Fransiyede “Uyghur irqiy qirghinchiliqi” ni étirap qilish boyiche ispat anglash yighini ötküzülgen

Ixtiyariy muxbirimiz Uyghur'ay
2021-12-17
Share

“Uyghur irqiy qirghinchiliqi” mesilisi yawropadiki bir qanche döletlerning parlaméntliri teripidin étirap qilin'ghandin kéyin, mezkur qirghinchiliqini frasiyedimu étirap qilghuzush ishlirining jiddiy qanat yéyiwatqanliqi melum. Shu munasiwet bilen 15-dékabir fransiye parlaméntining yighin zalida “Uyghur irqiy qirghinchiliqini étirap qilish qarar layihesi” toghrisida ispat anglash yighini ötküzülgen.

Bu yighin'gha “Uyghur irqiy qirghinchiliqi” ni étirap qilishta küch chiqarghan yawropadiki bir qisim parlamént ezaliri, dunya Uyghur qurultiyining re'isi dolqun eysa, “Fransiye Uyghur birliki” we Uyghur akadémiyesi wekilliri, fransiyede turushluq lagér shahidliridin gülbahar jéliliwa, gülbahar héytiwaji, shundaqla bir qisim zhurnalistlar qatnashqan.

Guwahliq anglash yighini nahayiti qizghin shekilde dawamlashqan bolup, lagér shahitliri özlirining xitay jaza lagérlirida körgen-bilgenlirini anglitip, Uyghur qirghinchiliqi heqqide guwahliq bergen.

Bu yighin'gha yene yawropa parlaméntining ezasi rafa'él glüksiman, litwa parlaménitining ezasi duwéli xanim, kanadaliq proféssor jon parkér qatarliqlar tor arqiliq qatnashqan we söz qilghan.

Fransiye sotsiyal partiyesining bash wekili oliwiyi fogh ependi, Uyghur irqiy qirghinchiliqini firansiyede étirap qilghuzush herikiti üchün küch chiqirip kéliwatqan parlamént ezalirining biridur.

Radiyomiz ziyaritini qobul qilghan yawropa Uyghur institutining bashliqi dilnur xanim, fransiye parlaméntida “Uyghur irqiy qirghinchiliqi” ni étirap qildurushta kelgüsidiki ikki heptide fransiye xelqi we fransiye yashlirining qollishini qolgha keltürüshning nahayiti muhimliqini tekitlidi.

Amérika hökümiti we dölet mejilisidin bashqa, kanada, en'gliye, gollandiye, bélgiye, ltwa, awstriye parlaméntliri ilgiri-kéyin bolup, xitayning Uyghurlar üstidin yürgüziwatqan basturush herikitini “Irqiy qirghinchiliq” dep étirap qilghan idi.

Dunyaning herqaysi jaylirida yüz bériwatqan kishilik hoquq depsendichilikini eyibleshte aldinqi qatarda turup kéliwatqan fransiyening hazirghiche “Uyghur irqiy qirghinchiliqi” ni étirap qilish mesiliside birer qarar chiqarmasliqi, her sahening diqqitini qozghimaqta.

Fransiyediki lagér shahiti gülbahar héytiwaji bu qétimliq fransiye parlaménitidiki ispat anglash yighinida öz béshidin ütken weqelerni sözlep, guwahliq bergen. U radiyomiz ziyaritini qobul qilip, özining firansiye hökümitige üch türlük telepni otturigha qoyghanliqini bildürdi.

Igilishimizche, “Uyghur irqiy qirghinchiliqini étirap qilish qarar layihesi” 20-yanwar fransiye parlaméntida awazgha quyulidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet