D u q ning türkiye, yaponiye we awstralyede ötküzülgen 7-nöwetlik wekiller saylimi muweppeqiyetlik axirlashqan
2021.08.23

D u q 7-nöwetlik wekiller qurultiyi teyyarliq komitéti 22-awghust küni türkiye, yaponiye we awstraliyedimu saylam ötküzüp, 11-ayda chaqirilidighan qurultayning wekillirini saylap chiqti.
Dunya Uyghur qurultiyi 14-iyul küni mexsus bayanat élan qilip, 7-nöwetlik wekiller qurultiyining 2021-yili 11-ayning 12-künidin 14-künigiche chéxiye paytexti piragada ötküzülidighanliqini jakarlighandin kéyin, 7-nöwetlik wekiller qurultiyining teyyarliq xizmiti jiddiy türde bashlan'ghan idi. Teyyarliq xizmetlirining tertipige bina'en, 22-awghust küni bashqa döletlerde bolghandek türkiye, yaponiye we awstraliyedimu wekiller saylimi ötküzülgen. Saylam netijiside türkiyedin 25, yaponiyedin 5, awstraliyedin 17 neper kishi wekil bolup saylan'ghan.
Dunya Uyghur qurultiyi ijra'iye komitéti bir aydin köprek waqittin buyan arqa-arqidin yighin chaqirip muzakire qilish arqiliq, 7-nöwetlik wekiller qurultiyi teyyarliq komitétlirini qurup chiqqan. 11-Ayda ötküzülmekchi bolghan qurultaygha wekil bolushni xalaydighan 370 namzat iltimas qilghan bolup, 22-awghust küni 16 etrapida dölette saylam ötküzüp, bularning ichidin 200 kishini wekil qilip saylap chiqilghan. Bularning ichide türkiye, yaponiye we awstraliyedimu wekiller saylap chiqilghan.
Biz 22-awghust küni ötküzülgen wekiller saylimi heqqide téximu tepsiliy melumat igilesh üchün, istanbulda pa'aliyet élip bériwatqan dunya Uyghur qurultiyi wexpisining re'isi abduréshit abdulxemit ependi, Uyghur akadémiyesi wexpisining re'isi perhat qurban tengritaghli ependi, yaponiye Uyghur jem'iyitining re'isi doktor abdulkérim abdurehim ependi, awstraliye Uyghur jem'iyitining mu'awin re'isi jür'et ependi we bashqurush hey'itining ezasi dilzat ependiler bilen söhbet élip barduq.
Abdureshit abdulxemit ependi istanbulda 3 rayonda saylam sanduqi qoyup, 7-nöwetlik dunya Uyghur qurultiyigha qatnishidighan 25 wekilni saylap chiqqanliqini bildürdi.
Yaponiye Uyghur jem'iyitining re'isi, doktor abdukérim abdurehim ependi yaponiyede 7-nöwetlik qurultay wekillirini saylash ishining muwappeqiyetlik ötkenlikini, köp sanda Uyghurning bilet tashlishi bilen 5 wekilni saylap chiqqanliqini bayan qildi.
Awstraliye Uyghur jem'iyitining re'isi jür'et ependi awstraliyediki 3 sheherde saylam élip bérish arqiliq 17 wekil saylap chiqilghanliqini bayan qildi.
Türkiyediki saylam sanduqliri qoyulghan yerlerge biterep közetküchiler mes'ul qilin'ghan bolup, Uyghurlar tashlighan béletlirni ular sanap chiqqan. Biterep közetküchilerdin Uyghur wexpisining re'isi, doktor ferhat qurban tengritaghli ependi saylamning démokratiyelik usul bilen élip bérilghanliqini otturigha qoydi.
Dunyaning herqaysiy döletliride bu qétimqi qurultaygha qatnishidighan 200 neper resmiy wekil saylap chiqilghan. Qurultay nizamnamisi boyiche, her üch yilda bir qétim otküzülidighan we eslide 2020-yili 11-ayda ötküzüsh qarar qilin'ghan 7-nöwetlik wekiller qurultiyi korona wabasi sewebidin kéchiktürülgen iken.