D u q re'isi dolqun eysa: “Dunya Uyghur qurultiyi 7-nöwetlik wekiller qurultiyining 200 wekili saylam arqiliq békitilidu”

Dunya Uyghur qurultiyi 14-iyul küni mexsus bayanat élan qilip, 7-nöwetlik wekiller qurultiyining 2021-yili 11-ayning 12-künidin 14-künigiche chéxiye paytexti piragada ötküzülidighanliqini jakarlighan idi. Shuningdin kéyin 7-nöwetlik wekiller qurultiyining teyyarliq xizmiti jiddiy türde bashlan'ghan idi. Igilishimizche, bu qétimqi qurultayda d u q ning rehberlik qatlimida islahat élip bérilidighan bolup, qurultay wekillirimu dunyaning her qaysiy jaylirida saylam arqiliq békitilidiken.

Dunya Uyghur qurultiyining ijra'iye komitéti bir aydin köprek waqittin buyan arqa-arqidin yighin chaqirip muzakire qilish arqiliq, 7-nöwetlik wekiller qurultiyi teyyarliq komitétlirini qurup chiqqan. Ular nuqtiliq halda qurultaygha wekil bolidighan namzatlarning iltimasini qobul qilghan. Qurultay wekillikige 370 namzat iltimas qilghan bolup, 22-awghust küni dunyaning her qaysi jaylirida saylam ötküzüp, bularning ichidin 200 kishini wekil qilip saylap chiqidiken.

Biz bu qétimqi qurultay heqqide téximu tepsiliy melumat igilesh üchün, d u q re'isi dolqun eysa bilen söhbet élip barduq. U aldi bilen bu qétimqi qurultayning teyyarliq xizmetlirining jiddiy élip bériliwatqanliqini bayan qildi.

D u q re'isi dolqun eysa ependi bu qétimqi qurultayning muweppeqiyetlik ötküzülüshining weten sirtida élip bériliwatqan milliy musteqilliq inqilabining bundin kéyinki tereqqiyati üchünmu zor ehmiyetke ige ikenlikini, shunga bu qétimqi qurultaygha meli qaysiy dölette yashisun yaki qandaq siyasiy közqarashqa ige bolsun, weten we milliti üchün xizmet qilishni xalaydighan barliq Uyghurlargha dunya Uyghur qurultiyining ishikining ochuq ikenlikini bayan qildi.

Dolqun eysa ependi bu nöwetlik qurultaygha nisbeten muhajirettiki Uyghur jama'itining qiziqishining nahayiti yuquri ikenlikini, 22-awghust küni herqaysiy ellerdiki Uyghurlarning özi turuwatqan döletlerdiki wekil namzatliri ichidin resmiy wekillerni saylap chiqishqa aktip qatnishishi kéreklikini tekitlidi.

D u q ning saylam ishlirigha mes'ul rehbiri turghunjan alawudun ependining bildürüshiche, bu qétimqi qurultay her qaysiy döletlerdiki sherqiy türkistanliqlarning démokratik usul bilen saylap chiqqan qurultay wekilliri, közetküchiler we teklip qilin'ghan alahide méhmanlarning qatnishishi bilen ötküzülidighan bolup, hazirghiche qurultayning wekil namzatliqigha 370 kishi iltimas qilghan iken. D u q ning nizamnamisidiki belgilimilerge asasen bularning ichidin 310 kishi resmiy wekil namzati bolup tallinidiken.

22-Awghust künidiki saylam arqiliq bularning ichidin resmiy 200 neper wekil saylinip chiqidiken. Turghunjan alawudun ependi bu heqte melumat bérip ötti.

Bu qétimqi qurultaygha qatnishidighan resmiy wekillerning sani 200 qilip békitilgen bolup, 22-awghust küni dunyaning her qaysi jaylirida yépiq bilet tashlash usuli arqiliq békitilidiken. Qurultay nizamnamisi boyiche, her üch yilda bir qétim otküzilidighan we eslide 2020-yili 11-ayda ötküzüsh qarar qilin'ghan 7-nöwetlik wekiller qurultiyi korona wabasi sewebidin kéchiktürülgen iken.