Ikki balisi we bir qoshnisigha diniy sawat bergen seylixan rozi 17 yilliq késiwétilgen
2024.12.27

“Konasheher saqchi arxipliri” da sattar qadir we yüsüp'exmet qadir isimlik aka-ukining qanunsiz diniy telim alghanliqi üchün 7 we 10 yilliqtin késilgenliki hemde bu qanunsiz telimni anisi seylixan rozining bergenliki qeyt qilin'ghan. Arxipta seylixan rozining tutqunda ikenliki bayan qilin'ghan bolsimu, yil késimi heqqide melumat bérilmigen. Muxbirimizning bu heqtiki éniqlashliri dawamida seylixan rozining bir qoshnisighimu 3 kün “Qanunsiz diniy telim bérishi” qétilip jem'iy 17 yilliq késiwétilgenliki delillendi.
Mezkur arxipta, sattar qadir we yüsüp'exmet qadir aka-ukining anisidin “Qanunsiz diniy terbiye” ni 2004-we 2008-yilliri arisida alghanliqi, anisi seylixan rozining bulardin bashqa qoshnisi yaqup hidayetkimu 2006-yili 6-ayda 3 kün “Qanunsiz diniy telim” bergenliki xatirilen'gen. Tutqunda ikenliki bayan qilin'ghan seylixan rozining nöwettiki ehwalini, yeni uning “Jinayet” lirining jazasining qandaq bolghanliqini éniqlash üchün, biz qeshqer konasheherdiki alaqidar organ we shexslerge téléfon qilduq.
Téléfonimizni qobul qilghan, emma özini ashkarilashni xalimighan bir xadim, “Qanunsiz diniy pa'aliyet” seweblik késilgen seylixan rozini eslide konasheherning saybagh yézisigha nopusluq ikenlikini ashkarilidi. Biz bu xadim teminligen alaqe uchurlirigha asasen, saybagh yézisidiki mezkur délogha mes'ul saqchi xadimigha téléfon qilduq. Bu xadim seylixan rozining ikki oghlining 7 we 13 yilliq késilgenliki, késilish sewebining bolsa anisidin “Qanunsiz diniy telim” élish ikenlikini delillidi. Emma seylixan rozining aqiwiti heqqide melumat bermidi. Délogha qol tiqqan yene bir xadim, seylixan rozining qoshnisi yaqup hidayetkimu “Qanunsiz diniy telim” bergenliki we “Yer asti diniy oqutush” qilmishi seweblik jem'iy 17 yilliq késilgenlikini ashkarilidi.
Nöwette türkiyediki bir alyumin zawutida inzhénér bolup ishlewatqan 22 yashliq nur'eli nuraxunmu dadisi uni 2015-yili 9-ayda misirgha oqushqa ewetkenliki we 3 aydin kéyin yurtidiki tonushliridin birining 12 yashliq balisinimu misirgha oqushqa élip chiqqanliqi üchün, yurtigha qaytqinida 21 yilliq késiwétilgenliki heqqide guwahliq bergen idi. Yene shu chaghdiki éniqlashlirimizda, bir perzentini “Qanunsiz dinda oqutqan” larning 7 yilliqtin késiliwatqanliqi, ghulja nahiyesining qarayaghach yézisida 20 yil burun 3 balisini qur'an kursigha bergen ayshemxan abdullaning 21 yilliq késilgenliki delillen'gen idi.
Yuqirida ikki balisigha we bir qoshnisigha diniy telim bergen seylixan rozining 2017-yilining béshida tutqun qilinip 2018-yilining axiri 17 yilliq késilgenliki heqqide melumat berduq.