Enqerede “5-Iyul weqesi” ni xatirilesh namayishi ötküzüldi

• Ixtiyariy muxbirimiz erkin tarim
  2019-07-05

5-Iyul ürümchi qanliq weqesining 10 yilliqini xatirilesh munasiwiti bilen türkiyening paytexti enqere shehirining merkizige jaylashqan ulus meydanida namayish ötküzüldi. Namayish ehli xitayning Uyghurlargha élip bériwatqan bésim siyasitige lenet oqudi. Türk dunyasi, islam dunyasi we türkiye jumhuriyiti hökümitini Uyghurlargha ige chiqishqa chaqirdi.

Namayishqa qeyseri we enqerediki Uyghurlar, sherqiy türkistan medeniyet we hemkarliq jem'iyitining mes'ulliri, türkiye kadirlar uyushmisining her derijilik kadirliri we türk ammisidin bolup köp sanda kishi ishtirak qildi. Mezkur namayish jeryanida axbarat élan qilish yighini ötküzüldi.

Türkiye kadirlar uyushmisi mu'awin re'isi nuri ünal ependi xitayni qattiq eyibligendin kéyin türkiye hökümitini Uyghurlargha ige chiqishqa chaqirip mundaq dédi: “Qimmetlik muxbirlar, bügün ürümchi qetli'amining xatire küni. Bügün könglimiz bekla yérim. 5-Iyulni unuttuqmu? yaq. Unutimizmu? yaq. Türk milliti özige qilin'ghan yaxshiliqnimu we yamanliqnimu peqet untumaydu. Türk milliti waqti sa'iti kelgende choqum xitaydin buning hésabini soraydu. Sherqiy türkistandiki qérindashlirimiz rastinla igisiz. Biz siz axbaratchilar arqiliq, insan heqliri qoghdighuchilirini, dölet rehberlirini, dunyagha shekil bérimen dewatqan dölet rehberlirini, bolupmu türk we musulman döletlerning rehberlirini Uyghurlargha ige chiqishqa chaqirimiz”.

Nuri ünal ependi türkiye kadirlar uyushmisi bolush süpiti bilen Uyghurlarning heqqaniy dewasini qollashni dawamlashturidighanliqini bayan qilip mundaq dédi: “Biz türkiye kadirlar uyushmisi bolush süpitimiz bilen silerning heqqaniy dewayinglar qollap quwwetleymiz. Ürümchi qirghinchiliqida öltürülgen shéhitlirimizni rehmet bilen xatirileymiz. Namayishqa ishtirak qilghininglar üchün hemmingizlerge rehmet éytimiz”.

Namayishchilar birdek “Yashisun musteqil sherqiy türkistan, heq hoquq adalet sherqiy türkistan'gha erkinlik” dep sho'ar towlashti.

Bu namayishni uyushturghan sherqiy türkistan medeniyet we hemkarliq jem'iyiti mes'ulliridin xeyrulla ependigil ependi namayishning netijilik bolghanliqini bildürdi.

5-Iyul ürümchi weqesi enqerede 10 yildin buyan izchil halda xatirilinip kelmekte. Burun enqerede oquwatqan oqughuchilar xitayning ata-anisini jazalaydighanliqini ilgiri sürüp ishtirak qilmaytti. Bu yilqi namayishta oqughuchilarning köplüki diqqitimizni tartti.

5-Iyul ürümchi weqesining 10 yilliqini xatirilesh üchün enqerede ötküzülgen namayishqa bezi xewer agéntliqliri, gézit we téléwiziye muxbirlirimu ishtirak qildi.