Франсийәдики “азатлиқ” гезити долқун әйсаниң тәрҗимиһалини елан қилди

Ихтиярий мухбиримиз әкрәм
2021-09-13
Share
Франсийәдики “азатлиқ” гезити долқун әйсаниң тәрҗимиһалини елан қилди Дуня уйғур қурултийиниң рәиси долқун әйса америка парламент бинасида AFP билән сөһбәтләшмәктә. 2019-Йили 4-июн, вашингтон.
AFP

Франсийәниң мәшһур гезитлиридин бири болған “азатлиқ” гезити “уйғур сот коллегийәси” ниң 2-қетимлиқ гуваһлиқ аңлаш йиғини башланған 10-сентәбир күни д у қ рәиси долқун әйса әпәндиниң тәрҗимиһалини асасий мәзмун қилған “долқун, тамниң йәнә бир тәрипидә” намлиқ узун бир мақалини елан қилди.

Мақалә төвәндикидәк җүмлиләр билән башланған: “лондунда уйғурларниң әдлийә исхимиси сизилмақта. ‛уйғур сот коллегийәси‚ җүмә күни иккинчи қетимлиқ испат аңлаш йиғинини башлиди. Мәқсәд: давам қиливатқан зораванлиқ вә ирқий қирғинчилиқниң дәлиллирини көздин көчүрүш иди. Хәлқниң садаси, һәқиқий әйибләшниң башлиниш нуқтиси болалайду”. “оқуғучилар һәрикитиниң бу сабиқ рәһбири 1985-йилидин етибарән шинҗаңдики хәлқләрниң һәқ-һоқуқи үчүн көрәшлирини башлиған иди. Хитай тәрипидин ‛террорист‚ лиқ тамғиси бесилған бу киши, миюнхенда сүргүндә яшаватқан мәзгиллиридә туғқанлириниң тутқун қилинғанлиқ вә қаза қилғанлиқ хәвирини аңлиған.”

Мақалидә хитай һакимийитиниң долқун әйса үстидин хәлқара сақчи (интерпол) да тутуш буйруқи чиқирип барлиқ дөләтләрниң қанун иҗра қилиш органлириға йоллиғанлиқи, бу буйруқниң долқун әйсани көплигән аваричилиқларға гириптар қилғанлиқи, гәрчә 2018-йили интерпол бу буйруқни әмәлдин қалдурған болсиму, әмма долқун әйсаниң һелиһәм хитайниң көзигә қадалған миққа айланғанлиқи тилға елинған.

Франзсузчини яхши билидиған уйғур зиялилиридин зумрәтай ханим бу һәқтә тохталғанда, мақалидә долқун әйсаниң һаят кәчмишлириниң тәпсилий вә тәсирлик баян қилинғанлиқини әскәртти. Мәзкур мақалини оқуған франсийәдики уйғур зиялийси әкбәр әпәндиму мәзкур мақалә һәм д у қ рәиси долқун әйса һәққидә өзиниң қарашлирини баян қилип өтти.

Мақалидә долқун әйсаниң туғулған вә өсүп чоң болған мәзгиллиридин тартип таки 1984-йили алий мәктәпкә оқушқа киргәнлики, 1985-йилидики үрүмчидә йүз бәргән алий мәктәп оқуғучилириниң тунҗи намайишиға қатнашқанлиқи, 1988-йили намайиш уюштуруп сораққа тартилғанлиқи һәм мәктәптин қоғланғанлиқи, 1994-йили вәтәнни тәрк етип түркийәгә һиҗрәт қилғанлиқи, 1996-йили германийәгә келип сиясий панаһлиқ тилигәнлики, бу җәрянда йүз бәргән вәқәләр һәмдә долқун әйсаниң хәлқаралиқ мәшһур сотчиларни “уйғур сот коллегийәси” ни қурушқа қайил қилғанлиқи қатарлиқлар тәпсилий баян қилинған иди.

“уйғур сот коллегийәси” ниң 2-қетимлиқ гуваһлиқ аңлаш йиғиниға мутәхәссис һәм гуваһчи сүпитидә қатнашқан д у қ ниң баш тәптиши абдулһәким идрис әпәнди бу хусуста тохталғанда, мәзкур мақалиниң болупму уйғурлар мәсилисигә һөкүмәт намидин йетәрлик дәриҗидә аваз чиқармайватқан франсийәдә вә франсийәдики даңлиқ гезитләрдин бири болған “азатлиқ” гезитидә елан қилинғанлиқиниң яхши иш болғанлиқини баян қилди. Д у қ рәиси долқун әйса әпәндиму бу һәқтә қисқичә тохтилип өтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт