En'gliye-xitay munasiwetlirining yamanliship baridighanliqi melum

Kishilik hoquq pa'aliyetchilirining ilgiri sürüshiche, xitay dunyawi kishilik hoquq ölchemlirige buzghunchiliq qilishini dawamlashturuwerse, en'gliye-xitay munasiwetliri izchil halda yirik haletni saqlap qalidiken yaki yamanliship baridiken.

Yéqinda amérika, en'gliye we yawropa elliri birliship xitayning Uyghurlargha ziyankeshlik qilishini toxtitish üchün xitaygha qarshi jaza tedbirliri élan qilghan.

En'gliyedin chiqidighan “Ékspréss” gézitining xewer qilishiche, bu heqte toxtalghan kishilik hoquq pa'aliyetchisi filip baldwin buning ötken 30 yildin buyan en'gliye we yawropa ittipaqi xitayning kishilik hoquq buzghunchiliqigha qarshi élan qilghan tunji jaza tedbiri ikenlikni bildürgen.

U mundaq dégen: “Méning qarishimche, xitay kishilik hoquqning dunyawi ölchemlirige ri'aye qilishqa bashlimaydiken, ikki terep munasiwetliri izchil yamanliship mangidu.”

U yene xitayning Uyghurlargha ziyankeshlik qilishni dawamlashturush arqiliq weziyetni téximu yamanlashturghanliqini bildürgen.

Xitaymu öz emeldarlirigha qaritilghan jaza tedbirlirige öch élish xaraktérlik inkas qayturup, 9 neper en'gliye puqrasini oz ichige alghan nechche on yawropa diplomati we tetqiqat organlirigha émbargo élan qilghan idi.

Bu heqte toxtalghan flip baldwin xitay élan qilghan bu xil émbargolarning ighwagerchilik herikitidin bashqa nerse emeslikini bildürgen.