Д у қ ниң 20 йиллиқ мусаписи: меһнәтләр вә нәтиҗиләр

Берндин ихтиярий мухбиримиз һәбибулла изчи тәйярлиди
2024.05.04
DUQ-20-Yilliq-Xatirilesh-2-Kuni-H2.jpg Д у қ қурулғанлиқиниң 20 йиллиқини хатириләш паалийитиниң тунҗи мәйдан муһакимә мунбири. 2024-Йили 3-май, мюнхен.
RFA/Hebibulla Izchi

 Д у қ ниң қурулғанлиқиниң 20 йиллиқ хатирә күни мунасивити билән германийәниң мийонхен шәһридә 3- майдин башлап ечиливатқан хатириләш паалийитидики бир муһим нуқта дуня уйғур қурултийи ( д у қ)  дуняға кәлгән 20 йилдин буян униңға сиңдүрүлгән меһнәтләр һәмдә буниңға яриша қолға кәлгән нәтиҗиләргә қарап чиқиш болди. Бу һал өз нөвитидә бу қетимқи паалийәтниң ечилиш мурасимидин кейин өткүзүлгән тунҗи мәйдан муһакимә мунбириниң баш темиси болди. 

3-Майдики ечилиш мурасиминиң бир муһим мәзмуни явропа уйғур ансамбелиниң орунлишида йиғин иштиракчилириға уйғур сәнити вә униң гүзәлликини тәқдим қилиш болди.  Мурасим салони дуняниң һәр қайси тәрәплиридин кәлгән йиғин иштиракчилири билән лиқ толған болуп, явропа уйғур ансамбилидин мухтар абдукерим җанбазниң дуттар билән орунлиған җәңгивар нахшилири мурасим салонини ләрзигә салди.

Д у қ қурулғанлиқиниң 20 йиллиқини хатириләш паалийитиниң тунҗи мәйдан муһакимә мунбиридин көрүнүш.  2024-Йили 3-май, мюнхен.
Д у қ қурулғанлиқиниң 20 йиллиқини хатириләш паалийитиниң тунҗи мәйдан муһакимә мунбиридин көрүнүш. 2024-Йили 3-май, мюнхен.

Сәнәт номурлирини тәқдим қилиштин кейин уйғур кишилик һоқуқ қурулушиниң хадимлиридин луиса грев ханимниң риясәтчиликидә тунҗи мәйдан муһакимә өткүзүлди. Муһакимә иштиракчилиридин  америка хәлқара диний әркинлик комитетиниң комиссари нури түркәл, д у қ рәиси долқун әйса вә америка һөкүмитиниң б д т да турушлуқ сабиқ баш әлчиси келлий куррилар айрим-айрим сөз қилип, д у қ бесип өткән 20 йиллиқ мусаписини қисқичә әсләп өтти.

Америка һөкүмитиниң б д т да турушлуқ сабиқ баш әлчиси келлий курри муһакимә мунбиридә сөз қилмақта. 2024-Йили 3-май, мюнхен.
Америка һөкүмитиниң б д т да турушлуқ сабиқ баш әлчиси келлий курри муһакимә мунбиридә сөз қилмақта. 2024-Йили 3-май, мюнхен.

Шу қатарда д у қ ниң рәиси долқун әйса сөз қилип, қурултай қурулғандин буян өзлири дүч кәлгән түрлүк қийинчилиқлар һәмдә уларни түгитиш тиришчанлиқлирини қисқичә әсләп өтти. Униң қаришичә, қурултай дәсләп қурулған вақитларда хәлқарада һечқандақ тәсири вә орни болмиған бир тәшкилат болған болса, һазир б д т вә явропа парламентлирида орни болған, шуниңдәк хәлқарада  етирап қилинған символлуқ бир органға айланған.

Бу мунасивәт билән америка хәлқара диний әркинлик комитетиниң комиссари нури түркәл зияритимизни қобул қилди. У өзиниң қурултай дуняға кәлгәндин буян һазирғичә бесип ‍өткән барлиқ мусапилиригә шаһит болуш җәрянида көргәнлири, шуниңдәк қурултайниң үч әвлат рәһбәрлириниң охшимиған басқучлардики тиришчанлиқлири һәмдә нөвәттики нәтиҗиләр һәққидә ойлиғанлирини радийо аңлиғучилар билән ортақлашти.

Америка хәлқара диний әркинлик комитетиниң комиссари нури түркәл муһакимә мунбиридә сөз қилмақта. 2024-Йили 3-май, мюнхен.
Америка хәлқара диний әркинлик комитетиниң комиссари нури түркәл муһакимә мунбиридә сөз қилмақта. 2024-Йили 3-май, мюнхен.

Сөһбәт арилиқида явропа уйғур ансамбелиниң артистлири қатнашқучиларға долан уссулини тәқдим қилди. Паалийәт зали дуняниң һәр тәрпидин кәлгән қатнашқучиларниң уйғур нахша-уссулиға чалған гүлдүрас  алқишлири билән ләрзигә кәлди.

Муһакимә мунбири арилиқида явропа уйғур ансамбилиниң артислири қатнашқучиларға долан уссулини тәқдим қилди.  2024-Йили 3-май, мюнхен.
Муһакимә мунбири арилиқида явропа уйғур ансамбилиниң артислири қатнашқучиларға долан уссулини тәқдим қилди. 2024-Йили 3-май, мюнхен.

Бу қетимқи ечилиш мурасими уйғурчә сәнәт паалийәтлиригә җөр болған депломатлар вә сиясийонларниң нутуқлири билән наһайити җанлиқ кәйпиятта давам қилди.  Мурасим ахирида дулқун әйса явропа уйғур ансамбили, германийә маарип вә мәдәнийәт бирлики қатарлиқ орунларниң әзалириға гүлдәстә тәқдим қилди. Бу қетимқи паалийәтниң башқа мәзмунлири тоғрисида радийомиз давамлиқ хәвәрләр бериду.  

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.