Түркийә җумһур рәиси әрдоған йәһудий қирғинчилиқини хатириләш нутқида уйғурларни тилға алмиди

Мухбиримиз ирадә
2021.01.28
Түркийә җумһур рәиси әрдоған йәһудий қирғинчилиқини хатириләш нутқида уйғурларни тилға алмиди Түркийә җумһур рәиси рәҗәп таййип әрдоған
Social Media

Түркийә җумһур рәиси рәҗәп таййип әрдоғанниң хәлқаралиқ “йәһудий қирғинчилиқи хатирә күни” мунасивити билән қилған нутқи тәнқидкә учриди.

Түркийә радио-телевизийә идариси “TRT” да тарқитилған нутуқта рәҗәп таййип әрдоған инсанийәтниң қийин бир дәврни баштин кәчүрүватқанлиқини, һазир дуняда “ирқчилиқ вируси” ниңму вирус юқуми биллә кеңийиватқанлиқини ейтип, дуня буниңға “тохта” дейиши керәк деди. Бирақ у “хәлқара җәмийәт йәһудий қирғинчилиқи, боснийә, риванда вә камбоджадикидәк паҗиәләрниң қайтиланмаслиқи үчүн һәрикәткә өтүши керәк” дәп чақириқ қилған нутқида уйғурларни тилға алмиди.

Америка һөкүмити хитайниң уйғурларға қаритиватқан зулумини “ирқий қирғинчилиқ” дәп җакарлиған вә йеңи ташқи ишлар министири антоний билинкин бу баһаға қошулидиғанлиқини қайта – қайта тәкитләватқан бир мәзгилдә рәҗәп таййип әрдоғанниң тунқида уйғурларға қилиниватқан ирқий қирғинчилиқни тилға алмаслиқи иҗтимаий таратқуларда күчлүк тәнқидкә учриди.

Түркийә һөкүмитиниң уйғур мәсилисидики позитсийәси нөвәттә һәм хәлқара кишилик һоқуқ җамаитиниң һәм түркийә ичидики өктичи партийәләрни нарази қилмақта.

27-январ күни түркийәдики уйғур қизи нурсиман абдурешит түркийә парламентида “ийи” партийәсиниң йиғиниға қатнишип нутуқ сөзлигән иди. Йиғин әһвалидин нәқ мәйдан тарқитиши қиливатқан парламент телевизийәсиниң дәл нурсиман абдурешитқа кәлгәндә тарқитишни кесиветиши күчлүк наразилиқ қозғиғаниди. Нурғун көзәткүчиләр бу вәқәни нөвәттики адаләт вә тәрәққият партийәси һөкүмитиниң уйғур мәсилисигә тутуватқан позитсийәсиниң ярқин ипадиси, дәп баһалиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.