Enqerediki amérika elchixanisining sahibxaniliqida ikki pa'aliyet ötküzüldi

Enqerediki amérika elchixanisining sahibxaniliqida ikki pa'aliyet ötküzüldi. Amérika qoshma shtatliri tashqi ishlar ministirliqining orunlashturushi we amérika qoshma shtatlirining enqerede turushluq elchixanisining sahibxaniliqida 9-ayning 10-küni etigen sa'et 9 din 12 ghiche enqerediki amérika medeniyet merkizide ötküzülgen yighin'gha amérika, en'gliye, yéngi zélandiye we awstraliye qatarliq döletlerning enqerede turushluq elchixanisining diplomatliri, enqerediki Uyghur jama'itidin bolup 30 etrapida kishi ishtirak qilghan. Yighin'gha teklip boyiche enqerege kélip ishtirak qilghan “Uyghur herikiti” teshkilati re'isi roshen abbas xanim bu heqte melumat bérip mundaq dédi: “Amérika qoshma shtatliri tashqi ishlar ministirliqining orunlashturushi amérika qoshma shtatlirining enqerede turushluq elchixanisining sahibxaniliqida enqerede düshenbe we seyshenbe künliri 2 kün pa'aliyetke qatnashtuq. Düshenbe küni amérika elchixanisida uchrishishlar boldi. Bir qanche axbarat orginining ziyaritini qobul qilduq. Uyghurlar toghrisida metbu'atlargha melumat berduq”.

Ikkinchi küni enqerediki amérika kultur(medeniyet) merkizide ötküzülgen yighin'gha “Uyghur herikiti” re'isi roshen abbas xanim, dunya Uyghur qurultiyi bash meslihetchisi rishat abbas ependi, dunya Uyghur qurultiyi mu'awin re'isi erkin ekrem ependi we bash teptish ablikim idris ependi hem enqerediki Uyghurlar ishtirak qilghan. Roshen abbas xanim mezkur yighinda diplomatlar bilen enqerediki Uyghur jama'itining ishtirak qilghanliqini, enqere Uyghurlirining guwahliq bergenlikini bayan qilip mundaq dédi: “Ikkinchi küni yeni seyshenbe küni amérikining enqerede turushluq elchixanisining xitay ishlirigha mes'ul munasiwetlik kishiliri bilen yighin chaqirildi. U yerde shahitlar jaza lagérlirigha, türmilerge tashlan'ghan ata-aniliri, uruq-tughqanliri toghrisida guwahliq berdi”.

Chüshtin kéyin sa'et 2din 4 kéche yene amérika qoshma shtatliri elchixanisining sahibxaniliqida enqerediki yawro-asiya tetqiqat merkizide yighin chaqirilghan. Yighin'gha Uyghurlardin sirt türkiyediki tetqiqat merkezlirining munasiwetlik mutexessisliri, bezi uniwérsitétlarning proféssorliri we diplomatlarmu ishtirak qilghan. Roshen abbas yighinda xitay bilen munasiwetlik siyasiy, iqtisadiy we insan heqliri heqqidiki mesililer toghrisida muzakire élip bérilghanliqini bayan qildi.

Amérika qoshma shtatlirining enqerede turushluq elchixanisi uyushturghan Uyghurlar toghrisidiki ikki pa'aliyetke Uyghur instituti mudiri doktor erkin ekrem ependimu ishtirak qilghan we munasiwetlik mesililer toghrisidiki öz qarishini bayan qilghan. U, amérika qoshma shtatlirining bu yighinni ötküzüshining 2 sewebi barliqini bayan qildi.

Yéqindin buyan amérika qoshma shtatlirining enqerede turushluq elchixanisining tor béti we ijtima'iy taratqulirida izchil halda Uyghur mesilisige orun bermekte.