Д у қ рәһбәрлири голландийәдә "йәр шари кишилик һоқуқ һимайичилири" билән биргә хитайға қарши паалийәтләрни өткүзди

Ихтиярий мухбиримиз әкрәм
2021-05-06
Share
Д у қ рәһбәрлири голландийәдә "йәр шари кишилик һоқуқ һимайичилири" намлиқ тәшкилат д у қ билән бирлишип өткүзгән ахбарат елан қилиш йиғинида д у қ рәиси долқун әйса әпәнди голландийәдә панаһлиниватқан лагер шаһитлиридин қәлбинур сидиқ ханимға "қәһриман" лиқ мукапатини тәқдим қилған. 2021-Йили 5-апрел, голландийә.
Photo: RFA

Д у қ голландийәдә хитайға қарши намайиш, ахбарат елан қилиш йиғини вә лагер шаһидлирини мукапатлаш қатарлиқ паалийәтләрни өткүзди.

"йәр шари кишилик һоқуқ һимайичилири" намлиқ тәшкилатниң тәклипи билән д у қ рәиси долқун әйса, қурултайниң программа йетәкчиси зумрәт уйғур 5-април голландийәгә берип, д у қ ниң голландийәдики вәкиллиридин зәйнидин турсун қатарлиқлар билән биргә голландийәниң һага шәһридә хитайниң 2022-йиллиқ бейҗиң қишлиқ олимпик мусабиқисини байқут қилиш, хитайниң уйғурлар үстидин йүргүзүватқан ирқий қирғинчилиқлириға наразилиқ билдүрүш йүзсидин хитайға қарши намайиш уюштуруш, ахбарат елан қилиш йиғини өткүзүш вә лагер шаһидлирини мукапатлаш қатарлиқ бир йүрүш паалийәтләрни елип барған.

Д у қ рәиси долқун әйса әпәндиниң бүгүн һага шәһридин бәргән мәлуматлириға қариғанда, "йәр шари кишилик һоқуқ һимайичилири" намлиқ тәшкилат алдинқи айда голландийә һөкүмитиниң уйғурлар тоғрисида "ирқий қирғичилиқ" қарарини қобул қилишиға бәлгилик һәссә қатқан тәсири зор хәлқаралиқ кишилик һоқуқ тәшкилати икән.

Д у қ ниң голландийәдики паалийәтлири 5-април сәһәрдә хитайниң һага шәһридики әлчиханиси алдида намайиш өткүзүш билән башланған. Д у қ мәдәнийәт бөлүминиң мудири зәйнидин турсун әпәндиниң билдүришичә, хитай әлчиханиси алдида өткүзүлгән намайиш наһайити җушқун кәйпият ичидә давам қилған.

5-Април чүштин кейин "йәр шари кишилик һоқуқ һимайичилири" намлиқ тәшкилат д у қ билән бирлишип ахбарат елан қилиш йиғини өткүзгән. Йиғинға голландийәдә панаһлиниватқан лагер шаһидлиридин қәлбинур сидиқ ханимму қатнишип өз бешидин өткән кәчмишләрни сөзләп бәргән. Д у қ рәиси долқун әйса әпәнди бу йиғинда ахбарат саһәсиниң көз алдидила униңға "қәһриман" лиқ мукапатини тәқдим қилған.

Д у қ ниң голландийәдики паалийәтлири хитайниң һага шәһиридики әлчиханиси алдида намайиш өткүзмәктә. 2021-Йили 5-апрел, голландийә.

5-Април кәчтә голландийәниң утрих шәһридики уйғур җамаити д у қ рәиси долқун әйса әпәндини иптарлиқ дастирханға тәклип қилған. Долқун әйса әпәнди бу йәрдә қериндашлири билән һал-муң болуш пурситигә еришкән. Бу қетимқи паалийәтләргә қатнашқан д у қ ниң программа йетәкчиси зумрәт уйғур ханимму голландийәдики паалийәтләрниң мол мәзмунларға толған яхши паалийәтләр болғанлиқини әскәртти.

Д у қ рәһбәрлири бүгүн йәнә голландийәниң бәзи парламент әзалири вә сиясий партийәләрниң рәһбәрлири билән уйғурларниң нөвәттики вәзийити тоғрисида сөһбәтлишиш үчүн айрим учришушлар өткүзидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт