Әнглийә уйғур районида йүз бериватқан “ирқий қирғинчилиқ” ни тосуш үчүн һәрикәт қилишқа чақирилди

Әнглийәниң нопузлуқ парламент әзаси нусрәт ғени вә “хәлқара магнетиский кишилик һоқуқ қануни” ниң тәшәббусчиси бил бровдер бирләшмә обзор елан қилип, әнглийәни уйғур районида йүз бериватқан “ирқий қирғинчилиқ” ни тосуш үчүн һәрикәткә өтүшкә чақириди.

Улар обзорида нөвәттә уйғур районида “җаза лагерлири, қуллар әмгики, дөләт қоллишидики аялларни хорлаш, мәҗбурий туғмас қилиш вә аз санлиқ милләтләрниң иккинчи дуня урушидин буянқи әң зор көләмлик тутқун қилиниши” қатарлиқларниң садир болуватқанлиқини, дуня буниңдин кейин бундақ мәнзириләрни қайта көрмәслики арзу қилған болсиму, бүгүн буниң хитайдики уйғурларниң бешиға кәлгәнликини оттуриға қойди.

Обзорда мунда дейилди: “америка ‛уйғур кишилик һоқуқ сиясити қануни‚ вә ‛йәршари магнетиский қануни‚ билән кәскин һәрикәт қилди, бу америка һөкүмитиниң хитайниң мәсул әмәлдарлирини җазалишиға йол ачти. Шундақтиму әнглийәниң магнетиский җаза тизимликидә хитайниң бирму әмәлдари йоқ. Әгәр биз ‛магнетиский қануни, ни мушуниңға охшаш еғир кишилик һоқуқ дәпсәндичиликлири үчүн қолланмисақ, бу қануни чиқиришниң немә һаҗити?”

Улар йәнә, әнглийә һөкүмити уйғур елидин мал сетивалидиған әнглийә ширкәтлиригә техиму көп чәклимиләрни елан қилған болсиму, әмма буниң йәнила йетәрлик әмәсликини билдүрди.

Улар мунда деди: “биз һәр иккимиз әркинлик, демократийә, әркин сода вә кишилик һоқуқниң күчлүк қоғдиғучилиримиз. Биз ‛магнетиский қануни‚ дин пайдилинип, хитайдики әң начар кишилик һоқуқ җинайәтчилириниң ирқий қирғинчилиқ билән мунасивәтлик пулини әнглийәдә сақлиялмайдиғанлиқиға, әнглийәниң һарам пулларниң бихәтәр панаһгаһи әмәсликигә капаләтлик қилишимиз керәк.”

Әнглийәниң консерватип парламент әзаси нусрәт ғени әнглийәдә уйғурларни қоллаш һәрикитиниң байрақдарлиридин бири, бил бровдер болса америкида туғулған әнглийәлик мәбләғ салғучи вә сиясий паалийәтчи болуп, у дуняға мәшһур “хәлқара магнетиский қануни” ниң мақуллинишиға әң зор төһпә қошқан шәхсләрниң бири.