Exmet dawut'oghlu: "Biz Uyghurlarning awazi bolushqa dawam qilimiz"

Ixtiyariy muxbirimiz erkin tarim
2020-11-17
Share
roshen-exmet-dawutoghlu.jpg "Uyghur herikiti" teshkilatining re'isi roshen abbas xanim(solda) türkiye kélechek partiyesining re'isi exmet dawut'oghlu bilen körüshti. 2020-Yili 15-noyabir, türkiye.
RFA/Erkin Tarim

Türkiyede yéngi qurulghan öktichi partiyelerdin biri bolghan kélechek partiyesining re'isi, sabiq bash ministir exmet dawut'oghlu 15-noyabir küni Uyghur hey'itini qobul qilip, ulargha öz partiyesining Uyghurlarning awazi boluwatqanliqini, bundin kéyin hem awazi bolushni dawam qilidighanliqini tekitlidi.

13-Noyabir küni sa'adet partiyesining re'isi temel qaramolla'oghlu, "Iyi" partiyesining mu'awin re'isi yawuz aghirali'oghlu, kélechek partiyesining mu'awin re'isi selchuq özdagh we ümid ependiler enqerediki partiyesining merkezliride Uyghur hey'itini qobul qildi. Ular özlirining Uyghurlarning hazirqi éghir weziyitige bekla échinidighanliqini, bundin kéyin Uyghurlar üchün némilerni qilalaydighanliqi heqqide Uyghur hey'iti bilen ortaqlashti. Ular yene Uyghur hey'itidin Uyghur dewasining xelq'aradiki eng yéngi weziyiti toghrisida melumat igilidi.

Yawuz aghirali'oghlu türkiye parlaméntida türkiy xelqler komitéti qurulghanliqini, bu komitéttimu Uyghur mesilisini otturigha qoyidighanliqini bildürdi.

Uyghur herikiti teshkilatining re'isi roshen abbas xanim bu heqte ziyaritimizni qobul qildi. U Uyghur herikiti teshkilatining tashqi munasiwetlerge mes'ul xadimi juliya millsap xanim, d u q ning bash teptishi ablikim idris ependi we Uyghur herikiti teshkilatining istanbuldiki wekili memet éli ependilerdin terkib tapqan hey'etni exmet dawut'oghluning qobul qilghanliqini, körüshüshte exmet dawut'oghluning "Partiyemiz sherqiy türkistanliqlarning awazi boluwatidu, bundin kéyinmu sherqiy türkistanning awazi bolidu," dégenlikini tekitlep ötti.

Exmet dawut'oghlu 2015-yili türkiye jumhuriyiti hökümitining bash ministirliq wezipisini ötewatqan mezgilde 7-8 ming etrapida Uyghur tayland we malaysiyadin türkiyege élip kélin'gen idi. Emma bu waqitta 100 neperge yéqin Uyghur béshigha qara xalta kéydürülüp taylandtin xitaygha élip kétilgen idi. Exmet dawut'oghlu bu qétimqi uchrishishta Uyghur hey'etke Uyghurlar taylandtin élip kétilgen ashu küni kéchisi özining uxliyalmighanliqini, köz yéshini tutalmay yighlap ketkenlikini éytqan. Roshen abbas xanim bu heqte melumat berdi.

13-Noyabir küni sa'adet partiyesining re'isi temel qaramolla'oghlu ependi partiyesining bashqa rehberliri bilen birlikte Uyghur hey'itini qobul qilip, Uyghurlarning hazirqi éghir weziyitini bilidighanliqini, buni her xil sorunlarda otturigha qoyuwatqanliqini, türkiye hökümitini dawamliq halda Uyghurlargha ige chiqishqa chaqiriwatqanliqini, bundin kéyinmu bu mesilige alahide köngül bölidighanliqini éytqan. Arqidin u Uyghur hey'ettin Uyghurlarning hazirqi weziyitini, Uyghurlarning öz partiyesidin kütken teleplirini we Uyghur dewasi toghrisida so'al sorighan. Bir yérim sa'et dawamlashqan uchrishish axirlashqandin kéyin mikrofonimizni sa'adet partiyesining re'isi temel qaramolla'oghigha uzattuq. U mundaq dédi: "Uyghurlarning derdige köngül bölüsh bizning wezipimiz. Chünki zulum insaniyetke yarashmaydu. Biz xitayning sherqiy türkistanda élip bériwatqan siyasitini qobul qilalmaymiz. Biz dawamliq halda türkiye hökümitining diqqitini buninggha tartishqa tirishiwatimiz. Hazir xitay insaniyetke qarshi jinayet sadir qiliwatidu. Uning üstige bizning Uyghur qérindashlirimiz bilen qedimdin tartip küchlük munasiwitimiz bar. Xitay hökümitining bir milletning étnik we diniy kimlikige qarap zulum qilishigha chidap turalmaymiz, biz bundin kéyin Uyghurlarning awazi bolushqa dawam qilimiz."

13- We 15-noyabir künliri élip bérilghan uchrishishlar toghrisida melumat igilesh üchün d u q ning bash teptishi ablikim idris ependini ziyaret qilduq. Sa'adet partiyesi, yéngidin rehah partiyesi bilenmu uchrashqanliqini, "Aqit" téléwizyeside Uyghurlarning éghir weziyitini anglatqanliqini we körüshüshning muweppeqiyetlik ötkenlikini bayan qildi.

Uyghur herikiti teshkilatining istanbuldiki wekili memet éli ependi bu qétimqi ziyaret jeryanida enqere sheher bashliqi mansur yawash ependi, istanbulning sheher bashliqi ekrem imam'oghlu we türkiye tashqi siyaset institutining mudiri hüseyin yaghchi ependiler bilenmu körüshüp, bezi teleplerni otturigha qoyghanliqini bayan qildi.

D u q we Uyghur herikiti teshkilati rehberliridin terkib tapqan hey'et 11-noyabir küni milletchi heriket partiyesining mu'awin re'isi kamil aydin ependi, "Iyi" partiyesining mu'awin re'isi exmet kamil er'ozan ependi, dewa partiyesining mu'awin re'isi abduraxman bilgich ependi hemde shu küni axshimi türkiyening eng chong öktichi partiyesi bolghan jumhuriyet xelq partiyesining re'isi kemal qilichdar'oghlu qatarliq partiye rehberliri bilen körüshken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet