Әнглийәниң уйғур елидики мәҗбурий әмгәккә тақабил турушта арқида қалғанлиқи әйибләнди

Кишилик һоқуқни көзитиш тәшкилати әнглийәниң уйғур елидики мәҗбурий әмгәккә тақабил туруш тәдбирлирини елишта арқида қалғанлиқини билдүрди вә уни бу җәһәттә техиму қаттиқ болушқа чақириди.

Әнглийә вә канада бу һәптә мас қәдәмдә баянат елан қилип, әнглийә вә канада карханилириниң уйғур районидики кишилик һоқуқ дәпсәндичиликигә четилип қелиши яки униңдин пайда елишниң алдини алидиған бәзи тәдбирләрни алған.

Әнглийә елан қилған тәдбирләр әнглийә карханилириниң тәминләш зәнҗиридә кишилик һоқуқ дәпсәндичилики байқалған мал тәминлигүчиләрни ишләтмәслик, уйғур елигә қарита йолға қоюлған експорт контроллуқини орундиялмиған тәшкилатларға җәриманә қоюш қатарлиқларни өз ичигә алиду.

Һалбуки, кишилик һоқуқни көзитиш тәшкилатиниң әнглийә ишлириға мәсул директори ясмин аһмәд шәнбә күни елан қилған баянатида “әнглийә алған бу тәдбирләрниң канада оттуриға қойған вә йеқинда америкида күчәйтилгән мәҗбурий әмгәк билән ишләпчиқирилған мәһсулатларни чәкләш тәдбирлиридәк күчлүк әмәс” ликини билдүрди.

У мундақ деди: “әнглийә елан қилған тәдбирләр хитай шинҗаңда садир қиливатқан еғир кишилик һоқуқ дәпсәндичиликигә чидап турушқа болмайдиғанлиқидин ибарәт бир сигнални бәрди. Буларниң һәммиси яхши тәдбирләр, әмма әгәр әнглийә һөкүмити буниңға әстайидил муамилә қилидиған болса, ундақта у йәр шари тәминләш зәнҗиридә мәҗбурий әмгәкни өз ичигә алған кишилик һоқуқ дәпсәндичиликиниң алдини алалмиған карханиларға импорт чәклимиси вә қануний җаза йүргүзүши керәк.”

Йеқинда әнглийәдики маркс вә спенсергә охшаш нопузлуқ ширкәтләр тәминләш зәнҗирини уйғур районидин йөткәп чиқиш вә мәҗбурий әмгәкниң зиянкәшликигә учриған ишчиларға төләм төләш қатарлиқ тәдбирләрни елан қилған иди.