйидики җедәлни аңлиғинида, бурунқиға охшашла юрт чоңилиқ һәм қошнидарчилиқ мәсулийәт туйғуси билән маҗираға арилашқан. Әмма бу қетим даириләр униң бу қилғинини, йәни мәст қошнишисини болса һарақни ичмәслик, болмиғанда аз ичишкә буйруши, мәһәллә тинчилиқи үчүн хизмәт қилиш әмәс бәлки кишиләрни һарақтин тосуш дәп қариған вә бу һарақтин тосуш диний әсәбийликниң аламити дәп бекитилгән.

Илгирики ениқлашлиримиз давамида, йеңисарда 70 нәччә яшлиқ бир киши 13 йилниң алдида өзиниң мәст оғлини әйиблигәнлики йәни һарақтин тосқанлиқи үчүн диний әсәбийлик билән әйибләнгән вә 10 йиллиқ кесиветилгәниди. 2016‏-Йили хотәндә бир кәнт кадири бир диний затниң алдида чекиватқан тамакисини йошурғанлиқи үчүн, дини әсәбийликкә қарши мәйдани қәтий болмаслиқ билән әйиблинип вәзиписидин елип ташланған вә бу вәқә хитайниң өз ахбарат васитилири арқилиқ хәлқара ахбаратқа тарқалғаниди.

Мәзкур алақидар хадимниң баян қилишичә, зәйтунхан исмаил, йәнә мәһәллидики тәҗрибилик мейит юйғучи аяллардин болуп, у бу хизмити сәвәбликму илгири даириләрниң риғбәтләндүрүшигә еришип кәлгәникән; әмма бу қетимқи тутулушида, униң мейит ююш иши сәвәблик сораққа тартилип тартилмиғанлиқи һазирчә мәлум әмәс.

Юқирида, турпан чатқалда 67 яшлиқ зәйтунхан исмаил исимлик аялниң мәст қошнисини һарақтин тосқанлиқи үчүн диний әсәбийлик билән әйиблинип лагерға соланғанлиқи һәққидә мәлумат бәрдуқ.