Лондонда икки җумһурийәтни хатириләш мурасими өткүзүлгән

Ихтиярий мухбиримиз әркин тарим
2022.11.15
engliye-ikki-jumhuriyet-kuni-xitirilesh-1.jpg Әнглийәдики уйғурлар өткүзгән икки қетимлиқ шәрқий түркистан җумһурийәтлирини хатириләш паалийитидн көрүнүш, 2022-йили 13-ноябир, лондон.
RFA/Erkin Tarim

Әнгилийәдики уйғурлар лондонда тарихтики икки қетимлиқ шәрқий түркистан җумһурийәтлирини хатириләш мурасими өткүзгән.

11-Айниң 13-күни лондондики уйғурлар бир йәргә  җәм болуп, шәрқий түркистан хәлқиниң 1933-йили вә 1944-йили қурған икки қетимлиқ шәрқий түркистан җумһурийитини бирликтә хатириләш мурасими өткүзгән. Мурасим шәрқий түркистанниң истиқлал марши билән башланған.

Икки җумһурийәтни хатириләш мурасиминиң муқәддисидә сөзгә тәклип қилинған әнгилийә уйғур җәмийитиниң рәиси маһирә әйса ханим, өз нутуқида уйғур хәлқиниң нөвәттики вәзиписиниң тарихтин савақ елип мустәқил шәрқий түркистан җумһурийәтини қайта қуруш йолида күрәш қилиштин ибарәт икәнликини тәкитлигән. У сөзидә йәнә уйғурларниң тарихта қудрәтлик дөләтләр қурған бир милләт икәнликини, бундин кейинму қайта қурушқа ишәнчисиниң камил икәнликини тәкитлигән.  У, телефон зияритимиз арқилиқ мәзкур паалийәт һәққидә мәлумат бәрди.

Паалийәтни тәшкиллигән әнгилийә уйғур җәмийитиниң әзалири, -йили 13-ноябир, лондон.
Паалийәтни тәшкиллигән әнгилийә уйғур җәмийитиниң әзалири, -йили 13-ноябир, лондон.
RFA/Erkin Tarim

Бу мурасим һәққидә зияритимизни қобул қилған әнгилийә уйғур җәмийитиниң диний хизмәтләргә мәсул хадими, җамаәт әрбаби абдукерим заһир әпәнди, бу паалийәт һәққидә тохтилип, мундақ деди: “бизниң җумһурийәт байримини изчил һалда өткүзүшимиздә бир қанчә сәвәб бар. Биринчиси, әҗдатлиримиз тарихта қурған дөләтләрни әвлатлиримизға әслитиш. Йәни бизниң тарихта дөләт қурған вә парлақ мәдәнийәт яратқан бир милләтниң әвлатлири икәнликимизни пәрзәнтлиримизгә хатирлитиш; иккинчиси, мустәмликигә чүшүп қалған вақитларда әҗдатлиримиз мустәқиллиқни қайта қолға кәлтүрүш үчүн қандақ көрәшләрни қилған, икки җумһурийәтни қуруп байриқимизни қандақ ләпидәткән, мустәқиллиқ үчүн җенини айимай қандақ күрәшләрни қилған? биз бу соалларни балилиримизниң алдиға ташлап, уларниң мустәқиллиққа болған ирадисини күчләндүрүшни мәқсәт қилдуқ.”

Лондонда өткүзүлгән икки җумһурийәтни хатириләш мурасимида уйғур зиялийси әзиз әйса әлкүн әпәндиму мәхсус доклат бәргән. У, нуқтилиқ һалда икки җумһурийәтниң қурулуш җәряни вә йоқ қилинишниң сәвәблири һәққидә тохталған. Андин у кейинки 20 йил җәрянида оттура асия түркий җумһурийәтлиридин йиғип кәлгән 1944-йили ғулҗада  қурулған шәрқий түркистан җумһурийити чиқарған медаллар, китаблар вә гезит-журналларни яш-өсмүрләргә көрситип туруп, мәлумат бәргән. Әзиз әйса әлкүн әпәнди радйомизға бу тоғрилиқ мәлумат бәрди.

1944-Йили ғулҗада  қурулған шәрқий түркистан җумһурийити чиқарған музика-сәнәт медали, сүрәтни әзиз әйса әлкүн тәминлигән.
1944-Йили ғулҗада қурулған шәрқий түркистан җумһурийити чиқарған музика-сәнәт медали, сүрәтни әзиз әйса әлкүн тәминлигән.
RFA/Erkin Tarim

Мәзкур паалийәтни әнгилийә уйғур җәмийити уюштурған болуп, паалийәткә лондон вә әтрапидики шәһәрләрдә туруватқан көп сандики уйғур иштирак қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.