Qeshqerdiki xam baziriningmu “Elalashturush” üchün chéqiliwatqanliqi ashkarilandi

Muxbirimiz shöhret hoshur
2023.03.17
qeshqer-cheqish-kiran.jpg “Elalashturush” bahanisi bilen chiqiliwatqan qeshqer shehiri we meschitler.
Social Media

Yéqinda ijtima'iy taratqulardin tik-tokta qeshqerning jelpkar sayahetgahlirdin biri-xam baziriningmu chéqiliwatqanliqi heqqide bir uchur chiqti. Muxbirimizning qeshqerdiki alaqidar organlargha qarita téléfon ziyaretliri dawamida xam baziri qurulushining “Elalashturush” nami astida chéqilishqa bashlighanliqi delillendi.

Yéqinda tik-tokqa chiqqan bir xitayche uchurda qeshqerdiki xam bazirining chéqiliwatqanliqi bayan qilin'ghan we körsitilgen. Bayan qilinishiche, chéqilish ötken hepte bashlan'ghan we körsitilishiche bir kün ichidila bazardiki dukanlarning köpinchisining peshtaq, dérize we ishikliri qomurup tashlan'ghan. Qeshqerde tughulup chong bolghan we nöwette amérikada yashawatqan qasimjan abduréhim ependining tonushturushiche, xam baziri qeshqer sheher merkizidiki qedimiy bir bazar we jelpkar bir sayahetgah bolup, 2000 ‏-yillardin kéyin xitay tijaretchiliri bu bazargha köz tikishke bashlighan we da'iriler shu chaghdimu qurulushlarni “Elalashturush” nami astida, bu bazarning iqtisadiy küch we imtiyazgha ige bolghan xitay tijaretchi we shirketlirining qoligha ötüshige purset yaritip bergen. Netijide 2010 ‏-yillardin kéyin bu bazarda xitay tijaretchilermu belgilik nisbet igiligen, emma, dukanlarning köp qismi yenila Uyghurlarning qolida qalghan.

Chiqiliwatqan qeshqer kona sheher we meschitlerge échinip qarawatqan boway.
Chiqiliwatqan qeshqer kona sheher we meschitlerge échinip qarawatqan boway.
Social Media

Biz bu bazarning bu qétimqi chéqilishning konkrét pilani heqqide melumat élish üchün qeshqerdiki sayahet we bazar bashqurush tarmaqlirigha téléfon qilduq. Téléfonimizni qobul qilghan qeshqer wilayetlik bazarlarni nazaret qilip bashqurush idarisi(喀什地区市场监督管理局) xadimi deslepte bu qurulushtin xewersiz ikenlikini éytti. Biz uninggha bazarning chéqiliwatqanliqi heqqide torlarda uchurlar barliqini bildürginimizdin kéyin, u özining chéqilishtin qismen xewiri barliqi, emma tepsily melumati yoqluqini éytti. Biz uningdin, bu chéqishning kölimi, meqsiti we muddi'asi heqqide melumat sorighinimizda, u xam bazirini chéqish qurulushi pilanidin qeshqer sheherlik bazarlarni nazaret qilip bashqurush idarisining xewiri barliqini éytti we shulardin melumat élishimizni tewsiye qildi.

Jem'iyet uchurliridin melum bolushiche, mezkur bazarda asasliqi toqumichiliq xam matériyalliri yeni rextning xam matériyal haliti sétilidighan bolghachqa xam baziri dep atalghan. Qasimjan abduréhim ependining tonushturushiche, rext, kiyim-kéchek we yémek ichmek qatarliq her xil mallar sétilidighan bu bazarning esli nami “Xan baziri” yeni “Padishah baziri” dégen menide bolup, kéyinki yillarda tawush özgirishi bilen “Xam baziri” gha aylan'ghan we xitay terepmu bu namni qollinishni teshwiqatining tüp ghayisige toghra körgen.

Téléfonimizni qobul qilghan qeshqer-ottura asiya xelq'ara sayahet shirkiti xadimi, xam bazirining chééqilishqa bashlighanliqini delillidi. Dukan we bina qurulushlirining konirap qalghanliqini eskertken mezkur xadim, dukan qurulushlirining rémont qilinish üchün yeni elalashturush chéqiliwatqanliqi we bu rémont qurulushining bir ayda tamamlinidighanliqini bayan qildi.

Alaqidar we uchur analizlardin, jümlidin radiyomiz ishligen ilgiriki programmilardin melum bolushiche, xitayning qeshqer sheher qurulush medeniyitini buzush herikiti 2000 ‏-yillardin kéyin téz sür'ette élip bérilghan bolsimu, emma qurulushlarning sayahetchiliktiki iqtisadiy qimmiti we xelq'ara jama'et pikrining bésimi bilen, bir qisim orun we qurulushlarning milliy qiyapiti bügün'giche saqlinip kelgen.

Mezkur shirket xadimi, xam bazirining bu chéqish netijiside yoqitilmaydighanliqi, eksiche téximu puxta we güzel haletke keltüridighanliqini ilgiri sürdi.

Ötken yili qeshqer kona bazarmu chéqilghan, emma eslige keltürü lmigen؛ bazardiki tijaretchiler, sheher sirtigha yötkiwétilgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.