Yawropa ittipaqi aldida 1-öktebir ötküzülidighan namayishning teyyarliq xizmetliri tamamlan'ghan

Ixtiyariy muxbirimiz erkin tarim
2019.09.27
yawropa-ittipaqi-biryusel-namayish.jpg Yawropa ittipaqi bilen xitayning aliy derijilikler uchrishishi yighini mezgilide ötküzülgen Uyghur, tibet we xelq'ara kishilik hoquq organlirining naraziliq namayishidin körünüsh. 2019-Yili 9-aprél, biryussél, bélgiye.
RFA/Ekrem

1-Öktebir küni yawropa ittipaqi aldida ötküzülidighan chong namayishqa bir qanche kün waqit qaldi. Dunya Uyghur qurultiyi bu namayishning ghelibilik ötküzülüshi üchün “Teyyarliq komitéti” qurup chiqqan bolup, qanche onlighan Uyghur siyasiy aktipliri we Uyghur teshkilatliri bu namayish üchün birqanche aydin buyan teyyarliq xizmetliri bilen aldirash bolghan.

Namayishning teyyarliq xizmitige mes'ul bolghan d u q ning re'isi dolqun eysa ependining bildürüshiche, bu qétimqi namayishning teyyarliq xizmetliri asasiy jehettin pütken. Namayishchilarning bixeterlikige kapaletlik qilish üchün d u q re'isi dolqun eysa ependi biryussélda jiddiy teyyarliq xizmetliri bilen shughullan'ghanliqini, bu xizmetlerning asasen tamamlighanliqini bayan qildi. 

D u q teminligen uchurlargha asaslan'ghanda, 1-öktebir yawropa parlaménti aldida ötküzülidighan namayishqa gérmaniye, en'gliye, firansiye, norwégiye, finlandiye, gollandiye, shiwétsiye, shwétsariye, awstriye, qatarliq döletlerdin minglighan Uyghurlar kélip qatnishidiken.

Bulardin sirt xitayning mustemlikisi astida yashawatqan tibet, mongghul we xongkongluqlarmu bu namayishqa qatnishidiken hemde xitayning 70 yildin buyan élip bériwatqan bésim siyasetlirige naraziliq bildüridiken. D u q re'isi dolqun eysa ependi bu heqte tepsiliy melumat bérip ötti. 

Dolqun eysa ependi namayishqa yawropa parlaméntining ezaliri we herqaysi döletlerdiki ammiwi teshkilatlarning mes'ulliriningmu qatniship nutuq sözleydighanliqini, shunglashqa barliq Uyghurlarning aktipliq bilen qatnishishi kéreklikini tekitlep ötti.

1-Öktebir küni biryussélda ötküzülidighan namayishning teyyarliq xizmitini qiliwatqan bélgiye Uyghur jem'iyitining re'isi yashar ependim ziyaritimizni qobul qilip, namayishning teyyarliq xizmetlirining asasiy jehettin tamamlan'ghanliqini bayan qildi. 

Yashar ependi namayishning 1-öktebir küni chüshtin burun sa'et 11:00 din chüshtin kéyin sa'et 3:00 kéche dawamlishidighanliqini bayan qildi. 

Yashar ependi namayishning bixeter ötküzülüshi üchün namayishqa qatnashqanlar diqqet qilishqa tégishlik ishlar toghrisidimu toxtilip ötti. 

2018-Yili 4-ayning 27-küni bélgiye paytexti biryusséldiki yawropa parlaménti aldida Uyghurlarning 5 ming kishilik namayishi ötküzülgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.