Италийә пайтәхти римдики «әркинлик йүрүши» дә уйғурлар вә илһам тохти мәсилиси аңлитилди

Мухбиримиз меһрибан
2019-10-15
Елхәт
Пикир
Share
Принт
Италийә пайтәхти рим шәһиридә өткүзүлгән 2019-йиллиқ «әркинлик йүрүши» дә уйғурлар вә илһам тохти мәсилиси аңлитилған. 2019-Йили 12-өктәбир.
Италийә пайтәхти рим шәһиридә өткүзүлгән 2019-йиллиқ «әркинлик йүрүши» дә уйғурлар вә илһам тохти мәсилиси аңлитилған. 2019-Йили 12-өктәбир.
Photo: RFA

Игилишимизчә, италийә пайтәхти рим шәһиридә өткүзүлгән 2019-йиллиқ «әркинлик йүрүши» дә уйғурлар вә илһам тохти мәсилиси аңлитилған.

Италийәдики кишилик һоқуқ тәшкилатлиридин «әркинлик җәмийити» ниң тор бекитидики учурдин мәлум болушичә, мәзкур тәшкилат 12 йилдин буян һәр йили италийә пайтәхти рим да өткүзүп келиватқан «әркинлик йүрүши» паалийитини, бу йил шу йәр вақти 12-өктәбир шәнбә күни чүштин кейин саәт 2 дә башлиған. Италийә қатарлиқ явропа дөләтлиридики сиясийонлар, кишилик һоқуқ паалийәтчилири тәклип билән қатнашқан «әркинлик йүрүши» рим шәһириниң кампанано районидин башлинип, намайиш 4 сатәттин артуқ давамлишип, рим шәһиригә қарашлиқ сорбо шәһәрчисидә аяғлашқан.

Йүрүштин кейин сорбо шәһиридики санктуарй сарийида мустәбит һакимийәтләр астида езиливатқан хәлқләрниң вәзийити һәққидә доклат бериш йиғини өткүзүлгән.

Мәзкур тәшкилатниң тор бекитидики учурлардин мәлум болушичә, 12-өктәбирдики «әркинлик йүрүши» вә йүрүштин кейин римниң сорбо шәһәрчисиниң сантуарй сарийида ечилған йиғинниң асасий темиси хитай, венсуила, иран қатарлиқ мустәбит дөләт һөкүмәтлириниң дөләтни қанун билән идарә қилиш принсиплириға қарши һалда, бу дөләтләрдә адаләт вә әркинликни чәкләш, болупму өз һөкүмранлиқи астидики хәлқләрниң етиқад вә кишилик әркинликини дәпсәндә қилиш һәрикәтлиридә болушиға дуняниң җиддий инкас қайтуруши оттуриға қоюлған.

Игилигән әһваллардин мәлум болушичә, йеқинқи бирқанчә йилдин буян италийәниң рим шәһиридә һәр йили өткүзүп келиниватқан «әркинлик йүрүши» гә чәтәлләрдә паалийәт елип бериватқан уйғур тәшкилатлири вә сиясий паалийәтчилириму тәклип билән қатнишип кәлгән. 2019-Йиллиқ «әркинлик йүрүши» гә, явропадики кишилик һоқуқ тәшкилатлири, сиясий паалийәтчиләр вә мустәбит һөкүмран һакимийәтләр тәрипидин езиливатқан хәлқләр вәкиллири қатарида, германийәдики «илһам тохтини қоллаш гурупписи» дин әнвәрҗан әпәндиму тәклип қилинған.

Әнвәрҗан әпәнди йәнә йүрүштин кейин сорбо шәһиридә ечилған йиғинда хитайниң җаз лагерлириға қамалған уйғурлар вәзийити, хитай һөкүмити тәрипидин муддәтсиз қамаққа мәһкум қилинған уйғур сәрхили илһам тохти вә тутқундики уйғур зиялийлириниң әһвали һәққидә доклат беришкә орунлаштурулған.

Уйғурларға вакалитән йүрүшкә қатнашқан вә йүрүштин кейинки йиғинда доклат беришкә орунлаштурулған әнвәрҗан әпәнди радийомиз зияритини қобул қилип, 12-өктәбир римда өткүзүлгән паалийәт һәққидә мәлумат бәрди. )Аваз(

Әнвәрҗан әпәндиниң билдүрүшичә, «әркинлик йүрүш» паалийитидин кейин, мәзкур паалийәтни орунлаштурған «әркинлик җәмийити» рәиси олита әпәнди өз сөзидә хитай, иран, венсоила қатарлиқ мустәбит һакимийәтләр тәрипидин езиливатқан хәлқләрниң әһвалиға көңүл бөлүшни тәкитлигәндә, уйғурлар вәзийитини алаһидә тилға алған.

Әнвәрҗан әпәнди йәнә өзиниң йиғинда бәргән доклати һәққидә тохтилип, униң доклатидики 2 милйондин 3 милйонға қәдәр уйғурниң «қайта тәрбийәләш мәркәзлири» дәп аталған хитайниң натсисларчә җаза лагерлириға қамилиш вәзийити, уйғурларниң хитайдики баравәрлики вә қануний һәқлирини тәләп қилғини үчүн хитай һөкүмити тәрипидин муддәтсиз қамаққа һөкүм қилинған илһам тохти мәсилиси вә 500 дин артуқ уйғур сәрхилиниң тутқун қилиниши қатарлиқ мәсилиләр һәққидә йиғинда әң көп соал сорулуп, уйғурлар вәзийитиниң асасий муназирә темисиға айланғанлиқини билдүрди.

Юқириқи аваз улинишидин йиғин һәққидики тәпсилатларни аңлайсиләр.

Пикирләр (0)
Share
Толуқ бәт