Uyghur muqamliri london sheher bashliqi sadiq xan bashchiliqidiki rehberlerning alqishigha érishken

Ixtiyariy muxbirimiz erkin tarim
2019-04-17
Élxet
Pikir
Share
Print
Musulman xewer agéntliqining utuq qazan'ghanlarni mukapatlash murasimining axirida london sheher bashliqi sadiq xan ependi londondiki yipek yoli muzika ansambili bilen xatire sürette. 2019-Yili aprél, london.
Musulman xewer agéntliqining utuq qazan'ghanlarni mukapatlash murasimining axirida london sheher bashliqi sadiq xan ependi londondiki yipek yoli muzika ansambili bilen xatire sürette. 2019-Yili aprél, london.
RFA/Erkin Tarim

Londondiki yipek yoli muzika ansambili 17-nöwetlik musulman xewer agéntliqining utuq qazan'ghanlarni mukapatlash murasimigha alahide teklip bilen qatniship, Uyghur muqamidin ariyeler orundighan we Uyghur usulliridin örnekler körsetken. Oyun axirlashqandin kéyin london sheher bashliqi sadiq xan ularning yénigha kélip tebrikligendin kéyin ular bilen birlikte xatire resimi chüshken.

8-Aprél küni axsham londondiki marri'ott méhmanxanisida ötküzülgen pa'aliyetke london sheher bashliqi sadiq xan, bezi parlamént ezaliri, hökümet xadimliri we ammiwi teshkilat mes'ulliri ishtirak qilghan. Bu pa'aliyetke ishtirak qilghan Uyghur ziyaliysi eziz eysa elkün ependi buning dölet derijilik pa'aliyet ikenlikini bayan qildi.

Eziz eysa elkün ependi en'gliye dölet rehberliri qatnishidighan bundaq chong bir pa'aliyetke Uyghur sen'etchilerning teklip qilinishi we london sheher bashliqining kélip Uyghur muqamlirini anglishining zor ehmiyetke ige ikenlikini éytti.

Utuq qazan'ghan musulmanlarni mukapatlash murasimi her yili bir qétim ötküzülidighan bolup, bu dölet derijilik pa'aliyetke tonulghan sen'etchi we sen'et ansambilliri teklip qilinidiken. Uyghur pa'aliyetchi rehime mexmut xanim bu pa'aliyetke tallinish jeryani toghrisida toxtaldi.

U, her yili ötküzülidighan mezkur pa'aliyetke en'gliye bash ministiri we ministirlarning qatnishidighanliqini, bu yil london sheher bashliqi sadiq xan bilen parlamént ezaliri we bezi hökümet xadimlirining ishtirak qilghanliqini, ulargha Uyghur 12 muqami bilen Uyghur xelq naxshiliridin ariyeler sun'ghanliqini bayan qildi.

Rehime mexmut xanim sehnide naxsha orundash jeryanida Uyghurlarning hazirqi éghir weziyiti toghrisidimu toxtalghanliqini bayan qildi.

U, konsért axirlashqandin kéyin london sheher bashliqi sadiq xanning sehnige chiqip yipek yoli muzika ansambili sen'etchilirini tebrikligenlikini bildürdi.

London uniwérsitéti afriqa we sherqshunasliq instituti proféssori rachél xarris xanim utuq qazan'ghanlarni mukapatlash murasimining dölet derijilik chong pa'aliyet ikenlikini, bu yerde Uyghur sen'itini tonutushning zor ehmiyetke ige ikenlikini tilgha élip mundaq dédi: "Musulmanlar xewer agéntliqi teripidin ötküzülgen bu muhim ehmiyetke ige pa'aliyetke yipek yoli muzika ansambilining teklip qilinishi Uyghurlarni söyündürdi. Chünki, ularning bundaq muhim bir pa'aliyetke Uyghurlarni teklip qilishi bu teshkilatlarning Uyghur mesilisini muhim bir mesile dep qarishi we Uyghurlargha hésdashliq qilghanliqining ipadisi dep oylaymen".

Yipek yoli muzika ansambilini london uniwérsitéti afriqa we sherqshunasliq instituti proféssori rachél xarris xanim qurghan idi.

Toluq bet