En'gliyediki "Uyghur qirghinchiliqini toxtitish" herikitige 90 ming fond stérling yardem qilin'ghan

Muxbirimiz jewlan
2021-08-02
Share
En'gliyediki En'gliyediki yehudiy jama'itining qollishigha érishken péris fondi (Pears Foundation) ning torbeti.
pearsfoundation.org.uk

Uyghurlar uchrawatqan qebih ziyankeshlik bir qisim döletler teripidin "Irqiy qirghinchiliq" dep békitilgendin kéyin, bu qirghinchiliqni qandaq toxtitish, xitaygha qandaq siyaset we heriket qollinish mezkur döletlerning hökümetliri, ammiwi teshkilatliri we siyasiy pa'aliyetchilerning aldigha qoyulghan eng muhim mesile bolup qalghan.

En'gliye parlaménti xitayning Uyghurlargha yürgüzüp kelgen jinayitini "Irqiy qirghinchiliq" dep jakarlash bilen toxtap qalmay, aldinqi hepte 2022-yilliq béyjing qishliq olimpik musabiqisini diplomatik bayqut qilishni qarar qilghan. En'gliye parlaméntining Uyghurlar mesilisige tutqan pozitsiyesi we alghan qararlirida muhim rol oynap kéliwatqan yehudiy jama'iti bu qétim Uyghurlarning irqiy qirghinchiliqqa qarshi turush herikitige emeliy yardem qilghan. En'gliyediki yehudiy jama'itining qollishigha érishken péris fondi (Pears Foundation) "Uyghur irqiy qirghinchiliqini toxtitish" herikitige 90 ming fond stérling i'ane qilghan.

Péris fondi 1991-yil qurulghan xeyr-saxawet fondi bolup, ularning asasliq kirim menbesi wilyam péris jemetining öy-mülük shirkitidin kélidiken. Bu xeyr-saxawet fondi yehudiylarning diniy we dunyawi hoquqini qoghdashqa munasiwetlik tetqiqat orunlirigha yardem qilip kéliwatqan bolup, bu qétim dunya Uyghur qurultiyi london ishxanisining mudiri rehime mehmud xanimning bashlamchiliqida qurulghan "Uyghur irqiy qirghinchiliqini toxtitish" guruppisigha 90 ming fond stérling yardem qilghan.

Rehime xanim bu guruppining barliqqa kélishi heqqide söz qilip, uning dunya Uyghur qurultiyi london shöbisidiki meslihetchiler guruppisining teklipi bilen qurulghanliqini, bir nechche yildin buyan barghanche tereqqiy qilip, köpligen ünümlük xizmetlerni qilghanliqini bildürdi. Rehime xanimning éytishiche, pérs fondi yardem qilghan bu pul "Uyghur qirghinchiliqini toxtitish" guruppisining bu heriketni téximu kespiy we ünümlük élip bérilishi üchün ishlitilidiken.

Ötken peyshenbe küni (29-iyul) "Uyghur qirghinchiliqini toxtitish herikiti" ni resmiy bashlash, jümlidin pérs fondining Uyghurlarni alahide qollighanliqigha rehmet éytish yüzisidin ziyapet ötküzülgen bolup, bu pa'aliyetke pérs fondining meslihetchiliri, Uyghur qirghinchiliqini toxtitish üchün tiriship kéliwatqan pa'aliyetchiler we teshkilat rehberliri qatnashqan. Rehime xanimning éytishiche, ziyapette Uyghur ta'amliri qoyulghan, Uyghur klassik naxsha-muzikiliri orunlan'ghan, keypiyat nahayiti janliq, jushqun we tesirlik bolghan.

Bu pa'aliyette pérs fondining meslihetchisi sushana boyd gélfend xanim qatniship söz qilghan. U yehudiy qirghinchiliqining éghir aqiwetlirini tilgha élip, "Qayta yüz bermisun" dégen chaqiriqqa qarimay dunyada yenila bu jinayetning yüz bériwatqanliqini, emma buni toxtitishqa jezmen ishinish kéreklikini bildürgen. U mundaq dégen: "Biz pütün dunyadiki irqiy qirghinchiliqni toxtitish üchün bir ish qilghandila uni yoqitalaydighanliqimizgha ishinimiz. Biz nurghun ishlarni qilishimiz kérek, xizmet téxi ayaghlashmidi. Biz péris fondi, bu mesilini qandaq hel qilishni bilmeymiz, emma bu ishni qilalaydighanlar bar, biz shulargha yardem bérimiz".

Axirida u péris fondining rehime xanimni dawamliq qollaydighanliqini, irqiy qirghinchiliqqa qarshi turush herikitide uning hergiz yalghuz emeslikini bildürgen.

"Uyghur qirghinchiliqini toxtitish" guruppisi partiye, millet we jama'et halqighan kishilik hoquq teshkilati bolup, xitayning Uyghur we bashqa türkiy xelqlerge yürgüzüp kéliwatqan irqiy qirghinchiliqini toxtitishni tüp nishan qilidiken, en'gliyeni asas qilip pütün dunyada pa'aliyet élip baridiken. Uyghurlarning kishilik hoquqini qoghdash, Uyghurlarning nöwettiki qiyin ehwalini özgertish üchün küresh qilidighan shexs we teshkilatlarni öz etrapigha toplap, ular bilen birlikte küresh qilishni meqset qilidiken. Bu teshkilatning meslihetchiler guruppisi Uyghur irqiy qirghinchiliqini toxtitish üchün yillardin béri xizmet qilip kéliwatqan chet ellik pa'aliyetchiler we teshkilat rehberliridin terkib tapqan bolup, en'gliyedila emes, xelq'aradimu tesir körsitish roligha ige iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet