Uchturpanning imamlirim yézisidiki éli jüme chet eldiki ikki taghisi bilen alaqilashqanliqi üchün 15 yilliq késilgen

Muxbirimiz shöhret hoshur
2021-09-01
Share
Uchturpanning imamlirim yézisidiki éli jüme chet eldiki ikki taghisi bilen alaqilashqanliqi üchün 15 yilliq késilgen Xitay da'iriliri bu yil yanwarda achqan axbarat yighinida (ongdin solgha) Uyghur aptonom rayonluq hökümet uchur-alaqe ishxanisining bayanatchisi zulhayat isma'il, shinjang hökümitining bayanatchisi shü güyshyang we sun jén. 2021-Yili 11-yanwar, béyjing.
AP

Xitay da'iriliri bu yil yanwarda ötküzgen bir axbarat yighinida Uyghur rayonidiki ahalilerning chet'eldiki uruq-tughqanliri bilen alaqisining normal dawam qiliwatqanliqini ilgiri sürgen idi. Muxbirimizning tönügün uchturpan'gha qarita élip barghan téléfon ziyaretliri dawamida, imamlirim yézisidiki éli jüme isimlik bir ahalining chet'elge chiqip ketken ikki taghisi (jélil jüme we xélil jümeler) bilen alaqilashqanliqi üchünla 15 yilliq késiwétilgenliki delillendi.

Xitay da'iriliri bu yil yanwarda achqan bir axbarat élan qilish yighinida Uyghur aptonom rayonluq hökümet uchur-alaqe ishxanisining bayanatchisi zulhayat isma'il, chet'el muxbirlirining so'aligha jawaben muhajirettiki Uyghurlarning Uyghur rayonidiki uruq-tughqanliri bilen 4 yildin buyan alaqisi üzülgenlikini inkar qilghan idi. U sözide xitayning bir qanun döliti ikenlikini ilgiri sürüp, rayondiki ahalilerning chet'ellerdiki uruq-tughqanliri bilen bolghan alaqisining normal dawamlishiwatqanliqi, peqet bir qisim ahalilerning chet'eldiki "Bölgünchi" tughqanliri bilen körüshüshtin özlikidin waz kechkenlikini bayan qilghan. Zulhayat isma'ilning bu sözliri muhajirettiki Uyghur guwahchilarning küchlük delil-pakitliri teripidin inkar qilin'ghan bolsimu, emma xitay terep taki bügün'giche teshwiqatini öz pediside yene dawamlashturmaqta. Halbuki, chet'eldiki Uyghurlarning guwahliq bayanatliridin bashqa, télipon ziyaritimizni qobul qilghan Uyghur rayondiki bir qisim saqchi xadimlirimu, rayondiki ahalilerning chet'eldiki uruq-tughqanliri bilen körüshüshining cheklinidighanliqini, eger bu cheklimige bilip-bilmey xilapliq qilghanlarning éghir halda jazaliniwatqanliqini ashkarilidi.

Melum bolushiche, uchturpanning imamlirim yéza 5-kent ezasi éli jüme 2014‏-yili chet'elge chiqip ketken taghisi jélil jüme we xélil jümeler bilen téléfonda alaqilashqanliqi üchün2017-yilning béshida tutup kétilgen we lagérgha tashlan'ghan.

Xitay terepning dépigha ussul oynawatqan zulhayat isma'il atalmish "Shinjang axbarat yighini" da chet'el muxbirlirining mezkur témidiki mentiqliq so'alliri aldida osal halgha chüshüp qalghan. U gepni bashqa yaqqa burap, bezi muhajir Uyghurlarning yurtidiki uruq-tughqanlirining téléfon nomurini untup qalghan bolushi we shu seweptin körüshelmeywatqanliq éhtimalliqinimu otturigha qoyup baqqan idi. Ziyartimizni qobul qilghan uchturpandiki mezkur kent saqchisining ashkarilishiche, da'iriler éli jümening taghlirining chet'elge chiqip ketkenliki we uning taghiliri bilen bolghan téléfon alaqisi seweblik késiwétilgenlikini, buni kent ahaliler kométitida échilghan yighinida ahalilerge uqturghan iken.

Ilgiriki éniqlashlirimiz dawamida korladiki bir kent amanliq mudiri chet'elni ziyaret qilip kelgen Uyghurlarning lagérgha toplan'ghanliqi we "Terbiye" éliwatqanliqini pash qilghan idi. U sözide chet'elge sayahetke chiqqanlarning chet'elning tesirige uchrimasliq éhtimalining azliqi we ularning kallisida sélishturma peyda bolup döletke qarshi turush keypiyati shekillinip qélish éhtimalliqi barliqini, shu seweptin ularning "Terbiye" éliwatqanliqini bayan qilghan, shundaqla ularning chet'elge chiqqinigha pushayman bayanati yazmay turup lagérdin qutulalmaydighanliqini ashkarilighan idi.

31-Awghust ashkarilinishiche, eslide walibol heweskari bolghan we déhqanchiliq bilen tirikchilikini dawam qilip kéliwatqan éli jüme, lagérda ikki yilgha yéqin yatqandin kéyin, 2018-yilning axiriliri 15 yilliq késiwétilgen.

Uning 15 yilliq késilishige lagérdiki ipadisining kütülgendek bolmighanliqi, yeni uning taghiliri bilen téléfon alaqisi qilghinigha pushayman bayanati bermigenliki we yaki pushayman bayanatining semimiy dep qaralmighanliqining sewep bolghanliqi hazirche éniq emes.

Imamlirim yézisidiki mezkur kent saqchisi, éli jümening eslide jélil jüme we xélil jümelerning hedisining oghli ikenliki, bowisining qolida chong bolghanliqi üchün bowisining namini famile qilip qollan'ghanliqi, shunga taghiliri bilen familisi oxshash ikenlikini eskertip ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet