En'gliyening Uyghur élidiki mejburiy emgekke taqabil turushta arqida qalghanliqi eyiblendi

Kishilik hoquqni közitish teshkilati en'gliyening Uyghur élidiki mejburiy emgekke taqabil turush tedbirlirini élishta arqida qalghanliqini bildürdi we uni bu jehette téximu qattiq bolushqa chaqiridi.

En'gliye we kanada bu hepte mas qedemde bayanat élan qilip, en'gliye we kanada karxanilirining Uyghur rayonidiki kishilik hoquq depsendichilikige chétilip qélishi yaki uningdin payda élishning aldini alidighan bezi tedbirlerni alghan.

En'gliye élan qilghan tedbirler en'gliye karxanilirining teminlesh zenjiride kishilik hoquq depsendichiliki bayqalghan mal teminligüchilerni ishletmeslik, Uyghur élige qarita yolgha qoyulghan éksport kontrolluqini orundiyalmighan teshkilatlargha jerimane qoyush qatarliqlarni öz ichige alidu.

Halbuki, kishilik hoquqni közitish teshkilatining en'gliye ishlirigha mes'ul diréktori yasmin ahmed shenbe küni élan qilghan bayanatida “En'gliye alghan bu tedbirlerning kanada otturigha qoyghan we yéqinda amérikida kücheytilgen mejburiy emgek bilen ishlepchiqirilghan mehsulatlarni cheklesh tedbirliridek küchlük emes” likini bildürdi.

U mundaq dédi: “En'gliye élan qilghan tedbirler xitay shinjangda sadir qiliwatqan éghir kishilik hoquq depsendichilikige chidap turushqa bolmaydighanliqidin ibaret bir signalni berdi. Bularning hemmisi yaxshi tedbirler, emma eger en'gliye hökümiti buninggha estayidil mu'amile qilidighan bolsa, undaqta u yer shari teminlesh zenjiride mejburiy emgekni öz ichige alghan kishilik hoquq depsendichilikining aldini alalmighan karxanilargha import cheklimisi we qanuniy jaza yürgüzüshi kérek.”

Yéqinda en'gliyediki marks we spénsérge oxshash nopuzluq shirketler teminlesh zenjirini Uyghur rayonidin yötkep chiqish we mejburiy emgekning ziyankeshlikige uchrighan ishchilargha tölem tölesh qatarliq tedbirlerni élan qilghan idi.