En'gliye Uyghur rayonida yüz bériwatqan “Irqiy qirghinchiliq” ni tosush üchün heriket qilishqa chaqirildi

En'gliyening nopuzluq parlamént ezasi nusret ghéni we “Xelq'ara magnétiskiy kishilik hoquq qanuni” ning teshebbuschisi bil browdér birleshme obzor élan qilip, en'gliyeni Uyghur rayonida yüz bériwatqan “Irqiy qirghinchiliq” ni tosush üchün heriketke ötüshke chaqiridi.

Ular obzorida nöwette Uyghur rayonida “Jaza lagérliri, qullar emgiki, dölet qollishidiki ayallarni xorlash, mejburiy tughmas qilish we az sanliq milletlerning ikkinchi dunya urushidin buyanqi eng zor kölemlik tutqun qilinishi” qatarliqlarning sadir boluwatqanliqini, dunya buningdin kéyin bundaq menzirilerni qayta körmesliki arzu qilghan bolsimu, bügün buning xitaydiki Uyghurlarning béshigha kelgenlikini otturigha qoydi.

Obzorda munda déyildi: “Amérika ‛Uyghur kishilik hoquq siyasiti qanuni‚ we ‛yershari magnétiskiy qanuni‚ bilen keskin heriket qildi, bu amérika hökümitining xitayning mes'ul emeldarlirini jazalishigha yol achti. Shundaqtimu en'gliyening magnétiskiy jaza tizimlikide xitayning birmu emeldari yoq. Eger biz ‛magnétiskiy qanuni, ni mushuninggha oxshash éghir kishilik hoquq depsendichilikliri üchün qollanmisaq, bu qanuni chiqirishning néme hajiti?”

Ular yene, en'gliye hökümiti Uyghur élidin mal sétiwalidighan en'gliye shirketlirige téximu köp cheklimilerni élan qilghan bolsimu, emma buning yenila yéterlik emeslikini bildürdi.

Ular munda dédi: “Biz her ikkimiz erkinlik, démokratiye, erkin soda we kishilik hoquqning küchlük qoghdighuchilirimiz. Biz ‛magnétiskiy qanuni‚ din paydilinip, xitaydiki eng nachar kishilik hoquq jinayetchilirining irqiy qirghinchiliq bilen munasiwetlik pulini en'gliyede saqliyalmaydighanliqigha, en'gliyening haram pullarning bixeter panahgahi emeslikige kapaletlik qilishimiz kérek.”

En'gliyening konsérwatip parlamént ezasi nusret ghéni en'gliyede Uyghurlarni qollash herikitining bayraqdarliridin biri, bil browdér bolsa amérikida tughulghan en'gliyelik meblegh salghuchi we siyasiy pa'aliyetchi bolup, u dunyagha meshhur “Xelq'ara magnétiskiy qanuni” ning maqullinishigha eng zor töhpe qoshqan shexslerning biri.