"Ehmediye musulman jem'iyiti" ning yilliq yighinida Uyghur mesilisi anglitildi

Muxbirimiz sada
2019-08-05
Élxet
Pikir
Share
Print
Londonda ötküzülgen "Ehmediye musulman jem'iyiti" ning yilliq yighinigha qatnashqan Uyghur wekiller. 2019-Yili 3-awghust. London, en'gliye.
Londonda ötküzülgen "Ehmediye musulman jem'iyiti" ning yilliq yighinigha qatnashqan Uyghur wekiller. 2019-Yili 3-awghust. London, en'gliye.
RFA/Sada

Amérika bashchiliqidiki gherb ellirining Uyghur mesilisige yéqindin köngül bölüshi netijiside Uyghur mesilisining nöwette dunyawi qiziq nuqtigha aylan'ghanliqi melum bolmaqta. 8-Ayning 2-3-4-künliri en'gliyede ötküzülgen "Ehmediye musulman jem'iyiti" ning yilliq yighinda Uyghurlar mesilisige alahide orun bérilishi del buning ipadisidur.

En'gliye paytexti londonda ötküzülgen mezkur yighin'gha dunyaning herqaysi jayliridin kelgen 40 minggha yéqin musulman jama'iti qatnashqanliqi melum. Bu yighin'gha amérika dölet mejlisining xizmetchi xadimliridin sekkiz kishi, shundaqla amérika, kanada, gérmaniye qatarliq döletlerdiki Uyghur pa'aliyetchiliridin teshkillen'gen alte kishilik bir hey'etmu qedem teshrip qilghan iken. Uningdin bashqa mezkur yighin'gha yene en'gliye, gollandiye, finlandiye, braziliye we pakistan qatarliq 37 dölettin kelgen wekiller qatnashqan. 

Mezkur yighin'gha qatnashqan Uyghur wekiller ömikidin dunya Uyghur qurultiyining re'isi dolqun eysa ependi radiyomiz ziyaritini qobul qilip, bu qétimqi "Ehmediye musulman jem'iyiti" ning yilliq yighini we uning ehmiyiti heqqide tepsiliy chüshenche berdi. Uning déyishiche, "Ehmediye musulman jem'iyiti" ge oxshash pütün dunyada tesir küchi zor bolghan teshkilatning yighinida Uyghur mesilisining tilgha élinishi, bolupmu mezkur yighinda nöwette Uyghur diyarida boluwatqan éghir zulumlar we jaza lagérliri mesilisining dunyagha anglitilishi muhim ehmiyetke ige iken. 

"Ehmediye musulmanlar jem'iyiti" ning bu qétimliq yilliq yighinigha en'gliye hökümitidiki nopuzluq shexslerdin britaniye tashqi ishlar wazaritining en'gliye ittipaqi we b d t da turushluq emeldari tariq exmed, b d t bash katipining yardemchisi kérem xan qatarliqlar qatnashqan bolup, Uyghur wekiller ömiki bular bilen ayrim-ayrim uchrishish élip bérip, xitayni qollap imza qoyghan 50 döletke qarshi seperwerlik pa'aliyiti élip barghan.

Amérikadiki "Uyghur herikiti" teshkilatining diréktori roshen abbas xanimmu radiyomiz ziyaritini qobul qilip, yuqiriqi erbablar bilen körüshüsh jeryanida Uyghurlar heqqide otturigha qoyulghan asasliq témilarni anglatti we buningdin kéyinki pilanlar heqqide melumat berdi. 

En'gliyede échilghan bu üch künlük yighin jeryanida Uyghur wekiller ömiki bilen birlikte pa'aliyetlerge ishtirak qilghan en'gliye "Uyghur jem'iyiti" ning re'isi kérem zahir ependimu yighinning rawaji heqqide qisqiche toxtaldi. U sözide yighin'gha ishtirak qilghan méhmanlarning Uyghur mesilisige zor qiziqishta bolghanliqini, mushundaq xelq'araliq teshkilatlar we hökümet erbabliri bilen köprek hemkarlashqanda Uyghur mesilisining yaxshi terepke qarap rawajlinalaydighanliqigha közi yetkenlikini éytip ötti. 

"Ehmediye musulmanlar jem'iyiti" 1889-yili en'gliyede qurulghan. Kéyinche bu teshkilat amérikagha kéngeygen bolup, texminen 1920-yillirigha kelgende amérikadiki eng chong musulmanlar teshkilatigha aylan'ghan. 2014-Yili amérika awam palatasida "Ehmediye musulmanlar munbiri" qurulghan we amérika kéngesh palatasi bilen birlikte dunyadiki kishilik heq-hoquqliri hem puqraliq hoquqliri ziyankeshlikke uchrighan az sanliq milletlerning mesililirini hel qilishqa tiriship kelgen. Bu teshkilatning hazirgha qeder pütün dunyadiki 200 din artuq dölette 20 milyondin artuq ezaliri bar iken.

Toluq bet