7-Nöwetlik dunya Uyghur qurultiyining wekiller saylimi xelqara metbu'atlardin orun aldi

Ixtiyariy muxbirimiz ekrem
2021.08.24
7-Nöwetlik dunya Uyghur qurultiyining wekiller saylimi xelqara metbu'atlardin orun aldi D u q ning 7-nöwetlik qurultiyigha wekil saylash pa'aliyitide saylamgha nazaretchilik we riyasetchilik qilish hey'iti we pa'aliyetke teyyarliq qilghuchilar. 2021-Yili 22-awghust, gérmaniye.
RFA/Ekrem

22-Awghust küni 25 dölette ötküzülgen 7-nöwetlik d u q ning wekiller saylimi xelqara metbu'atlarning diqqitini jelip qildi.

22-Awghust küni 25 dölette ötküzülgen 7-nöwetlik d u q ning wekiller saylimi erkin asiya radiyosining Uyghurche we in'gilizche sehipiliride xewer qilin'ghandin tashqiri, birqisim gherb metbu'atliridinmu orun aldi.

Gérmaniyening “Néx 24” xewerler sehipisi 22-awghust küni “Uyghurlar pütün dunya miqyasida özlirining wekillirini saylidi” namliq xewer élan qildi. Xewerde 25 dölettiki Uyghur jama'itining démokratik saylam arqiliq özlirining 200 neper wekilini saylap chiqqanliqi, bu saylamning bu yil 11-ayda pragada ötküzülidighan 7-nöwetlik d u q ning pa'aliyetlirining bir terkibiy qismi ikenliki, 2004-gérmaniyening myunxén shehride qurulghan d u q ning xitay kommunistik hakimiyitige qarshi küresh qiliwatqan muhajirettiki Uyghurlarning eng gholluq teshkilati ikenliki bayan qilin'ghan. Xewerde yene nöwette sherqiy türkistanda milyonlighan Uyghurlarning jaza lagérlirida azab tartiwatqanliqi, biraq xitay hakimiyitining buni izchil inkar qilip kéliwatqanliqi, Uyghurlar üstide mejburiy emgek, pilanliq tughut we mejburiy tughmas qilish qatarliq paji'elerning yüz bériwatqanliqining metbu'atlar teripidin köplep tilgha éliniwatqanliqi, bir qisim gherb ellirining buni “Irqiy qirghinchiliq” dep atighanliqi ilgiri sürülgen.

D u q ning 7-nöwetlik qurultiyigha wekil saylash pa'aliyitide saylamgha nazaretchilik we riyasetchilik qilish hey'itining nazaretchilikide bilet tashlanmaqta. 2021-Yili 22-awghust, gérmaniye.
D u q ning 7-nöwetlik qurultiyigha wekil saylash pa'aliyitide saylamgha nazaretchilik we riyasetchilik qilish hey'itining nazaretchilikide bilet tashlanmaqta. 2021-Yili 22-awghust, gérmaniye.

D u q re'isi dolqun eysa ependi 7-nöwetlik d u q wekiller saylimining xelqara metbu'atlarning diqqitini jelp qilishidiki seweb heqqide toxtalghanda, buning Uyghur dewasining xelq'arada tonulush salmiqining éshishi bilen munasiwetlik ikenlikini tilgha aldi. D u q ning mu'awin re'isi perhat muhemmidi ependimu bu heqte qarashlirini otturigha qoyup ötti.

24-Awghust teywende neshirdin chiqidighan “Minbaw” ( “Teywen awam géziti” ) mu bu heqte “D u q bu yil 11-ayda 7-nöwetlik wekiller qurultiyini chaqirmaqchi” namliq tepsiliy xewer élan qilghan. Xewerde bu qétim ötküzülgen wekiller saylimi toghrisida d u q bayanatchisi dilshat réshitni ziyaret qilghanliqi, dilshat réshitning 11-ayda piragada ötküzilidighan 7-nöwetlik d u q gha köpligen döletlerdin Uyghur wekilliri kélip qatnashqandin sirt, yene bezi döletlerning déplomatliri, parlamént ezaliri we dangliq siyasiy shexslerningmu ishtirak qilidighanliqini tilgha alghanliqi eskertilgen.

D u q bayanatchisi dilshat réshit bu munasiwet bilen ziyaritimizni qobul qilghanda, 22-awghust 25 dölette ötküzülgen 7-nöwetlik d u q ning wekiller saylimigha köpligen döletlerning axbarat wastilirining qiziqip, özidin mezkur saylam toghrisida melumatlar sorighanliqini bayan qildi.

Melum bolghinidek, d u q 22-awghust 25 dölette saylam ötküzüp, 7-nöwetlik qurultay üchün özini tizimgha aldurghan 300 din artuq wekil namzatliri ichidin xelqning erkin iradisi bilen 200 neper wekilni saylap chiqqan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.