Қазақистан консулхана хадимиға ғулҗадики су електр қурулушлирини зиярәт қилдурған әсқәр азатбәк җасуслуқ билән әйиблинип 20 йиллиқ кесилгән

Вашингтондин мухбиримиз шөһрәт һошур тәйярлиди
2023.11.29
esqer4-new Или областлиқ көчмәнләр идарисиниң пинсийонери әсқәр азатбәк
Сүрәтләрни әсқәр азатбәкниң қазақистандики һәдиси гөһәр тәминлигән

Уйғур елидә 2017-йили башланған чоң тутқунда көп санда кишиләр “миллий бөлгүнчилик” вә “диний әсәбийлик” билән әйиблинип кесилгән болсиму, йәнә бир қисимлири кәм учрайдиған, һәтта җазаланғучи өзи хиялму қилип бақмиған ғәйрий вә алаһидә җинайәтләр билән кесиветилгән. Или областлиқ көчмәнләр идарисиниң пинсийонери әсқәр азатбәк әнә шулардин бири. Әсқәрниң қазақистандики һәдиси гөһәр ханим тәминлигән сот һөкүмидин мәлум болушичә, у қазақистанниң үрүмчидики консулхана хадимини ғулҗадики бирқанчә су електр истансисини зиярәт қилдурғанлиқи үчүн, “дөләт мәхпийәтликини ашкарилаш” җинайити билән әйиблинип, 20 йиллиқ кесиветилгән.

Или областлиқ көчмәнләр идарисиниң пинсийонери әсқәр азатбәкниң бикар қилинған паспорти
Или областлиқ көчмәнләр идарисиниң пинсийонери әсқәр азатбәкниң бикар қилинған паспорти
Сүрәтләрни әсқәр азатбәкниң қазақистандики һәдиси гөһәр тәминлигән.

Или областлиқ көчмәнләр идарисиниң пинсийонери әсқәр азатбәкниң қазақистандики һәдиси гөһәр ханимниң радийомизға инкас қилишичә, 2016-қазақистанға көчүп барған вә қазақистан вәтәндашлиқиға өткән әсқәр азатбәк, 2017-йили қорғас чегра базирини айлиниватқан мәзгилидә хитай сақчилири тәрипидин тутқун қилинип, хитайға әкитилгән. Гөһәр ханим уштумтут ғайиб болуп кәткән инисиниң из-дерикини қилип бир йилчә һәпиләшкәндин кейин, инисиниң “җасуслуқ” җинайити билән әйиблинип 20 йиллиқ кесиветилгәнликидин хәвәр тапқан.

Или областлиқ көчмәнләр идариси, әсқәр азатбәкниң хели бурун пенсийигә чиққанлиқини илгири сүрүп, бу һәқтә мәлумат беришни рәт қилди.

Әсқәр азатбәк
Әсқәр азатбәк
Сүрәтләрни әсқәр азатбәкниң қазақистандики һәдиси гөһәр тәминлигән

Гөһәр ханим, қазақистан һөкүмитигә әһвални мәлум қилип инисини қутулдурушни тәләп қилған. Қазақистанниң бейҗиңдики әлчиханиси йеқинда униңға әсқәр азатбәкниң гәнсудики бир түрмидә җаза муддити өтәватқанлиқи һәққидә учур бәргән вә әлчиханидики мунасивәтлик хадимниң гәнсудики мәзкур түрмигә берип, әсқәр азатбәкни зиярәтни қилғанлиқини вә униң саламәтлик әһвалниң нормал икәнликини уқтурған.

Илгирики ениқлашлиримизда, гәнсуда бирла әмәс бирқанчә түрмидә уйғур елидин йөткәп келингән мәһбуслар барлиқи, көпинчисиниң аталмиш “террорлуқ” җинайити билән четишлиқ мәһбуслар икәнлики ашкариланған иди.

Дейилишичә, қазақистан һөкүмити әсқәр азатбәкниң гунаһсизлиқини оттуриға қоюп, уни қутқузуш үчүн һәрикәт қилмақта икән.

Қазақистанниң бейҗиңдики әлчиханиси бизниң бу һәқтә елхәт арқилиқ сориған соаллиримизға җаваб бәрмиди.

Гөһәр ханим тәминлигән или областлиқ сот мәһкимисигә тәвә болған сот һөкүмнамисидә баян қилинишичә, әсқәр азатбәк ғулҗада хизмәт қиливатқан мәзгилидә, қазақистанниң үрүмчидики консулханисиниң хадими, қошумчә қазақистан дөләт хәвпсизлик идарисиниң хадими данияр серикбайев билән достлишип, у арқилиқ өзиниң вә башқиларниң виза ишлирини қолайлаштурған. Уларниң бу достлуқи җәрянида данийәр серибайов ғулҗаға келип әсқәр азатбәкниң һәмраһлиқида ғулҗаниң чапчал, нилқа, текәс, моңғулкүрә вә ғулҗа наһийәлиридики бирқанчә су амбири вә су електр истансини зиярәт қилған. Зиярәт давамида данияр қурулушниң өзини вә муһим орунларни сүрәткә тартқан. Әсқәр азатбәк бу қурулушларниң көлими вә ишләпчиқириш үнүми һәққидә мәлуматлар бәргән. Сот һөкүмнамисидә, бу қурулуш һәққидики рәсим вә мәлуматларниң дөләт мәхпийәтликигә ятидиғанлиқи һәққидә уйғур аптоном районлуқ вә дөләтлик дөләт хәвпсизлик органлири су ишлири тармақлириниң испатнамилиригә орун берилгән. Һөкүмнамидә йәнә дейилишичә, әсқәр азатбәк даниар серикбайевниң қазақистан дөләт хәвпсизлик хадими икәнликини вә су електр ишлириға аит учурларниң дөләт мәхпийәтликигә ятидиғанлиқини билип туруп, қәстән һалда “дөләт мәхпийәтликини ашкарилаш” җинайитини садир қилған.

“шинҗаң уйғур аптоном районлуқ алий хәлқ сот мәһкимиси или қазақ аптоном областлиқ сот мәһкимиси” җинайи ишлар һөкүмнамиси
“шинҗаң уйғур аптоном районлуқ алий хәлқ сот мәһкимиси или қазақ аптоном областлиқ сот мәһкимиси” җинайи ишлар һөкүмнамиси
Сүрәтләрни әсқәр азатбәкниң қазақистандики һәдиси гөһәр тәминлигән

Норвегийәдики уйғур әдлийә архипиниң мәсули бәхтияр өмәр әпәндиниң мәзкур сот һөкүмидики мәзмунларға асасән пикир баян қилишичә, хитай тәрәп әсқәр азатбәкниң чегра атлап тутуп кәлгән вә сорақ җәрянида күтүлгән җинайәтләрни тапалмиғандин кейин, әйни чағдики сиясий һава бойичә уни җазасиз қоймаслиқ; йәнә бир тәрәптин өзлириниң чегра атлап тутуп кәлгәнликидәк җинайитини йошуруш үчүн униңға тоқулма бир җинайәтни артқан. Су қурулушлириниң җәмийәткә ашкара муәссәсә икәнликини илгири сүргән бәхтияр әпәнди, бу делониң 2017‏-йилидики чоң тутқунниң маһийитини, йәни уйғур районида давам қиливатқан ирқий қирғинчилиқни көрситип беридиған йәнә бир мисал икәнликини оттуриға қойди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.