D u q rehberliri gollandiyede "Yer shari kishilik hoquq himayichiliri" bilen birge xitaygha qarshi pa'aliyetlerni ötküzdi

Ixtiyariy muxbirimiz ekrem
2021-05-06
Share
D u q rehberliri gollandiyede "Yer shari kishilik hoquq himayichiliri" namliq teshkilat d u q bilen birliship ötküzgen axbarat élan qilish yighinida d u q re'isi dolqun eysa ependi gollandiyede panahliniwatqan lagér shahitliridin qelbinur sidiq xanimgha "Qehriman" liq mukapatini teqdim qilghan. 2021-Yili 5-aprél, gollandiye.
Photo: RFA

D u q gollandiyede xitaygha qarshi namayish, axbarat élan qilish yighini we lagér shahidlirini mukapatlash qatarliq pa'aliyetlerni ötküzdi.

"Yer shari kishilik hoquq himayichiliri" namliq teshkilatning teklipi bilen d u q re'isi dolqun eysa, qurultayning programma yétekchisi zumret Uyghur 5-april gollandiyege bérip, d u q ning gollandiyediki wekilliridin zeynidin tursun qatarliqlar bilen birge gollandiyening haga shehride xitayning 2022-yilliq béyjing qishliq olimpik musabiqisini bayqut qilish, xitayning Uyghurlar üstidin yürgüzüwatqan irqiy qirghinchiliqlirigha naraziliq bildürüsh yüzsidin xitaygha qarshi namayish uyushturush, axbarat élan qilish yighini ötküzüsh we lagér shahidlirini mukapatlash qatarliq bir yürüsh pa'aliyetlerni élip barghan.

D u q re'isi dolqun eysa ependining bügün haga shehridin bergen melumatlirigha qarighanda, "Yer shari kishilik hoquq himayichiliri" namliq teshkilat aldinqi ayda gollandiye hökümitining Uyghurlar toghrisida "Irqiy qirghichiliq" qararini qobul qilishigha belgilik hesse qatqan tesiri zor xelq'araliq kishilik hoquq teshkilati iken.

D u q ning gollandiyediki pa'aliyetliri 5-april seherde xitayning haga shehridiki elchixanisi aldida namayish ötküzüsh bilen bashlan'ghan. D u q medeniyet bölümining mudiri zeynidin tursun ependining bildürishiche, xitay elchixanisi aldida ötküzülgen namayish nahayiti jushqun keypiyat ichide dawam qilghan.

5-April chüshtin kéyin "Yer shari kishilik hoquq himayichiliri" namliq teshkilat d u q bilen birliship axbarat élan qilish yighini ötküzgen. Yighin'gha gollandiyede panahliniwatqan lagér shahidliridin qelbinur sidiq xanimmu qatniship öz béshidin ötken kechmishlerni sözlep bergen. D u q re'isi dolqun eysa ependi bu yighinda axbarat sahesining köz aldidila uninggha "Qehriman" liq mukapatini teqdim qilghan.

D u q ning gollandiyediki pa'aliyetliri xitayning haga shehiridiki elchixanisi aldida namayish ötküzmekte. 2021-Yili 5-aprél, gollandiye.

5-April kechte gollandiyening utrix shehridiki Uyghur jama'iti d u q re'isi dolqun eysa ependini iptarliq dastirxan'gha teklip qilghan. Dolqun eysa ependi bu yerde qérindashliri bilen hal-mung bolush pursitige érishken. Bu qétimqi pa'aliyetlerge qatnashqan d u q ning programma yétekchisi zumret Uyghur xanimmu gollandiyediki pa'aliyetlerning mol mezmunlargha tolghan yaxshi pa'aliyetler bolghanliqini eskertti.

D u q rehberliri bügün yene gollandiyening bezi parlamént ezaliri we siyasiy partiyelerning rehberliri bilen Uyghurlarning nöwettiki weziyiti toghrisida söhbetlishish üchün ayrim uchrishushlar ötküzidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet