Erkin emetning qérindashliri üstidiki eyibnamining chinliqi we nurnisa emetning késelchanliqi delillendi

Muxbirimiz shöhret hoshur
2020-08-31
Élxet
Pikir
Share
Print
Erkin asiya radiyosining enqerediki ixtiyari muxbiri erkin tarimning qérindashliridin (soldin onggha) enwer emet 11 yilliq késilgen, nurela emet ayrim bir terep qilin'ghanliqi uqturulghan, nurnisa emet 14 yilliq késilgen.
Erkin asiya radiyosining enqerediki ixtiyari muxbiri erkin tarimning qérindashliridin (soldin onggha) enwer emet 11 yilliq késilgen, nurela emet ayrim bir terep qilin'ghanliqi uqturulghan, nurnisa emet 14 yilliq késilgen.
RFA/Azigh

Enqere uniwérsitétining oqutquchisi doktor erkin emetning 4 qérindishi üstidiki eyibnamide yarqin ablet isimlik bir qarilighuchining nami xatirilen'genidi. Muxbirimizning qeshqer teptish mehkimisige qarita élip barghan éniqlashliri dawamida yarqin abletning mezkur mehkimidiki 40 yashlar chamisidiki bir teptish xadimi ikenliki delillendi, yene éniqlashlirimiz dawamida, erkin emetning singlisi nurnisa emetning qamaqta késelge muptila bolup, yeken peylu türmisidin yopurghidiki bir türmige yötkelgenliki aydinglashti.

Enqere uniwérsitétining oqutquchisi doktor erkin emetning qérindashliri üstidiki eyibnamide eyibligüchi orunning shinjang Uyghur aptonom rayonluq teptish mehkimisining qeshqer shöbisi ikenliki qeyt qilin'ghan. Eyibnamide eyibligüchi süpitide yarqin ablet isimlik teptish xadimi tilgha élin'ghan. Mezkur eyibnamining chinliqini delillesh üchün qeshqer wilayetlik teptish mehkimisige téléfon qilduq we bu mehkimide rastinla yarqin ablet isimlik bir xadimning bar-yoqluqini sürüshte qilduq. Biz yarqin abletning nöwette ishxanisida bar yaki yoqluqini sorighinimizda, teptish xadimi bu künning bir dem élish küni ikenlikini tilgha élip élip, yarqin ablet bilen sözlishelmeydighanliqimizni éytti. Biz uningda bu mehkimide yarqin ablet isimlik bir xadimning bar yoqluqini sorighinimizda "Elwette bar" dep jawab berdi. Biz uningdin yarqin abletning qanche yashlardiki kishi ikenlikini sorighinimizda, uning 40 yashlardiki biri ikenlikini tilgha aldi. Biz arqidin yarqin abletning qaysi uniwérsitétni oqughanliqini sorighinimizda, bu tür melumatlarni kadirlar bölümidin sorushimizni tewsiye qildi. Biz uningdin yarqin abletning téléfon nomurini soriduq. U uning nöwette karantin seweblik öyide ikenliki, emma uning shexsiy uchurlirini teminlep bérelmeydighanliqini éytti. Biz uningdin yarqin ablet béjirgen délodiki yopurghuluq 4 qérindashning, yeni erkin emetning qérindashlirining qandaq bir terep qilin'ghanliqini soriduq. Bu xadim bu délo heqqide rehbiri kadirlardin ruxset almay turup jawab bérelmeydighanliqini bayan qildi. Biz axirida mezkur töt qérindashning nöwette qaysi türmide jaza ötewatqanliqini sorighinimizda, bu bu heqte 10 minuttin kéyin qaytidin téléfon qilishimizni tewsiye qildi؛ emma déyilgen waqitta téléfon qilghinimizda, so'allirimiz pütünley jawabsiz qalduruldi.

Doktor erkin emet qérindashliridin nurnisa emet bilen enwer emetning salametliki yaxshi emesliki we shu sewebtin peylu türmisidin yopurgha türmisige yötkelgenliki heqqide uchur alghanliqini, shundaqla özining bu qérindashlirining nöwettiki salametlik ehwaldin endishe qiliwatqanliqini bayan qildi. Téléfonimizni qobul qilghan yopurghidiki bir siyasiy-qanun kadiri, erkin emetning qérindashlirining 11 yilliqtin késilgenlikini ashkarilash bilen birlikte, nöwette nurnisa emetning késelchan halette ikenlikini delillidi. Uning déyishiche, nurnisa emet türmide késelge muptila bolup yeken peylu türmisidin yopurghidiki bir türmige yötkelgen. Nurnisaning buningdin 3 ayche awwal yeken peylu türmisidin yopurghidiki doxturxanigha ekélin'genlikini bayan qilghan bu xadim؛ uning nöwette yopurghidiki türmide ikenliki, wirus mezgili seweblik doxturxanida qayta tekshürülüsh we dawalashningmu ongushluq bolmaywatqanliqini ashkarilidi.

Melum bolushiche xitay da'iriliri nurnisa emet we yoldishi qadir emetke erkin emetni yoqlighanliqi üchün ikki milyon yüen jerimane qoyup, pütün mal-bisatini musadire qilghan؛ saqchilar soraq jeryanida ularni qalghan üch qérindishining erkin emet we ayaligha némilerni sowgha qilghanliqigha qeder atalmish jinayetlirini tepsiliy iqrar qildurghan. Nurnisa emetning nöwettiki késilige a'ilisige kelgen mezkur chong iqtisadiy ziyanning we yaki qamaqxanidiki qéyin-qistaqning weyaki qamaqxanidiki shara'itning nacharliqi seweb bolghanliqi hazirche melum emes.

Toluq bet