Fransiyediki "Azatliq" géziti dolqun eysaning terjimihalini élan qildi

Ixtiyariy muxbirimiz ekrem
2021-09-13
Share
Fransiyediki Dunya Uyghur qurultiyining re'isi dolqun eysa amérika parlamént binasida AFP bilen söhbetleshmekte. 2019-Yili 4-iyun, washin'gton.
AFP

Fransiyening meshhur gézitliridin biri bolghan "Azatliq" géziti "Uyghur sot kollégiyesi" ning 2-qétimliq guwahliq anglash yighini bashlan'ghan 10-séntebir küni d u q re'isi dolqun eysa ependining terjimihalini asasiy mezmun qilghan "Dolqun, tamning yene bir teripide" namliq uzun bir maqalini élan qildi.

Maqale töwendikidek jümliler bilen bashlan'ghan: "Londunda Uyghurlarning edliye isximisi sizilmaqta. 'Uyghur sot kollégiyesi' jüme küni ikkinchi qétimliq ispat anglash yighinini bashlidi. Meqsed: dawam qiliwatqan zorawanliq we irqiy qirghinchiliqning delillirini közdin köchürüsh idi. Xelqning sadasi, heqiqiy eyibleshning bashlinish nuqtisi bolalaydu". "Oqughuchilar herikitining bu sabiq rehbiri 1985-yilidin étibaren shinjangdiki xelqlerning heq-hoquqi üchün köreshlirini bashlighan idi. Xitay teripidin 'térrorist' liq tamghisi bésilghan bu kishi, miyunxénda sürgünde yashawatqan mezgilliride tughqanlirining tutqun qilin'ghanliq we qaza qilghanliq xewirini anglighan."

Maqalide xitay hakimiyitining dolqun eysa üstidin xelq'ara saqchi (intérpol) da tutush buyruqi chiqirip barliq döletlerning qanun ijra qilish organlirigha yollighanliqi, bu buyruqning dolqun eysani köpligen awarichiliqlargha giriptar qilghanliqi, gerche 2018-yili intérpol bu buyruqni emeldin qaldurghan bolsimu, emma dolqun eysaning hélihem xitayning közige qadalghan miqqa aylan'ghanliqi tilgha élin'ghan.

Franzsuzchini yaxshi bilidighan Uyghur ziyaliliridin zumret'ay xanim bu heqte toxtalghanda, maqalide dolqun eysaning hayat kechmishlirining tepsiliy we tesirlik bayan qilin'ghanliqini eskertti. Mezkur maqalini oqughan fransiyediki Uyghur ziyaliysi ekber ependimu mezkur maqale hem d u q re'isi dolqun eysa heqqide özining qarashlirini bayan qilip ötti.

Maqalide dolqun eysaning tughulghan we ösüp chong bolghan mezgilliridin tartip taki 1984-yili aliy mektepke oqushqa kirgenliki, 1985-yilidiki ürümchide yüz bergen aliy mektep oqughuchilirining tunji namayishigha qatnashqanliqi, 1988-yili namayish uyushturup soraqqa tartilghanliqi hem mekteptin qoghlan'ghanliqi, 1994-yili wetenni terk étip türkiyege hijret qilghanliqi, 1996-yili gérmaniyege kélip siyasiy panahliq tiligenliki, bu jeryanda yüz bergen weqeler hemde dolqun eysaning xelq'araliq meshhur sotchilarni "Uyghur sot kollégiyesi" ni qurushqa qayil qilghanliqi qatarliqlar tepsiliy bayan qilin'ghan idi.

"Uyghur sot kollégiyesi" ning 2-qétimliq guwahliq anglash yighinigha mutexessis hem guwahchi süpitide qatnashqan d u q ning bash teptishi abdulhekim idris ependi bu xususta toxtalghanda, mezkur maqalining bolupmu Uyghurlar mesilisige hökümet namidin yéterlik derijide awaz chiqarmaywatqan fransiyede we fransiyediki dangliq gézitlerdin biri bolghan "Azatliq" gézitide élan qilin'ghanliqining yaxshi ish bolghanliqini bayan qildi. D u q re'isi dolqun eysa ependimu bu heqte qisqiche toxtilip ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet