Учтурпанниң имамлирим йезисидики ели җүмә чәт әлдики икки тағиси билән алақилашқанлиқи үчүн 15 йиллиқ кесилгән

Мухбиримиз шөһрәт һошур
2021-09-01
Share
Учтурпанниң имамлирим йезисидики ели җүмә чәт әлдики икки тағиси билән алақилашқанлиқи үчүн 15 йиллиқ кесилгән Хитай даирилири бу йил январда ачқан ахбарат йиғинида (оңдин солға) уйғур аптоном районлуқ һөкүмәт учур-алақә ишханисиниң баянатчиси зулһаят исмаил, шинҗаң һөкүмитиниң баянатчиси шү гүйшяң вә сун җен. 2021-Йили 11-январ, бейҗиң.
AP

Хитай даирилири бу йил январда өткүзгән бир ахбарат йиғинида уйғур районидики аһалиләрниң чәтәлдики уруқ-туғқанлири билән алақисиниң нормал давам қиливатқанлиқини илгири сүргән иди. Мухбиримизниң төнүгүн учтурпанға қарита елип барған телефон зиярәтлири давамида, имамлирим йезисидики ели җүмә исимлик бир аһалиниң чәтәлгә чиқип кәткән икки тағиси (җелил җүмә вә хелил җүмәләр) билән алақилашқанлиқи үчүнла 15 йиллиқ кесиветилгәнлики дәлилләнди.

Хитай даирилири бу йил январда ачқан бир ахбарат елан қилиш йиғинида уйғур аптоном районлуқ һөкүмәт учур-алақә ишханисиниң баянатчиси зулһаят исмаил, чәтәл мухбирлириниң соалиға җавабән муһаҗирәттики уйғурларниң уйғур районидики уруқ-туғқанлири билән 4 йилдин буян алақиси үзүлгәнликини инкар қилған иди. У сөзидә хитайниң бир қанун дөлити икәнликини илгири сүрүп, райондики аһалиләрниң чәтәлләрдики уруқ-туғқанлири билән болған алақисиниң нормал давамлишиватқанлиқи, пәқәт бир қисим аһалиләрниң чәтәлдики "бөлгүнчи" туғқанлири билән көрүшүштин өзликидин ваз кәчкәнликини баян қилған. Зулһаят исмаилниң бу сөзлири муһаҗирәттики уйғур гуваһчиларниң күчлүк дәлил-пакитлири тәрипидин инкар қилинған болсиму, әмма хитай тәрәп таки бүгүнгичә тәшвиқатини өз пәдисидә йәнә давамлаштурмақта. Һалбуки, чәтәлдики уйғурларниң гуваһлиқ баянатлиридин башқа, телипон зияритимизни қобул қилған уйғур райондики бир қисим сақчи хадимлириму, райондики аһалиләрниң чәтәлдики уруқ-туғқанлири билән көрүшүшиниң чәклинидиғанлиқини, әгәр бу чәклимигә билип-билмәй хилаплиқ қилғанларниң еғир һалда җазалиниватқанлиқини ашкарилиди.

Мәлум болушичә, учтурпанниң имамлирим йеза 5-кәнт әзаси ели җүмә 2014‏-йили чәтәлгә чиқип кәткән тағиси җелил җүмә вә хелил җүмәләр билән телефонда алақилашқанлиқи үчүн2017-йилниң бешида тутуп кетилгән вә лагерға ташланған.

Хитай тәрәпниң депиға уссул ойнаватқан зулһаят исмаил аталмиш "шинҗаң ахбарат йиғини" да чәтәл мухбирлириниң мәзкур темидики мәнтиқлиқ соаллири алдида осал һалға чүшүп қалған. У гәпни башқа яққа бурап, бәзи муһаҗир уйғурларниң юртидики уруқ-туғқанлириниң телефон номурини унтуп қалған болуши вә шу сәвәптин көрүшәлмәйватқанлиқ еһтималлиқиниму оттуриға қоюп баққан иди. Зияртимизни қобул қилған учтурпандики мәзкур кәнт сақчисиниң ашкарилишичә, даириләр ели җүмәниң тағлириниң чәтәлгә чиқип кәткәнлики вә униң тағилири билән болған телефон алақиси сәвәблик кесиветилгәнликини, буни кәнт аһалиләр кометитида ечилған йиғинида аһалиләргә уқтурған икән.

Илгирики ениқлашлиримиз давамида корладики бир кәнт аманлиқ мудири чәтәлни зиярәт қилип кәлгән уйғурларниң лагерға топланғанлиқи вә "тәрбийә" еливатқанлиқини паш қилған иди. У сөзидә чәтәлгә саяһәткә чиққанларниң чәтәлниң тәсиригә учримаслиқ еһтималиниң азлиқи вә уларниң каллисида селиштурма пәйда болуп дөләткә қарши туруш кәйпияти шәкиллинип қелиш еһтималлиқи барлиқини, шу сәвәптин уларниң "тәрбийә" еливатқанлиқини баян қилған, шундақла уларниң чәтәлгә чиққиниға пушайман баянати язмай туруп лагердин қутулалмайдиғанлиқини ашкарилиған иди.

31-Авғуст ашкарилинишичә, әслидә валибол һәвәскари болған вә деһқанчилиқ билән тирикчиликини давам қилип келиватқан ели җүмә, лагерда икки йилға йеқин ятқандин кейин, 2018-йилниң ахирилири 15 йиллиқ кесиветилгән.

Униң 15 йиллиқ кесилишигә лагердики ипадисиниң күтүлгәндәк болмиғанлиқи, йәни униң тағилири билән телефон алақиси қилғиниға пушайман баянати бәрмигәнлики вә яки пушайман баянатиниң сәмимий дәп қаралмиғанлиқиниң сәвәп болғанлиқи һазирчә ениқ әмәс.

Имамлирим йезисидики мәзкур кәнт сақчиси, ели җүмәниң әслидә җелил җүмә вә хелил җүмәләрниң һәдисиниң оғли икәнлики, бовисиниң қолида чоң болғанлиқи үчүн бовисиниң намини фамилә қилип қолланғанлиқи, шуңа тағилири билән фамилиси охшаш икәнликини әскәртип өтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт