Әнглийәдики "уйғур қирғинчилиқини тохтитиш" һәрикитигә 90 миң фонд стерлиң ярдәм қилинған

Мухбиримиз җәвлан
2021-08-02
Share
Әнглийәдики Әнглийәдики йәһудий җамаитиниң қоллишиға еришкән перис фонди (Pears Foundation) ниң торбәти.
pearsfoundation.org.uk

Уйғурлар учраватқан қәбиһ зиянкәшлик бир қисим дөләтләр тәрипидин "ирқий қирғинчилиқ" дәп бекитилгәндин кейин, бу қирғинчилиқни қандақ тохтитиш, хитайға қандақ сиясәт вә һәрикәт қоллиниш мәзкур дөләтләрниң һөкүмәтлири, аммиви тәшкилатлири вә сиясий паалийәтчиләрниң алдиға қоюлған әң муһим мәсилә болуп қалған.

Әнглийә парламенти хитайниң уйғурларға йүргүзүп кәлгән җинайитини "ирқий қирғинчилиқ" дәп җакарлаш билән тохтап қалмай, алдинқи һәптә 2022-йиллиқ бейҗиң қишлиқ олимпик мусабиқисини дипломатик байқут қилишни қарар қилған. Әнглийә парламентиниң уйғурлар мәсилисигә тутқан позитсийәси вә алған қарарлирида муһим рол ойнап келиватқан йәһудий җамаити бу қетим уйғурларниң ирқий қирғинчилиққа қарши туруш һәрикитигә әмәлий ярдәм қилған. Әнглийәдики йәһудий җамаитиниң қоллишиға еришкән перис фонди (Pears Foundation) "уйғур ирқий қирғинчилиқини тохтитиш" һәрикитигә 90 миң фонд стерлиң ианә қилған.

Перис фонди 1991-йил қурулған хәйр-сахавәт фонди болуп, уларниң асаслиқ кирим мәнбәси вилям перис җәмәтиниң өй-мүлүк ширкитидин келидикән. Бу хәйр-сахавәт фонди йәһудийларниң диний вә дуняви һоқуқини қоғдашқа мунасивәтлик тәтқиқат орунлириға ярдәм қилип келиватқан болуп, бу қетим дуня уйғур қурултийи лондон ишханисиниң мудири рәһимә мәһмуд ханимниң башламчилиқида қурулған "уйғур ирқий қирғинчилиқини тохтитиш" гурупписиға 90 миң фонд стерлиң ярдәм қилған.

Рәһимә ханим бу гуруппиниң барлиққа келиши һәққидә сөз қилип, униң дуня уйғур қурултийи лондон шөбисидики мәслиһәтчиләр гурупписиниң тәклипи билән қурулғанлиқини, бир нәччә йилдин буян барғанчә тәрәққий қилип, көплигән үнүмлүк хизмәтләрни қилғанлиқини билдүрди. Рәһимә ханимниң ейтишичә, перс фонди ярдәм қилған бу пул "уйғур қирғинчилиқини тохтитиш" гурупписиниң бу һәрикәтни техиму кәспий вә үнүмлүк елип берилиши үчүн ишлитилидикән.

Өткән пәйшәнбә күни (29-июл) "уйғур қирғинчилиқини тохтитиш һәрикити" ни рәсмий башлаш, җүмлидин перс фондиниң уйғурларни алаһидә қоллиғанлиқиға рәһмәт ейтиш йүзисидин зияпәт өткүзүлгән болуп, бу паалийәткә перс фондиниң мәслиһәтчилири, уйғур қирғинчилиқини тохтитиш үчүн тиришип келиватқан паалийәтчиләр вә тәшкилат рәһбәрлири қатнашқан. Рәһимә ханимниң ейтишичә, зияпәттә уйғур таамлири қоюлған, уйғур классик нахша-музикилири орунланған, кәйпият наһайити җанлиқ, җушқун вә тәсирлик болған.

Бу паалийәттә перс фондиниң мәслиһәтчиси сушана бойд гелфәнд ханим қатнишип сөз қилған. У йәһудий қирғинчилиқиниң еғир ақивәтлирини тилға елип, "қайта йүз бәрмисун" дегән чақириққа қаримай дуняда йәнила бу җинайәтниң йүз бериватқанлиқини, әмма буни тохтитишқа җәзмән ишиниш керәкликини билдүргән. У мундақ дегән: "биз пүтүн дунядики ирқий қирғинчилиқни тохтитиш үчүн бир иш қилғандила уни йоқиталайдиғанлиқимизға ишинимиз. Биз нурғун ишларни қилишимиз керәк, хизмәт техи аяғлашмиди. Биз перис фонди, бу мәсилини қандақ һәл қилишни билмәймиз, әмма бу ишни қилалайдиғанлар бар, биз шуларға ярдәм беримиз".

Ахирида у перис фондиниң рәһимә ханимни давамлиқ қоллайдиғанлиқини, ирқий қирғинчилиққа қарши туруш һәрикитидә униң һәргиз ялғуз әмәсликини билдүргән.

"уйғур қирғинчилиқини тохтитиш" гурупписи партийә, милләт вә җамаәт һалқиған кишилик һоқуқ тәшкилати болуп, хитайниң уйғур вә башқа түркий хәлқләргә йүргүзүп келиватқан ирқий қирғинчилиқини тохтитишни түп нишан қилидикән, әнглийәни асас қилип пүтүн дуняда паалийәт елип баридикән. Уйғурларниң кишилик һоқуқини қоғдаш, уйғурларниң нөвәттики қийин әһвалини өзгәртиш үчүн күрәш қилидиған шәхс вә тәшкилатларни өз әтрапиға топлап, улар билән бирликтә күрәш қилишни мәқсәт қилидикән. Бу тәшкилатниң мәслиһәтчиләр гурупписи уйғур ирқий қирғинчилиқини тохтитиш үчүн йиллардин бери хизмәт қилип келиватқан чәт әллик паалийәтчиләр вә тәшкилат рәһбәрлиридин тәркиб тапқан болуп, әнглийәдила әмәс, хәлқарадиму тәсир көрситиш ролиға игә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт