Әрәб бирләшмә хәлипикиниң намзати интерполниң йеңи нөвәтлик рәиси болуп сайланған

Ихтиярий мухбиримиз арслан
2021-11-26
Share
Әрәб бирләшмә хәлипикиниң намзати интерполниң йеңи нөвәтлик рәиси болуп сайланған Интерполниң йеңи нөвәтлик рәисликигә сайланған, әрәб бирләшмә хәлипилики ички ишлар министирлиқиниң баш мупәттиши әхмәт нассар әл-рәиси интерпол омумий йиғинида сөзлимәктә. 2021-Йили 25-ноябир, истанбул, түркийә.
Photo: RFA

Бүгүн, йәни 25-ноябир күни интерпол-хәлқара сақчи тәшкилатиниң сайлими истанбулда өткүзүлгән.

Сайлам нәтиҗиси бүгүн интерполниң рәсмий тор бетидә вә тиветтер һесабида елан қилинған. Мәлум болушичә, әрәб бирләшмә хәлипилики ичкий ишлар министирлиқиниң баш мупәттиши әхмәт нассар әл-рәиси интерполниң йеңи нөвәтлик рәисликигә сайланған.

Әхмәт нассар әл-рәиси буниңдин кейинки төт йил җәрянида интерполниң рәислик вәзиписини өтәйдикән. Әл-рәиси интерпол-хәлқара сақчи тәшкилатиға рәис болуп сайланған түнҗи әрәб намзат һесаблинидикән.

BBC Түркчә ахбаратиниң хәвиридә билдүрүшичә, интерпол сайлимида әл-рәиси 68.9 Прсәнт аваз билән рәис болуп сайланған.

Интерполниң рәсми таратқусида билдүрүшичә, интерполға рәис болуп сайланған әхмәт нассар әл-рәиси мәзкур йиғинда сөз қилип: “интерпол-хәлқара сақчи тәшкилатиға рәис болуш мән үчүн шәрәплик бир вәзипә, мән кишиләр вә җәмийәтләр үчүн техиму бихәтәр дуня бәрпа қилиш үчүн тиришмән,” дегән.

89-Нөвәтлик интерполниң қурултайида мәзкур тәшкилатниң баш катипи йүрген сток сөз қилған вә мухбирларниң соаллириға җавап бәргән. Бир мухбир униңдин: “хитайниң уйғурларни тутуш үчүн интерполда ‛қизил ташлиқ тутуш буйруқи‚ чиқиришқа орунғанлиқи тоғрисида әйбләшләш мәвҗут, сиз бу һәқтә немә дәйсиз?” дәп сориғанда, у мундақ җаваб бәргән: “сизгиму мәлум болғинидәк, мениң бу тәшкилатқа алақидар тәҗрибәм бар, мән 2005-йили хизмәткә кирдим, бәш йил техника комитетиниң әзаси болдум, кейин баш катип болуп вәзипә өтидим, бизниң бу тәшкилатниң сиясий бир тәшкилат әмәсликини тәкитләймән. Әлвәттә, тәшкилатқа әза һәр бир дөләтниң қайси җинайәтчини қандақ тутуш тоғрисида охшимиған йоллири вә усуллири мәвҗут, хәлқара сақчи-тәшкилати интерполниң өзигә хас бәлгилиримилири бар. Интерпол наһайити чәклик һоқуқ даириси ичидә ишләйду. Биз узун замандин буян сиясий вә һәрбий мәсилигә арилашмай кәлдуқ. Бизниң һоқуқимизму чәклик. Бизниң йәнә бир мәсулийитимиз бар болуп, у болсиму дөләтниң игилик һоқуқидин йирақ туруш. Бизгә әза дөләтләрниң миллий мәсилилири тоғрилиқ тәкшүрүш елип бармаймиз вә әйиблимәймиз. Бу биз йирақ турушимиз керәк болған бир саһә. Әмма бизниң кишилик һоқуқни қоғдаш мәсилисидә күчлүк бәлгилимилиримиз вә келишимимиз бар. Әгәр әза дөләтләр интерпол қанилини ишилтишни қарар қилса, улар чоқум бизниң түзүм вә өлчәмлиримизгә әмәл қилиши керәк, әгәр ‛қизил ташлиқ тутуш буйруқи‚ да сиясий арқа көрүнүш асас қилинған болса, биз һеч бир шәкилдә һәрикәткә өтмәймиз.”

Түрк адвокат гүлдән сөнмәз ханимниң қаришичә, мәйли әрәб бирләшмә хәлипиликиниң намзати болсун, мәйли хитайниң намзати болсун, һәр иккисиниң искәнҗә вә қийин-қистақ билән тонулған шәхсләр икән. У өзиниң һәр икки намзатниң интерполға рәис болуп сайлишиниға қарши икәнликини билдүрүп, мундақ деди: “уларниң қайиси бири рәис болуп сайлинишидин қәтийнәзәр, өлүм җазаси, қийнаш вә начар муамилиләр түгимәйду.”

Интерпол, йәни хәлқара сақчи тәшкилатиға хитай намзатниң рәис болуп сайлиналмиғанлиқиниң сәвәби немә? хитай намзати рәисликкә сайланмиғанлиқи үчүн кишилик һоқуқ тәшкилатлири билән уйғурларниң әндишилири йоқайду дейишкә боламду? биз бу тоғрилиқ дуня уйғур қурултийиниң муавин рәиси доктур әркин әкрәм билән хәлқара шәрқий тәшкилатлар бирликиниң рәиси һидайәтуллаһ оғузханни зиярәт қилдуқ.

Доктур әркин әкрәм хитай намзатиниң интерполға рәис болуп сайлиналмаслиқиниң сәвәблири тоғрисида тохталди. Униң қаришичә, хитай намзатиниң сайлиналмаслиқидики сәвәбләрниң бири, хитайниң шәрқий түркистанда йүргүзиватқан зулум сияситиниң хәлқарада ирқий қирғинчилиқ дәп әйиблиниватқанлиқи, тибәт вә хоңкоңлуқларға қарши елип барған сияситиниң вәһшийлики түпәйлидин хитайниң хәлқарада образини йоқатқанлиқи икән.

Доктур әркин әкрәм, хитайниң җаһангир бир дөләткә айлиниш үчүн G20 вә интерпол дегәнгә охшаш хәлқаралиқ тәшкилат вә органларға сиңип киришкә орниватқанлиқини, өзигә мухалип һәр қандақ күчләрни йоқитиш үчүн хәлқаралиқ тәшкилатлардин пайдилинишқа орниватқанлиқини билдүрди. У йәнә кишилик һоқуқ тәшкилатлири вә шундақла шәрқий түркистан тәшкилатлириниң бу һәқтә һошяр болуш керәкликини, хитайниң хәлқаралиқ тәшкилатларға әза болуп керишигә һәр заман қарши туруп һәрикәт қилиши керәкликини тәкитлди.

Хәлқара шәрқий түркистан тәшкилатлар бирликиниң рәиси һидайәтуллаһ оғузхан, гәрчә уйғурлар хитай намзатиниң интерполға рәис болуп сайланмиғанлиқидин мәмнун болған болсиму, әмма бу буниңдин кейин хитай интерполдин пайдиллинип шәрқий түркистан тәшкилатлириниң рәһбәрлиригә вә муһаҗирәттики уйғурларға һеч иш қилалмайду дегән мәнани бәрмәйду, деди. У йәнә хитайниң иқитисадий күчигә тайинип бәзи дөләтләргә пул бериш арқилиқ б д т гә охшаш хәлқаралиқ тәшкилатларда өзиниң тәсирини ашуруп келиватқанлиқини билдүрди. У ахирида буниңға қарита уйғурларниң қолидин келишичә тәдбир елиши керәкликини тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт