D u q ötken yilliq xizmetlirini xulasilep, 2025-yilliq xizmet pilanini muzakire qildi

Enqeredin ixtiyariy muxbirimiz erkin tarim teyyarlidi
2025.01.06
turghunjan-alawudun-1-1024 Turghunjan alawudun dunya Uyghur qurultiyining 8-nöwetlik re'islikige saylan'ghan körünüsh. 2024-Yili 26-öktebir, sarayéwo
RFA/Hebibulla izchi

2024-Yili axirliship 2025-yili yéngi kirgen bügünki künde, yeni 1-ayning 4-küni dunya Uyghur qurultiyi wekiller yighini chaqirip, dunya Uyghur qurultiyining 2024-yilliq xizmetlirini xulasilep, nöwettiki saqliniwatqan mesililer toghrisida muzakire élip bardi. Shuning bilen bir waqitta, 2025-yilliq xizmet pilanliri toghrisidimu muzakire élip bérip, yéngi qedemlirini tashlidi.

Yighin'gha dunya Uyghur qurultiyining rehberliri, her qaysi komitétlarning mes'ulliri we 8-nöwetlik qurultayda saylan'ghan wekillerdin bolup, jem'iy 118 etrapida kishi qatnashti. D u q re'isi turghunjan alawudin ependi échilish nutqi sözlidi. Bu yighinda yene d u q ijra'iye komitétining re'isi roshen abbas xanim we sabiq re'is dolqun eysa ependilermu söz qildi. Ular 2024-yili élip bérilghan, bolupmu ötken yili 10-ayda ötküzülgen 8-qurultaydin kéyinki xizmetler toghrisida qisqiche melumat berdi. Andin 2025-yili némilerni qilish toghrisida muzakire élip bérildi we telep-pikirler otturigha qoyuldi.

Tor yighini axirlashqandin kéyin, ziyaritimizni qobul qilghan dunya Uyghur qurultiyining re'isi turghunjan alawudin ependi, yighinni échishtiki meqsiti toghrisida toxtaldi. U, mundaq dédi: “D u q bügün achqan omumiy wekiller tor yighinida 2024-yilliq, bolupmu ötken yili 10-ayning axirida bosniyede chaqirilghan 8-nöwetlik wekiller qurultiyidin kéyin élip bérilghan pa'aliyetlerni qisqiche xulase qilduq. Yéngi bir yildiki xizmet pilanini tüzüsh üchün wekillirimizning, mutexessislirimizning, jem'iyet erbablirimizning, aliy meslihetchilirimizning we sabiq re'isimizning pikirlirini élish arqiliq, 2025-yilida élip bérilidighan pa'aliyetlerning pilanini tüzüp chiqish üchün bu yighinni achtuq”.

Turghunjan alawudin ependi yighinda nurghun telep-pikirlerning otturigha qoyulghanliqini bildürdi: “Bu yighinda nahayiti yaxshi teklip-pikirler otturigha qoyuldi. Bolupmu xelq'aradiki özgirishler, amérika, yawropa, ottura sherqtiki özgirishler we bu özgirishlerge qandaq inkas qayturush mesilisi, bu özgirishlerning kelgüsi dewayimizgha bolghan paydiliq terepliri we özgirishlerdin ünümlük paydilinishning yolliri qatarliq nurghun mesililer otturigha qoyuldi. Bu heqte mutexessislirimiz, aliy meslihetchilirimiz, tejribilik sabiq rehberlirimiz we wekillirimizning telep-pikirliri élindi. Aldimizdiki künlerde ijra'iye komitéti yighini chaqirip, pilanlirimizni maqullatqandin kéyin, bu pilan boyiche pa'aliyetlirimizni bashlaymiz”.

Tor yighinidin kéyin, ziyaritimizni qobul qilghan dunya Uyghur qurultiyi (d u q) ijra'iye komitétining re'isi, Uyghur herikiti teshkilatining bashliqi roshen abbas xanim, dunya Uyghur qurultiyining 8-nöwetlik wekiller qurultiyidin kéyin tunji qétim bundaq bir yighin chaqirilghanliqini tekitlep ötti. U bu yighinda nahayiti muhim pikirlerning otturigha qoyulghanliqini, yéqin arida ijra'iye komitétining yighinidin kéyin 2025-yilliq pilanlarning resmiy ishqa kirishidighanliqini bildürdi.

Dunya Uyghur qurultiyining bash meslihetchisi, siyasetshunas qehriman ghojamberdi ependi, bu yighinda xelq'ara weziyet, xitayning Uyghur élide yürgüzüwatqan basturush siyasiti we xitayning ottura asiya döletlirige bolghan tesiri toghrisida melumat berdi. U sözide mezkur döletlerning hökümetliri xitay bilen bolghan munasiwetni kücheytish siyasiti élip bériwatqan bolsimu, emma xelqining Uyghurlarni qollaydighanliqini, shunga dunya Uyghur qurultiyining bu döletlerge ehmiyet bérishi kéreklikini tekitlidi.

Uyghur kishilik hoquq qurulushi(UHRP), dunya Uyghur qurultiyi ((WUC), Uyghur heqlirini qoghdighuchi adwokatlar teshkilati qatarliq organlar birlikte argéntina fédératsiye jinayi ishlar aliy sotigha naraziliq erzi sunup, xitayning Uyghurlargha qaratqan insaniyetke qarshi jinayetliri üstidin biwasite sot échishni telep qilghan idi. D u q ning sabiq re'isi dolqun eysa ependi 2024-yilida b d t, yawropa ittipaqi parlaméntigha we her qaysi döletlerge qaratqan diplomatiyelik pa'aliyetlirini kücheytkenlikini, 2025-yilidimu buni dawamlashturush bilen birlikte mejburiy emgek bilen munasiwetlik qanun maqullitish, Uyghur irqiy qirghinchiliqni étirap qildurush, xitayning chégra halqighan basturushigha qarshi kureshni kücheytish üchün tirishchanliq körsitidighanliqini tekitlidi.

1-Ayning 4-küni tor arqiliq ötküzülgen dunya Uyghur qurultiyining wekiller yighinida, d u q re'isi turghunjan alawudin ependi 2024-yilida qolgha keltürgen netijiler toghrisida nuqtiliq toxtalghandin kéyin, yighin ehli 2025-yilliq xizmet pilanigha bolghan köz qarashliri we qoshushqa tégishlik mezmunlarni otturigha qoydi. 3 Sa'et dawamlashqan yighin wekillerning 2025-yili élip bérilidighan xizmetler toghrisidiki telep-pikirlirini otturigha qoyush bilen axirlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.