Илгирики икки қетимлиқ тутулушида 8 йил йетип чиққан 33 яшлиқ әркин иминҗан ‏үчинчи қетим йәнә тутулған

Бу йил 33 яшқа киргән әркин иминҗан, 2009‏-йили тутқун қилинип 6 йил түрмидә, 2017-йили тутқун қилинип 2 йил “тәрийәләш” тә йетип чиққан. Өмриниң үчтин бир қисмини қамақта өткүзгән әркин иминҗан, бу йил 9-айниң 1‏-күни үчинчи қетим тутқун қилинған. Илгирики икки қетимлиқ тутуп меңилишида яшанған ата-аниси көз йеши қилған болса, бу қетимлиқ тутулушида уни көз яшлири билән узатқучилар арисида униң бир яшлиқ пәрзәнти билән аялиму орун алған. Вәзийәттин хәвәр киши йәткүзгән бу учуриниң тоғрилиқи, тутқун әркин иминҗанниң юрти-чапчал наһийә җағистай йезисидики сақчи вә кәнт хадимлири тәрипидин дәлилләнди.

Чапчал вәзийитидин хәвәрдар кишиләрдин бириниң радийомизға инкас қилишичә, 1988‏-йили туғулған әркин иминҗан, 2009 ‏-йилидики “5‏-июл вәқәси” дин кейинки кәң-көләмлик тутқунда тунҗи қетим тутқун қилинип, 6 йиллиқ кесиветилгән. Ониверситетта оқуйдиған йиллирини җаза лагерида өткүзгән әркин иминҗан 27 йешида җаза муддитини түгитип җәмийәткә қайтқан һәмдә яғаччилиқ вә ашпәзлик қатарлиқ һүнәр-кәсипләр билән һәпилишип тирикчилик қилған. У қиливатқан һүнәр-кәспиниң әлми-тәлмини билип, өйлүк-очақлиқ болуш вә мустәқил һаят кәчүрүшниң койиға чүшкәнидә, йәни 2017‏-йили зор тутқун башлинип, у “тәрбийәләш” кә елип кетилгән.

Инкаста баян қилинишичә, у икки йилдин кейин, йәни 2019‏-йили лагердин чиққинида йешиниң 31 ға улашқанлиқини көздә тутуп тездин өйләнгән вә бир пәрзәнтлик болған. У өзиниң 3 җанлиқ аилисниң турмуш һәләкчиликидә чепип йүргинидә, йәни бу йил 9 ‏-айниң 1‏-күни бешиға үчинҗи қетим қара халта кийдүрлүп сақчиханиға елип кетилгән.

Телефонимизни қобул қилған чапчал наһийә җағистай йезисидики алақидар кәнт хадимлири, әркин иминҗанниң әһвали һәққидики соалимизға ениқ җавап бериштин өзини қачурди, әмма униң тутқунда икәнликини инкар қилмиди.

Инкаста дейилишичә, әркин иминҗан толуқисз оттура мәдәнийәт сәвийәсигә игә болуп, униң тирикчилик йолини өгинип ата-анисиға ярдәмчи болуш вә өй-очақлиқ болуп мустәқил һаят кәчүрүштин башқа ишларни хиял қилишқиму имкани болмиған. Шундақ туруқлуқ, һәр үч қетимлиқ тутулушида униң бешиға “җәмийәт тәртивпини бузуш” вә “дөләтни парчилашқа урунуш” тин ибарәт бир-биридин чоң қалпақлар кийдүрүлгән. Инкаста йәнә дейилишичә, униң бундақ чоң қалпақларни кийишигә қол телефонидин чиққан “чатақ” лар сәвәп болған.

Җағистай йезилиқ сақчиханисиниң бир хадими, әркин иминҗанниң буниңдин бир айчә аввал тутқун қилинғанлиқини дәлиллиди. Әмма бу хадим униң тутулуш сәвәбидин хәвәрсизликини билдүрүп, бу һәқтә җағистай 3‏-кәнт сақчисидин мәлумат елишимизни тәвсийә қилди.

Чапчал вәзийтидин хәвәрдар кишиниң бу һәқтики инкасида йәнә қәйт қилинишичә, әркин иминҗанниң-қетимлиқ тутулушиға униң қол телефон хатирисидә “қанунсиз материяллар” байқалғанлиқи сәвәп болған. Иккинчи қетимлиқ тутулушиға униң сабиқ мәһбус икәнлики сәвәб болған. Бу қетим, йәни 3 ‏-қетимлиқ тутулушиға униңға “чекити бар” бир кишидин телефон кәлгәнлики сәвәб болған икән. Җағистайдики йәнә бир кәнт хадими, әркин иминҗан һәққдики бу учурниңму тоғрилиқини дәлиллиди.

Йәнә инкаста қәйт қилинишичә, әркин иминҗан телефондин чиққан “чатақ” сәвәблик 6 йил җазаланғандин кейин, йәнә “хата” материялларни уқушмай көрүп қелиштин сақлиниш үчүн бир мәзгил қол телефон ишләтмигән. Әмма өйлүк-очақлиқ болғандин кейин, турмуш вә иш еһтияҗи билән қайтидин қол телефон тутқан. Бу йил авғустта униңға илгирики бир камирдишиниң аилисидин телефон келиши билән. У көрсәткән барлиқ еһтиятчанлиқларниң һечқандақ роли болмиған. У йәнә “дөләтни парчилашқа урунуш” гумани билән тутуп кетилгән, әмма униң бу қетимқи тутулушида қамақханиға яки лагерға әкитилгәнлики вә униңға йәнә қандақ җазаларниң берилидиғанлиқи һазирчә мәлум әмәс.

Юқурида чапчал җағистайдики 33 яшлиқ әркин иманҗанниң илгирики икки қетимлиқ тутулишида 8 йиллиқ қамақ җазаисиға учриғанлиқи вә бу йил 1‏-сентәбир күни үчинчи қетим тутқун қилинғанлиқи һәққидә аңлитиш бәрдуқ.