D u q ning 6-nöwetlik ijra'iye komitéti yighini chaqirilip qararlar qobul qilindi

Ixtiyariy muxbirimiz ekrem
2020-11-16
Share
duq-ijraiye-yighin.jpg D u q ning tor arqiliq chaqirilghan 6-nöwetlik ijra'iye komitéti yighinidin körünüsh. 2020-Yili 15-noyabir.
RFA/Ekrem

15-Noyabir chaqirilghan d u q ning 6-nöwetlik ijra'iye komitéti yighinida muhim mesililer muzakire qilin'ghan.

D u q rehberlirining bergen melumatlirigha qarighanda, d u q eslide 6-nöwetlik ijra'iye komitéti yighinini 11-ayda chéxiyening paytexti praga shehiride chaqirishni pilanlighan bolup, xitaydin taralghan koruna wirusining yawropada ewj élishi munasiwiti bilen aldin orunlashturulghan bu pilan emeldin qaldurulghan. 6-Nöwetlik ijra'iye komitéti yighini 15-noyabir küni tor arqiliq chaqirilghan. Yighin'gha d u q ijra'iye komitétining 15 dölettiki 35 neper ezasi qatnashqan. Yighin sherqiy türkistanning istiqlal marshi bilen bashlan'ghan.

Yighinda aldi bilen d u q re'isi dolqun eysa ependi qurultayning ilgiriki 6 ayliq xizmetliridin doklat bérip ötken. U sözide, ötken 6 ay ichide amérikada Uyghurlargha munasiwetlik ikki qanun maqullan'ghanliqini, kanada parlaméntining tunji bolup Uyghur diyaridiki basturushlarni "Irqiy qirghinchiliq" dep atighanliqini, gérmaniye, en'gliye, italiye, gollandiye, awstraliye qatarliq döletlerning parlaméntlirida we yawropa parlaméntida jaza lagérliri mesilisining talash-tartish qilin'ghanliqi hemde guwahliq bérish yighinliri ötküzülgenlikini, 39 döletning b d t da Uyghurlar terepte turghanliqini tilgha élip, gerche bu 6 ayda Uyghurlar mesilisining xelq'aradiki tesiri körünerlik derijide ashqan bolsimu, emma Uyghur diyarigha yéterlik derijide tesir körsitelmigenlikini eskertip ötken.

Yighinda d u q ning hazir xelq'aradiki 230 din artuq kishilik hoquq teshkilatliri, 70 tin artuq Uyghur teshkilatliri bilen ish birliki élip bériwatqanliqi, ötken 6 ayda 65 dölettiki 100 sheherde 165 xelq'araliq teshkilatlar bilen birlikte ortaq bayanatlar élan qilish, namayishlar uyushturush qatarliq pa'aliyetlerni muweppeqiyetlik emelge ashurulghanliqi bayan qilin'ghan bolsimu, emma bu netijilerning yenila yéterlik emesliki tekitlinip, bundin kéyinki 6 ayda élip baridighan bezi muhim témilargha küch serp qilish pikri ilgiri sürülgen.

D u q ning nizamnamisige bina'en 6-nöwetlik qurultayda saylan'ghan rehberlerning wezipe mudditi bu yil 11-ayda axirlashqan bolup, korona wirusi seweblik 7-qurultayni waqtida chaqirish imkaniyiti bolmighachqa, mezkur yighinda d u q ning hazirqi mewjut rehberlik apparatining kéler qétimliq qurultay chaqirilghuchi bolghan ariliqta wezipilirini dawamlashturushqa hoquqluq ikenliki toghrisida qarar élin'ghan.

Bu qétimqi yighinda kelgüsi 6 ay ichide élip baridighan pa'aliyetlerning pilanliri otturigha qoyulup qararlar qobul qilin'ghan. Bu pilanlar gherb démokratik döletlirige "Sherqiy türkistanning mustemlike zémin ikenliki" ni étirap qildurush, buning üchün chet'el mutexessisliri, xelq'ara hoquqchilargha mexsus doklat hazirlatquzush, herqaysi döletlerge sherqiy türkistandiki zulumlarning irqiy qirghinchiliq ikenlikini étirap qilghuzush, metbu'atlarni bu xususta téximu qozghash, Uyghur sot kollégiyesige küchni merkezleshtürüsh, magnitiskiy qanunini yawropa döletliride yolgha qoydurushqa tirishish, dunyadiki meshhur siyasetchiler, diplomatlarni Uyghur dewasining ichige élip kirish, herqaysi döletlerge xitaygha qarshi téximu köp qararlarni aldurush qatarliqlarni öz ichige alghan.

D u q mu'awin re'isi perhat muhemmidi ependi bu heqte toxtalghanda, 5 sa'ettin artuq dawam qilghan bu yighinning muweppeqiyetlik ötkenlikini eskertti. Yighinda d u q re'islik qatlimidikiler, ijra'iye komitéti terkibidiki herqaysi bölümlerning mudirliri, qurultayning meslihetchiliri, teptishlirimu özlirining pikirlirini bayan qilip ötken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet