D u q re'isi chéxiye paytexti praga shehride pa'aliyet élip barmaqta

Ixtiyariy muxbirimiz ekrem
2021-10-12
Share
D u q re'isi chéxiye paytexti praga shehride pa'aliyet élip barmaqta D u q re'isi chéxiye paytexti praga shehiride pa'aliyet élip barmaqta. 2021-Yili 12-öktebir.
RFA/Ekrem

"Uyghur irqiy qirghinchiliqi" ni étirap qilghan chéxiye hökümiti d u q xadimlirini "Munber 2000" yighinigha teklip qilghan.

12-Öktebir küni chéxiye paytexti praga shehridin igiligen melumatlirimizgha qarighanda, "Uyghur irqiy qirghinchiliqi" ni étirap qilghan chéxiye parlaménti 11-öktebir paytext praga shehride bashlan'ghan "Munber 2000" yighinigha dolqun eysa bashliq d u q xadimlirinimu teklip qilghan.

D u q re'isi dolqun eysa ependining bildürishiche, "Munber 2000" ni chéxiye jumhuriyitining tunji re'isi, meshhur kishilik hoquq rehbiri waslaw xawél qurghan bolup, dunya miqyasida kishilik hoquqni ilgiri sürüsh meqsitide her yili ötküzülüp kéliwatqan bu yighin 25 yildin buyan dawam qilip kelmekte iken.

Dolqun eysa ependining eskertishiche, bu qétimqi yighinda köpligen dölet erbabliri söz qilghan. Yighin jeryanida mexsus xitay zulumigha duchar boluwatqan Uyghur, tibet qatarliq milletlerning nöwettiki paji'elik weziyitini anglitidighan muhakime munbiri tesis qilin'ghan. D u q re'isi dolqun eysa Uyghurlargha wakaliten, tibet sürgündiki hökümitining sabiq bash ministéri lobsang sanggay tibetlerge wakaliten söz qilip, xitayning "Insaniyetke qarshi jinayet" liri we "Irqiy qirghinchiliqi" ni pash qilghan.

Bu qétimqi yighin d u q rehberlirini chéxiye we silowakiyening köpligen siyasiy erbabliri bilen uchriship, Uyghurlar mesilisini anglitish pursiti bilen teminligen. D u q re'isi dolqun eysa ependi yighin jeryanida "Uyghur irqiy qirghinchiliqi" ni parlaméntta étirap qildurushqa zor hesse qoshqan chéxiye kéngesh palatasining re'isi bilen körüshüp, uninggha Uyghurlarning minetdarliqini bildürgen. D u q ning programma yétekchisi zumret'ay Uyghurmu bu pa'aliyetlerge ishtirak qilghan bolup, u bu qétimqi yighinning nahayiti ehmiyetlik ötkenlikini tilgha aldi.

Melum bolghinidek, d u q 7-nöwetlik omumiy wekiller qurultiyini chéxiye paytexti praga shehride ötküzüshni pilanlimaqta. Bu qurultaygha 300 ge yéqin Uyghur wekiller qatnashqandin sirt, yene chéxiye we silowakiye parlaméntining ezaliri, yawropa parlaméntining ezaliri hem meshhur siyasiy erbablar, kishilik hoquq aktipliri bolup Uyghurlar mesilisige köngül bölüdighan köp sandiki gherbliklermu qatnishidiken. Xitayning her türlük tosqunluqlirigha qarimay, pragada qurulghan mezkur yighinning teyyarliq komitéti yighin hazirliqlirini jiddiy élip barmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet