Долқун әйса: «хитай мениң дадамниң қачан вә қандақ өлгәнликини ашкарилисун»

Мухбиримиз ирадә
2020-01-14
Елхәт
Пикир
Share
Принт
Д у қ рәиси долқун әйса әпәндиниң дадиси әйса мәмәт билән мәрһум аниси айхан мәмәт. (Вақти вә орни ениқ әмәс) әйса мәмәт әпәнди һазир 95 яш болуп, униң нәдә икәнлики вә саламәтлик әһвали ениқ әмәс.
Д у қ рәиси долқун әйса әпәндиниң дадиси әйса мәмәт билән мәрһум аниси айхан мәмәт. (Вақти вә орни ениқ әмәс) әйса мәмәт әпәнди һазир 95 яш болуп, униң нәдә икәнлики вә саламәтлик әһвали ениқ әмәс.
Social Media

10-январ күни хитайниң һөкүмәт гезити болған «йәршари вақти гезити» тәрипидин «шинҗаң бөлгүнчилириниң туғқанлири уларниң ялғанчилиқини әйиблиди» мавзулуқ мақалисидә уйғур рәһбәрлиридин «хәлқара уйғур кишилик һоқуқ-демократийә фонди» ниң рәиси рабийә қадир ханим вә дуня уйғур қурултийи рәиси долқун әйса әпәндиләргә һуҗум қилған. Униңда илгири сүрүлүшичә, 10-январ йәкшәнбә күни шинҗаң уйғур аптоном районлуқ учур-ахбарат ишханисиниң баянатчиси гүли аблим ахбаратчиларни күтүвелиш йиғини өткүзгән вә мухбирларға долқун әйса вә рабийә қадирларниң туғқанлири билән өткүзүлгән зиярәт хатирисини көрситиш арқилиқ, уларниң ялғанчилиқ қиливатқанлиқини илгири сүргән.

«Йәршари вақти гезити» хәвиридә, долқун әйса әпәндиниң ачиси арзугүл инисини әйибләп: «бизниң ата-анимиз қерилиқтин вә кесәлликтин өлүп кәткән, бирақ мениң иним уни чәтәлдә туруп шинҗаңни қарилаш үчүн қоллинипту» дегәнликини илгири сүргән.

Долқун әйса әпәнди бүгүн радийомизға қилған сөзидә өзиниң әйни чағда анисиниң лагерда җан үзгәнликини хәлқара ахбаратлардин уққанлиқини, бу учурниң әркин асия радийоси тәрипидин дәлилләнгән бир учурлиқини ейтип, хитайниң юқиридики әйибләшлирини рәт қилди.

Долқун әйса әпәндиниң ейтишичә, әйни чағда у пәқәт анисиниң өлүмидин хәвәр тапқан. Әмма дадисиниң ақивитидин һечқандақ хәвәр алалмиған. Бирақ, «йәршари вақти гезити» дин орун алған ачисиниң сөзидә «ата-анимиз қерилиқтин вә кесәлликтин өлүп кәтти» дейилиши уни һәйран қалдурған.

У, «һазирқидәк бир дәврдә мән дадамниң өлүк яки тирикликиниму биләлмәй, уни хитайниң гезитидин аңлаватимән» деди. Долқун әйса «йәршари вақти гезити мениң дадамниң қачан вә немә сәвәбтин өлүп кәткәнликини ашкарилисун» деди.

«Йәршари вақти гезити» рабийә қадир ханим вә долқун әйсаларға бирла вақитта һуҗум қилған бу мақалисидин кейин гәрчә рабийә қадир ханимниң аилиси көрситилгән видийони тивиттир арқилиқ чәтәлләргә тарқатқан болсиму, әмма долқун әйса әпәндиниң ачиси арзугүл долқунниң юқирида илгири сүрүлгәндәк сөзни қилғанлиқи һәққидики видийони тарқатмиған иди. Долқун әйса әпәнди өзиниң һазир ачиси вә башқа қериндашлириниң бихәтәрликидин қаттиқ әндишә қиливатқанлиқини ейтти. У, хитай һөкүмити мениң уруқ-туғқанлиримниң һәммисини көрсәтсун, деди.

Дуня уйғур қурултийиму вәқәдин кейин баянат елан қилип, хитай һөкүмитиниң йеқиндин буян дуня уйғур қурултийи һәм шундақла униң рәиси долқун әйсаға қаратқан қарилаш вә тәһдит характерлик һуҗумлирини күчәйткәнликини тәнқид қилди вә: «бундақ тәһдитләр дуня уйғур қурултийиниң шәрқий түркистанда зулум көрүватқан уйғурлар үчүн қиливатқан давасиға тосалғу болалмайду» дәп тәкитлиди.

Чәтәлләрдики кишилик һоқуқ көзәткүчилири болса мушу хилдики видийоларда сөзлүтиливатқан кишиләрниң әмәлийәттә хитай һөкүмитиниң «мәҗбурий сөзлитиш, мәҗбурий иқрар қилдуруш» һәрикитиниң зиянкәшликигә учриғучилар икәнликини тәкитлиди.


Пикирләр (0)
Share
Толуқ бәт